1 Ko̱ri̱nto̱ 3 - Tennet

Ngero Ce̱e̱ze̱ wa Ta̱mu̱ta̱dde̱no̱

¹ Gotonogga ki ngonogga tu̱we̱nta̱, i̱i̱te̱ne̱ bali kaavtte ki i̱ge̱t ke̱, iróng bali anna kozozikkung i̱ge̱t go̱o̱le̱ wa gon kozozike ol wak anyak Vongiz ci Ta̱mu̱ta̱dde̱no̱ zi̱nze̱tti̱nne̱ cigge̱k de̱de̱, eci niga ogonnu ki i̱yo̱ko̱ dooli cikidik baize cunno̱ng ngati Ki̱ri̱sto̱.

² Kedemezung ba̱li̱ye̱ anna i̱ge̱t zoz ci een de̱de̱ go̱o̱le̱ ci iróng okkomi ki i̱yo̱ko̱ gon kanyik dooli cikidik i̱ra̱ ko̱, iróng een a̱ha̱t ci okkomi ko̱, eci ngen niga uulet zoz ci odoi. De̱de̱ iróng niga u̱u̱lu̱.

³ Ngen zin niga abakku baiz ci olli lo̱o̱tu̱, eci ngen anyakku meder, adangonu e̱le̱tti̱ne̱ cuggo̱k. Imma zin go̱o̱le̱ necu abakku ko̱, o̱do̱wi̱nu̱ niga ki olli lo̱o̱tu̱. Ogonnu kaal cik ogon olli lo̱o̱tu̱.

⁴ Azi e̱e̱ti̱ imma ngatinno̱ng ne, “Kanu anna Pa̱u̱lo̱,” kar imma azi ne, “Kanu anna Apollos,” iróng zoz necu i̱ye̱la̱ ming ngen niga e̱e̱ggi̱nnu̱ olli lo̱o̱tu̱?

⁵ Ma i̱yo̱ko̱ ming ki̱no̱n ju̱rru̱m, een Apollos ngene? Ma Pa̱u̱lo̱ een ngene? Ke̱e̱ggi̱n naga do̱o̱k du̱cca̱k, i̱tto̱na̱ne̱t Manyi kar ki̱vi̱ta̱ kaanycung i̱ge̱t elemtta zoz ci Ki̱ri̱sto̱. Imma gon e̱e̱ti̱ imma ngatinna̱ng a̱li̱ngli̱ng li̱ngli̱ngo̱n ci aanyik Manyi nonno ki̱li̱ngli̱ng.

⁶ Kirira ba̱li̱ye̱ anna ma̱na̱, okko Apollosi a̱ddu̱te̱k maam, ma̱i̱je̱ Ta̱mu̱ta̱dde̱n anyak li̱ngli̱ngo̱n ci riili oroot, eci enne aanyik ma̱na̱ kitiliz.

⁷ Imma li̱ngli̱ngo̱ni̱ ci e̱e̱t ci arire ki bo̱do̱k li̱ngli̱ngo̱n ci e̱e̱t ci azacek ma̱na̱ maam ko̱, i̱llo̱i̱ nogo zoz ci riili ma̱ne̱ necu. Abarik zin li̱ngli̱ngo̱n ci Ta̱mu̱ta̱dde̱no̱ do̱ ci riili oroot, eci enne aanyik i̱nyo̱mo̱ ki̱ti̱li̱zza̱.

⁸ Riil li̱ngli̱ngo̱ni̱ ci e̱e̱t ci arir ma̱na̱ ko̱ ki ci e̱e̱t ci a̱ddu̱te̱k maam ma̱na̱ ko̱, a̱ru̱wo̱ni̱k atin ngenngene kaal cik li̱ngli̱ngo̱n cinne.

⁹ Ke̱e̱ggi̱nna̱ naga ol cik ka̱li̱ngli̱nge̱ka̱ Ta̱mu̱ta̱dde̱n; ovvo niga e̱e̱ggi̱nnu̱ ma̱na̱ ci Ta̱mu̱ta̱dde̱no̱ ki ce̱e̱z cinne.

¹⁰ Imma detente ci Ta̱mu̱ta̱dde̱no̱ ko̱, aanya annit kize e̱e̱t ci ka̱li̱ngli̱ngi̱ ki i̱yo̱ko̱ e̱e̱ti̱ ci eenyet ce̱e̱z ko̱, kogonni zin anna ki i̱yo̱ko̱ e̱e̱ti̱ ci adawek ce̱e̱z lo̱o̱c go̱o̱le̱ ci abunna kodok kak, kar e̱e̱ti̱ imma ki̱ki̱ya̱ keteeheny ce̱e̱z neci kuk ta̱dde̱na̱. Abunna zin e̱e̱ti̱ ming azunne gool ci eenycine enne ko̱ ju̱rru̱m.

¹¹ Eci Ta̱mu̱ta̱dde̱n aanyik Ye̱su̱ Ki̱ri̱sto̱ do̱ niko kize lolac ci abilne ce̱e̱z, i̱llo̱i̱ bo̱do̱k lolac imma ci abilne ce̱e̱z ki i̱yo̱ko̱ enne ko̱.

¹² Ming eenyet e̱e̱ti̱ imma ce̱e̱z lolace ci een dhahab, icima ziik cik ataltali, icima biyene cik odoi tuwenta, ovvo uggak eenyce keene icima arte icima tabarai,

¹³ abarik zin atin li̱ngli̱ngo̱ne̱ cinne i̱ye̱la̱ gi̱i̱ ci ogon enne, eci atin i̱i̱te̱n imma i̱ye̱la̱i̱ atin kaala nginti voori. I̱ye̱la̱i̱ atin li̱ngli̱ngo̱ni̱ cinne gwo̱o̱ya̱ ngati atuzene ce̱e̱z neci, kar atin gwa̱a̱ kitiman li̱ngli̱ngo̱n cinne̱ng e̱co̱de̱ e̱co̱de̱.

¹⁴ Ming iróng atuze kaala cik eenycine enne ce̱e̱z ko̱, anyonik atin nonno muci.

¹⁵ Ming atuze kaala ne̱k eenycine enne ke̱ do̱o̱k, oboda atin enne azzine i̱llo̱i̱ muci ci anyonike nonno. Ma̱i̱je̱ enne eliya amuda ruget go̱o̱le̱ ci ogon ki i̱yo̱ko̱ e̱e̱ti̱ ci a̱vi̱r a̱ha̱ti̱ ci gwo̱o̱yo̱ ko̱.

¹⁶ A̱gga̱yyu̱ e̱e̱ggi̱nnu̱ niga e̱le̱tti̱ne̱ Ce̱e̱z wa Ta̱mu̱ta̱dde̱no̱ kar Vongizi ci Ta̱mu̱ta̱dde̱no̱ kabak ngatinno̱ng.

¹⁷ Ming egerzan e̱e̱ti̱ imma Ce̱e̱z wa Ta̱mu̱ta̱dde̱no̱, egerzan atin Ta̱mu̱ta̱dde̱n nonno; eci a̱li̱le̱ Ce̱e̱z wa Ta̱mu̱ta̱dde̱no̱, e̱e̱ggi̱nnu̱ zin niga e̱le̱tti̱ne̱ ce̱e̱z neci.

¹⁸ Ma a̱lu̱tu̱ e̱le̱tti̱ cuggo̱k. Ming i̱no̱n e̱e̱ti̱ imma ngatinno̱ng azi ne kegenyi kaale cik baiz cu, abunna zin abarik ming aanyik ele kize tarbal, kar enne kumuda genyiz.

¹⁹ Eci genyizi ci lo̱o̱tu̱ een tarbalzet ngu̱me̱ ci Ta̱mu̱ta̱dde̱no̱. Ki i̱yo̱ko̱ ming e̱he̱rye̱ Warage ci Ta̱mu̱ta̱dde̱no̱, “A̱gga̱m Ta̱mu̱ta̱dde̱n ol wak aanyik e̱le̱tti̱ genyiz ko̱ ming orong nege egenye nonno;”

²⁰ kar bo̱do̱k kize ne, “A̱gga̱ Manyi i̱no̱ni̱ ci e̱e̱t ci aanyik ele genyiz ko̱ kize darace.”

²¹ I̱yo̱ko̱ zin, i̱llo̱i̱ e̱e̱t imma ngatinno̱ng ci odong ele zo̱ze̱ ci ol cik diirik! A̱gga̱c e̱e̱ggi̱n kaala do̱o̱k kaal cuggo̱k,

²² ogon ki i̱yo̱ko̱ anna Pa̱u̱lo̱ icima Apollos, icima Cephas icima lo̱o̱c cu, icima ruget, icima daiz, icima zoz ci i̱yo̱ko̱, icima zoz ci loza, e̱e̱ggi̱n ne̱ko̱ do̱o̱k cuggo̱k,

²³ kar niga e̱e̱ggi̱nnu̱ olli Ki̱ri̱sto̱, okko Ki̱ri̱sto̱ een ci Ta̱mu̱ta̱dde̱no̱.