Biblia Todo Logo
Bìoball air-loidhne

- Sanasan -

1 Ko̱ri̱nto̱ 6 - Tennet


Zoz ci obod ki ol wak a̱tu̱we̱ lo̱ki̱ka̱

1 Ming anyak e̱e̱t imma ngatinno̱ng ci aburneke gooni ci a̱tu̱we̱ nong, abunna ming okkoye enne gooni necu olle wak a̱tu̱ Ta̱mu̱ta̱dde̱n, eci iróng agano ol wak tu̱we̱nto̱ ngati ovvo olle wak lo̱o̱tu̱ kar kapahek lo̱ki̱ko̱ ol wak iróng a̱tu̱we̱ ki i̱yo̱ko̱ niga ko̱.

2 Iróng niga a̱gga̱yyu̱ ovvo atin ol wak a̱tu̱we̱ apahek olli lo̱o̱tu̱ do̱o̱k lo̱ki̱ko̱? Ma zin ming ovvo nege apahek olli lo̱o̱tu̱ lo̱ki̱ko̱, okkomnekung zo̱zzo̱wa̱ cikidik ngati etteddu lo̱ki̱ko̱?

3 Iróng niga a̱gga̱yyu̱, kovvo atin naga kapahek anjilonya cik Ta̱mu̱ta̱dde̱no̱ lo̱ki̱ko̱? Ming kapahek atin naga anjilonya cik Ta̱mu̱ta̱dde̱no̱ lo̱ki̱ko̱, obokce zin atin ming kovvo naga kapahek lo̱ki̱ko̱ kaal cik baiz cu!

4 I̱yo̱ko̱ zin, ming anyakku dango zo̱ze̱ ci ogon niko, nya ming ovvoyyu niga zoz necu rok ol wak iróng a̱tu̱ zoz ci Ta̱mu̱ta̱dde̱no̱ ju̱rru̱m ko̱?

5 Ma ovvoyyu gonoggu lo̱ki̱ka̱ ngati ol wak iróng a̱tu̱we̱, anyahaku wo̱ye̱ e̱le̱tti̱ a̱li̱ya̱n. Eci wo̱ye̱ nu̱nu̱n egenyyu niga do̱o̱k, i̱llo̱i̱ ngatinno̱ng e̱e̱t co̱de̱ ṯok ci egenyi, kar kapahek ol cik a̱tu̱we̱ ko̱ zoz ci dango cinne̱ng.

6 Abarik e̱e̱ti̱ ci a̱tu̱we̱ okkoye gooni lo̱ki̱ka̱ ngati ol wak iróng a̱tu̱we̱.

7 Ming anyakku jooret cik ovvoyyu lo̱ki̱ka̱ orgene cunno̱ng, i̱ye̱la̱ necu zoz ci azi ne iróng niga abakku baiz ci abunna ngu̱me̱ ci Ta̱mu̱ta̱dde̱no̱. Ma̱i̱je̱ nu̱nu̱n ming ogonekku̱ng gonoggu wak a̱tu̱we̱ kaal cik gerzek, alaltek nogo labak, ma ovvoyyu nogo lo̱ki̱ka̱.

8 Abarik niga e̱le̱tti̱ne̱ idhanyu ol kar bo̱do̱k ogorozit kaal cik ol wak a̱tu̱we̱.

9 Iróng niga a̱gga̱yyu̱ iróng atin olli mu̱nye̱nu̱ aragiz ba̱a̱li̱ne̱t ci Ta̱mu̱ta̱dde̱no̱. Ma anyikku ol kalabtaung! Iróng atin ol cik e̱e̱ggi̱n a̱li̱ya̱k, icima ol cik a̱di̱ngdi̱nga̱n to̱do̱yyo̱k kizeto ta̱mu̱ta̱dde̱ne̱t cik lo̱o̱tu̱, icima ngaai wak een a̱li̱ya̱k ki ol cik macik ogon e̱le̱tti̱ kizeto ngaai, icima ol cik macik oonge gonoggi,

10 icima ol cik een ogoryak, icima ol cik anyak zi̱nze̱tti̱ cik a̱ppi̱nte̱k kaale cik ollu, icima bba̱kco̱k, icima ol wak akati gonoggi volonga, ki ol wak adawa gonoggi lo̱o̱ta̱, iróng nege do̱o̱k amuda ba̱a̱li̱ne̱t ci Ta̱mu̱ta̱dde̱no̱.

11 I̱yo̱ko̱ orgene cunno̱ng ngatu, anyak ol u̱gge̱ ba̱li̱ye̱ cik ogon kaal ne̱ko̱. Uburuca zin abarik Manyitinna Ye̱su̱ Ki̱ri̱sto̱ ki Vongiz ci Ta̱mu̱ta̱dde̱no̱ mu̱nye̱n cuggo̱k, kar ka̱a̱nyu̱ng izet dooli cik a̱li̱le̱ Ta̱mu̱ta̱dde̱no̱.


Abait baiz ci abunna Ta̱mu̱ta̱dde̱no̱

12 Azi ol uggak ngatinno̱ng ne, “Kogonni wo̱ye̱ anna kaal do̱o̱k ming korongi.” Abarik ka̱du̱wa̱kku̱ng iróng kaala do̱o̱k agano ming kogon naga. Kutubura zin anna iróng kaala do̱o̱k anyak doiz ngatinanni.

13 Azi i̱yo̱ko̱ e̱e̱ti̱ imma ne, “Adiman Ta̱mu̱ta̱dde̱n da̱i̱ne̱t kize cik kadak naga.” Een zin zoz necu de̱de̱, abarik atin Manyi egerzan da̱i̱ne̱t ki ol cik adak da̱i̱ne̱t ko̱ do̱o̱k. Iróng Ta̱mu̱ta̱dde̱n eenyca e̱le̱tti̱ cik ol cik diirik kize ci a̱li̱ya̱kze̱ti̱nu̱, abarik kanyak e̱le̱tti̱ kar ki̱li̱ngli̱ngto̱zi̱k Manyi Ye̱su̱, kar zin enne kuzute e̱le̱tti̱ cigga̱c.

14 Ingannet atin Ta̱mu̱ta̱dde̱n agit bu̱k do̱o̱k daiza doize cinne ki bali ming ingane enne Manyi Ye̱su̱ daiza ke̱.

15 Iróng niga a̱gga̱yyu̱ e̱e̱ggi̱n e̱le̱tti̱ cuggo̱k cik Ki̱ri̱sto̱? Kadima anna wo̱ye̱ ele ci ize ci Ki̱ri̱sto̱ kar kurumte ki a̱li̱ya̱i̱t? Iróng een niko udut!

16 Iróng niga a̱gga̱yyu̱ ming arume e̱e̱ti̱ ki a̱li̱ya̱i̱t, o̱do̱ye̱ nege e̱le̱tti̱ne̱? Eci azi Warage ci Ta̱mu̱ta̱dde̱no̱ ne, “E̱e̱ggi̱n ol ne̱k een ram ko̱ ele co̱de̱.”

17 Ma̱i̱je̱ e̱e̱ti̱ ci arumek ele cinne Manyi, o̱do̱ye̱ enne ki nonno go̱o̱le̱ ci i̱no̱n enne.

18 E̱de̱yya̱ e̱le̱tti̱ baize ci a̱li̱ya̱kze̱ti̱nu̱. Imma mu̱nye̱na̱ cik ogon e̱e̱ti̱ ci diiri ko̱ do̱o̱k aavtte eliya eci re̱e̱nu̱no̱, ma̱i̱je̱ e̱e̱ti̱ icima ngaa ci een a̱li̱ya̱i̱t ogonik mu̱nye̱n ele cinne.

19 A̱gga̱yyu̱ niga e̱e̱ggi̱n e̱le̱tti̱ cuggo̱k ce̱e̱z ci Ta̱mu̱ta̱dde̱no̱, anyak Vongiz ci A̱li̱le̱ ci abak ngatinno̱ng, bali a̱gga̱ma̱nnu̱ ngati Ta̱mu̱ta̱dde̱no̱? Iróng niga abakku baiz cunno̱ng do̱.

20 Utuwaung bali Ta̱mu̱ta̱dde̱n i̱ge̱t daize ci Ye̱su̱ Ki̱ri̱sto̱. Abunna zin niga ming a̱di̱ngdi̱nga̱nnu̱ Ta̱mu̱ta̱dde̱n e̱le̱tti̱ne̱ cuggo̱k.

© 2018, Wycliffe Bible Translators, Inc. All rights reserved.

Wycliffe Bible Translators, Inc.
Lean sinn:



Sanasan