1 Ko̱ri̱nto̱ 16 - Tennet

Muci ci ol wak a̱tu̱we̱

¹ I̱yo̱ko̱ zin zo̱ze̱ ci alutane ol o̱ro̱bi̱ya̱ cik eelanne ol wak a̱tu̱we̱ gonoggi Jerusalema, abunna ming ogonnu zoz necu go̱o̱le̱ bali ka̱du̱wa̱ke̱ ol wak a̱tu̱we̱ ke̱le̱ci̱a̱nya̱i̱ cik Ga̱la̱ti̱a̱ ke̱.

² Imma i̱i̱te̱ne̱ wa een Dominika, abunna e̱e̱ti̱ ming aarik o̱ro̱bi̱ya̱ u̱gge̱ cik agano ki nonno, kar karik abanyit kize ja̱mi̱te̱n, adaz zee ming kokko anna ka̱kku̱ni̱, karuba o̱ro̱bi̱ya̱ ne̱ko̱ ulutai, i̱llo̱i̱ o̱ro̱bi̱ya̱ u̱gge̱ bo̱do̱k cik oowanu niga.

³ Ming kuk anna kuzucaung, kokko keherik ol wak atahaltau niga ko̱ waraganya cik we̱e̱ta̱k kar ko̱o̱tte̱ muci cuggo̱k rok ol wak a̱tu̱we̱ Jerusalema.

⁴ Ming acinnu agano ming kokko anna bu̱k, korkorya atin anna ki nogo.

Kaal cik orong Pa̱u̱lo̱ ku̱tu̱gu̱zze̱

⁵ Ming kokko go̱o̱le̱ ci lo̱o̱c ci een zara Macedonia, kokko atin ki̱vo̱na̱nnu̱ng,

⁶ kar ka̱vvu̱t ki i̱ge̱t arrak do̱yo̱i̱t, icima kedeca tagiz do̱o̱k, kar eeltawang go̱o̱le̱ ci kokkoye.

⁷ Iróng korongi kuk kicinung ngati ulla kadiranung goola, kar kedecek. Korongi karik zinin cinanni ka̱vvu̱ta̱ ki i̱ge̱t do̱yo̱i̱t, ming aanya Manyi gool, ogon atin niko.

⁸ Ma̱i̱je̱ arrak korongi ka̱vvu̱ ngatu Ephesusa zee ki̱ki̱ya̱ I̱i̱te̱ne̱ wa Pentakosi,

⁹ eci kanyai gool ci a̱ppwe̱ ngatu kar arrak ki̱li̱ngli̱ng li̱ngli̱ngo̱n ci Ta̱mu̱ta̱dde̱no̱, ming wo̱ye̱ nu̱nu̱n amarina ol cik meelek niko ko̱.

¹⁰ Ming uzucaung i̱ge̱t Ti̱mo̱te̱yo̱, a̱gga̱mtta̱ nonno talninta. A̱li̱ngli̱ng enne li̱ngli̱ngo̱n ci Manyi Ye̱su̱ ki i̱yo̱ko̱ anna ko̱.

¹¹ Ma anyikku e̱e̱t imma ngatinno̱ng kutubur nonno. Abarik i̱tto̱nta̱ nonno labak kar enne ki̱ki̱ya̱ kobodan. Kere zin anna nonno ki gonoggi wak orkora bu̱k ko̱.

¹² I̱yo̱ko̱ zin zo̱ze̱ ci obod ki Apollos, gotonet tu̱we̱nta̱, kilalek anna nonno oroot abunna ming i̱vo̱nnu̱ng enne ki gonogget tu̱we̱nta̱. Aarnek enne we̱t i̱yo̱ko̱ niko, abarik a̱kku̱na̱kku̱ng atin enne ming orong zinin cinne.

Zoz ci Pa̱u̱lo̱ vu̱rrto̱

¹³ A̱vvu̱t ju̱rru̱m be̱i̱nta̱. Ibilet okkomit kak tu̱we̱nte̱ cunno̱ng. Abunna ming e̱e̱ggi̱nnu̱ ol wak animnyu zoz, kar okkomit kak.

¹⁴ U̱tu̱gu̱z kaal do̱o̱k rezinta.

¹⁵ Abunna ming a̱gga̱yyu̱ Stephanas ki dooli ciginnek arrak cik elemi zoz ci Ta̱mu̱ta̱dde̱no̱ o̱rge̱ ci een Achaia, kar zin kaarttek zi̱nze̱tti̱ li̱ngli̱ngo̱n ci eelanne nege olli Ta̱mu̱ta̱dde̱no̱. Kilalekkung gotonogga ki ngonogga tu̱we̱nta̱,

¹⁶ abunna ming o̱ngo̱o̱li̱nnu̱ lo̱ddi̱ki̱re̱ cik ogon ki nege, kar uggak ku̱tu̱gu̱zzo̱ ki i̱yo̱ko̱ ming ogonnu niga ko̱.

¹⁷ Katalne anna oroot, eci Stephanasi ki Vortunatus ki Achaicus a̱rra̱yya̱ annit ngatu. Eci ogon ki ci een i̱ge̱t e̱le̱tti̱ cik a̱vvu̱na̱kka̱ng.

¹⁸ Aanycik nege zinin cinanni katalo ki cuggo̱k bu̱k. Abunna ming irezzu ol cik ogon ki nege.

Zawinet ci Pa̱u̱lo̱ vu̱rrto̱

¹⁹ Izayung zin ol wak a̱tu̱we̱ do̱o̱k lo̱o̱ce̱ ci een Asia. I̱tto̱na̱ zin bo̱do̱k Akuila ki ngaa cinne Priscilla ki ol wak a̱tu̱we̱ alute ce̱e̱ze̱ cinne̱ng ming ovvo nege ala Ta̱mu̱ta̱dde̱n ko̱ zawinet, izayung zin zare cik Manyi Ye̱su̱.

²⁰ I̱tto̱na̱kku̱ng ol wak a̱tu̱ Manyi ko̱ do̱o̱k zawinet cinne̱ng zare cik Ta̱mu̱ta̱dde̱no̱.

²¹ Keheri anna Pa̱u̱lo̱ ele zawinet cu a̱tte̱ cinanni.

²² Ming iróng e̱e̱ti̱ imma irez Manyi Ye̱su̱, anyik to̱ri̱ne̱t ki̱tta̱k nonno. Anyik bai Manyi ki̱ki̱ya̱ ataman.

²³ Anyik bai deten ci Manyitinna Ye̱su̱ ka̱vvu̱ ngatinno̱ng.

²⁴ Kirezi anna ol do̱o̱k zare cik Ye̱su̱ Ki̱ri̱sto̱. Nonno nenen amen.