1 Ko̱ri̱nto̱ 5 - Tennet

Zoz ci obod ki a̱li̱ya̱kze̱t baize ci tu̱we̱nto̱

¹ Kiziya anna zoz ci azi ne, anyak ol u̱gge̱ cik een a̱li̱ya̱k orgene cunno̱ng, a̱li̱ya̱kze̱t ci gerze oroot ommog ol cik iróng a̱gga̱ zoz ci Ta̱mu̱ta̱dde̱no̱. Orooto e̱e̱ti̱ ki ngaa ci baatinne.

² Kar abarik odongnyu e̱le̱tti̱ zo̱ze̱ necu. Omozinnu weete abarik, kar iróng ngen owowonu ki e̱e̱t ci ogon kaal cik gerzek ko̱.

³ Ma̱i̱je̱ nu̱nu̱n ming iróng anna kaave orgene cunno̱ng, kaave anna ki i̱ge̱t vongiza. Imma ngati e̱e̱t ci u̱tu̱gu̱ zoz necu, kapaheya anna nonno lo̱ki̱ko̱, ogon ki ci karume anna ki i̱ge̱ta̱.

⁴ Ming arumenu niga zare cik Manyitinna Ye̱su̱, kaave anna bu̱k ki i̱ge̱ta̱ vongiza, kar doizi ci Manyitinna Ye̱su̱, ka̱vvu̱to̱ ngatinna.

⁵ Aanycik zin e̱e̱t neci a̱zzi̱t ci Sitano kar enne kuk kulal nonno oo do̱. Ma̱i̱je̱ atin vongizi cinne a̱ti̱ri̱z nonno ming i̱ki̱ya̱ i̱i̱te̱ni̱ ci okko Manyi Ye̱su̱ obodak lo̱o̱c.

⁶ Gerza zin zoz ci odongnyu niga e̱le̱tti̱. A̱gga̱yyu̱ niga nyigit cik meertak cikidik ming adak lata do̱o̱k?

⁷ Abunna zin ming aarannu e̱le̱tti̱ cuggo̱k baize bali reeni ci ogon ki nyigita cik meertak balik reentik ke̱, kar abunna ming abakku baiz ci abunna ci iróng anyak nyigit cik meertak. Ka̱tu̱we̱ naga a̱da̱i̱ Ki̱ri̱sto̱ zo̱ze̱ cinna. Ogon enne ki i̱yo̱ko̱ nyoon ci anyaha ol kize wawac ci I̱i̱te̱n wa Va̱rda̱ngi̱nto̱.

⁸ I̱yo̱ko̱ zin, ma adakku kwo̱o̱r go̱o̱le̱ ci anyakku marnonet ki mu̱nye̱n ki i̱yo̱ko̱ nyigita cik meertak reentik ko̱, abarik adait kwo̱o̱r go̱o̱le̱ ci abunna een de̱de̱ ci iróng anyak nyigit cik meertak.

⁹ Keherakkung waraga bali nanni een oo ke̱ ka̱nne̱kku̱ng ne, “Ma owowonu ki ol cik een a̱li̱ya̱k.”

¹⁰ Imma zoz necu iróng akati ol cik lo̱o̱tu̱ e̱e̱ggi̱n a̱li̱ya̱k, anyak zi̱nze̱tti̱ cik a̱ppi̱nte̱k kaale, e̱e̱ggi̱n ogoryak, ala to̱do̱yyo̱k kize ta̱mu̱ta̱dde̱n cinne̱ng. Anyak ol cik iróng a̱tu̱we̱ meelek lo̱o̱co̱we̱ do̱o̱k, i̱llo̱i̱ gool ci aarannu niga e̱le̱tti̱ cuggo̱k.

¹¹ Ma̱i̱je̱ i̱yo̱ko̱, ka̱du̱wa̱kku̱ng, ma owowonu ki e̱e̱t imma ci azi ne, ka̱tu̱we̱ enne kar ngatu kize a̱li̱ya̱i̱t icima anyak zinin ci a̱ppwe̱ kaale, ala to̱do̱yyo̱k kize ta̱mu̱ta̱dde̱n, e̱e̱t ci otor ol, e̱e̱t ci een bba̱kco̱i̱t, icima e̱e̱t ci alaba ol kaal. Ma adainu ki e̱e̱t ci abak baiz ci ogon niko.

¹² Iróng een li̱ngli̱ngo̱n cinanni kar anna kapahek ol wak iróng a̱tu̱we̱ lo̱ki̱ko̱. Kapahek naga ol wak a̱tu̱we̱ lo̱ki̱ko̱ do̱ niko.

¹³ Eci Ta̱mu̱ta̱dde̱n atin ci apahek ol wak iróng a̱tu̱we̱ ko̱ lo̱ki̱ko̱. E̱he̱rye̱ Warage ci Ta̱mu̱ta̱dde̱no̱ azi ne, “Ottoit e̱e̱t ci mu̱nye̱nu̱ orgene cunno̱ng.”