1 Ko̱ri̱nto̱ 15 - Tennet

Ngazi ci Ki̱ri̱sto̱ daiza

¹ I̱yo̱ko̱ gotonogga ki ngonogga tu̱we̱nta̱, korongi ka̱a̱da̱u̱ng zo̱ze̱ ci kaviyak cik abunna balik kuwahekkung anna ke̱, kaviyak balik elemttau niga ke̱ kar u̱tu̱we̱t rok i̱yo̱ko̱ ko̱.

² Amudannu atin niga ti̱ri̱ze̱ne̱t zo̱ze̱ ci kaviyak ne̱ko̱, ming a̱gga̱mnyu̱ niga kaviyak balik ku̱du̱wa̱u̱ng anna i̱ge̱t ke̱. Ming ngen elemtta kaviyak ne̱ke̱ de̱de̱, i̱llo̱i̱ gi̱i̱ imma ci amudannu.

³ Eci zoz ci ka̱gga̱ma̱ anna ngati Ki̱ri̱sto̱, ka̱du̱wa̱kku̱ng anna i̱ge̱t bu̱k zoz ci riili zo̱ze̱ neci. A̱da̱i̱ Ki̱ri̱sto̱ zo̱ze̱ ci mu̱nye̱n cigga̱c, ki ming e̱he̱rye̱ Warage ci Ta̱mu̱ta̱dde̱no̱,

⁴ a̱da̱ye̱k ol nonno ilomi, kar i̱i̱nya̱we̱ cik een i̱i̱yo̱, itinga enne daiza kurug, ki ming a̱du̱wa̱ Waraga ci Ta̱mu̱ta̱dde̱no̱.

⁵ I̱ye̱le̱k Ki̱ri̱sto̱ arrak ele cinne Cephas, kar zin bo̱do̱k ki̱ye̱le̱k ele nuyak wak een omoto ki ram ko̱ do̱o̱k.

⁶ Imma bali vu̱rrta̱, i̱ye̱le̱k ele cinne lak co̱de̱, ol cik meelek e̱e̱ggi̱n obet tu̱r (500) ol wak annu zoz cinne. Ngen ol ne̱ke̱ cik meelek aruge, imma ol uggak a̱da̱i̱to̱.

⁷ I̱ye̱le̱k bo̱do̱k enne ele Je̱mi̱s, kar zin bo̱do̱k ki̱ye̱le̱k ele to̱ni̱a̱k do̱o̱k.

⁸ Kar zin vu̱rrta̱ i̱ki̱ya̱ Ye̱su̱ i̱ye̱le̱ya̱ ele cinne annita bu̱k. Ming kacinni anna ele cinanni, ku̱tu̱gu̱ ki do̱le̱c ci a̱rri̱ta̱i̱ ming ngen i̱i̱nya̱ ciginnek kutubte.

⁹ Eci anna ke̱e̱ni̱ vu̱rru̱t ci to̱ni̱a̱u̱ veelek, iróng agano ming awuya ol kize to̱na̱i̱t, eci anna ki̱gi̱da̱ ol wak a̱tu̱we̱ Ce̱e̱ze̱ wa Ta̱mu̱ta̱dde̱no̱.

¹⁰ Abarik kiize anna e̱e̱t imma bu̱k eci Ta̱mu̱ta̱dde̱n aanya deten cinne, iróng deteni ci Ta̱mu̱ta̱dde̱no̱ aave gaganiko ngatinanni. Ming ki̱li̱ngli̱nga̱ anna nu̱nu̱n oroot kommog to̱ni̱a̱k veelek, deten ci Ta̱mu̱ta̱dde̱no̱ ci a̱ma̱yu̱ka̱n.

¹¹ I̱llo̱i̱ zoz imma ci gerze, ming een annit ci kuwahekkung kaviyak cik abunna icima nuyak. Elemannu niga do̱o̱k kaviyak cik abunna atubo veelek.

Ingazi atin ol wak a̱tu̱we̱ daiza

¹² Ming kuwahek naga ol zoz ci ingane Ki̱ri̱sto̱ daiza, nya ming azi ol uggak ngatinno̱ng ne iróng atin ol wak a̱da̱i̱to̱ ingazi daiza ko̱?

¹³ Ming iróng ol ingazi daiza, ngen zin da̱ Ki̱ri̱sto̱ kitinga daiza.

¹⁴ Ming ngen Ki̱ri̱sto̱ kitinga daiza de̱de̱, een zoz ci kuwaheka ol kaviyak cik abunna ko̱ darace, ogon tu̱we̱ne̱t cunno̱ng bu̱k niko.

¹⁵ Ming iróng ol balik a̱da̱i̱to̱ ke̱ ingazi daiza kuruget, kuwakteya naga ol zoz ci een volong obod ki Ta̱mu̱ta̱dde̱n, ku̱du̱kta̱ ol zoz ci ingane Ta̱mu̱ta̱dde̱n Ki̱ri̱sto̱ daiza, iróng enne ingane nonno de̱de̱ daiza, ming iróng ol ingazi daiza.

¹⁶ Eci ming iróng ol wak a̱da̱i̱to̱ ingazi daiza, ngen zin Ki̱ri̱sto̱ bu̱k kitinga daiza.

¹⁷ Ming ngen Ki̱ri̱sto̱ kitinga daiza, een tu̱we̱ne̱t cunno̱ng gi̱i̱tareng, ngen niga abakku mu̱nye̱ne̱.

¹⁸ Kar ol wak a̱da̱i̱to̱ zo̱ze̱ ci Ki̱ri̱sto̱, e̱de̱nyce̱ nege do̱o̱k.

¹⁹ Ming een zo̱ze̱ ci baiz cu do̱ ci karike naga zi̱nze̱tti̱ Ki̱ri̱sto̱, kapirna wo̱ye̱ naga kommogit ol wak lo̱o̱tu̱ do̱o̱k.

²⁰ Abarik itingawe Ta̱mu̱ta̱dde̱n Ki̱ri̱sto̱ de̱de̱ daiza. I̱ye̱le̱kke̱t ingazi atin ol balik a̱da̱i̱to̱ ke̱ daiza bu̱k kuruget.

²¹ Eci a̱kku̱ daizi zo̱ze̱ ci e̱e̱t co̱de̱ een Adam, a̱kku̱ zin bo̱do̱k zoz ci ingane ol daiza ko̱ go̱o̱le̱ ci e̱e̱t co̱de̱, Ki̱ri̱sto̱, kingazi atin daiza kuruget de̱de̱.

²² Anyahak e̱e̱ti̱ ci een Adam daiz ol do̱o̱k, kar zin zo̱ze̱ ci Ki̱ri̱sto̱ adiman atin ol do̱o̱k kuruget.

²³ Ogone atin kaala ne̱ko̱ i̱i̱nya̱we̱ cik aavtte do̱ do̱ olle do̱o̱k. Ki̱ri̱sto̱ bali ci ingazi daiza oowa, ovvo zin ol ciginnek a̱tu̱ nonno ko̱ ingazi daiza ming okko enne obodak lo̱o̱c.

²⁴ Ming idita Ki̱ri̱sto̱ doiz ki alaanzet ci lo̱rye̱nto̱ abale lo̱o̱c ko̱, i̱ki̱ya̱ zin atin ṯurnenet ci lo̱o̱tu̱, kar atin enne kaanyik alaanzet Ta̱mu̱ta̱dde̱n Baba.

²⁵ Abal atin arrak Ki̱ri̱sto̱ lo̱o̱c do̱o̱k zee kommog Ta̱mu̱ta̱dde̱n ol wak amarine nonno do̱o̱k. Aanyik Ta̱mu̱ta̱dde̱n atin Ki̱ri̱sto̱ korocek nogo lo̱o̱c zone.

²⁶ Ommog atin enne mo̱dde̱ni̱t ci vu̱rrto̱ wa een daiz.

²⁷ Azi Warage ci Ta̱mu̱ta̱dde̱no̱ ne, “Aanyik Ta̱mu̱ta̱dde̱n Ngerinne kabal kaal do̱o̱k.” Imma zin zo̱ze̱ necu ka̱gga̱ naga niko abal atin Ye̱su̱ Ki̱ri̱sto̱ kaal do̱o̱k. Iróng zin zoz necu ci azi ne, kar atin Ye̱su̱ kabal Ta̱mu̱ta̱dde̱n, een abarik Ta̱mu̱ta̱dde̱n ci anyik nonno kabal kaal ne̱k lo̱o̱tu̱ ko̱ do̱o̱k.

²⁸ Ming okko Ngerrti Ta̱mu̱ta̱dde̱no̱ abal kaal do̱o̱k, arike atin enne ele cinne doiz ci Ta̱mu̱ta̱dde̱no̱, kar Ta̱mu̱ta̱dde̱n kabal nogo do̱o̱k.

²⁹ I̱yo̱ko̱ ming iróng ol balik a̱da̱i̱to̱ ke̱ ingazi kuruget, ogon atin ol balik a̱gga̱me̱k ol ba̱ti̱ti̱mo̱ ke̱ ku̱? Ming iróng ol ingazi daiza udut, nya ming ka̱gga̱me̱k ol ba̱ti̱ti̱mo̱ zare cik e̱e̱t ci a̱da̱k ko̱?

³⁰ Imma ngatinna, nya ming kabazza naga e̱le̱tti̱ odohize ko̱?

³¹ Kacinni daiz odohize. Kanyai zoz ci kinnatung zo̱ze̱ ci Manyitinna Ye̱su̱ Ki̱ri̱sto̱, nonno ci aanya annit ku̱du̱wa̱ zoz necu.

³² Kamuda anna nya baling kirinya koyok olli Ephesus ogon ki elegje wak mootik ko̱ ngati kuwaheke zoz ci Ta̱mu̱ta̱dde̱no̱? Ming iróng ol balik a̱da̱i̱to̱ ko̱ ingazi daiza kuruget, “Kadakto bak kaude, eci loza kovvo naga daiza.”

³³ Ma anyikku ol u̱gge̱ kalabtaung i̱ge̱ta̱, “Ovvo atin gonoggu cik gerzek, egerzannung.”

³⁴ Abunna zin ming i̱no̱nnu̱ ju̱rru̱m kar utunget mu̱nye̱n, eci anyak ol u̱gge̱ ngatinno̱ng cik iróng a̱gga̱ Ta̱mu̱ta̱dde̱n. Ka̱du̱wa̱ niko zo̱ze̱ ci adakkung a̱li̱ya̱ni̱.

E̱le̱tti̱ cik ol wak ingazi daiza

³⁵ A̱jji̱nne̱ wo̱ye̱ ol uggak, “Ingazi ol wak a̱da̱i̱to̱ kuruget ku̱? Ingazi nege e̱le̱tti̱ne̱ cik ogon ku̱?”

³⁶ Imma e̱e̱ti̱ ci a̱jji̱n zoz ci ogon niko ko̱, tarbal enne oroot. Eci a̱gga̱yyu̱ niga gon ju̱rru̱m, ming karir inyemenit, a̱da̱i̱ arrak do̱yo̱i̱t, kar vu̱rrta̱ kitiliza.

³⁷ Ming ariri inyemenit, iróng i̱nna̱ ariri ele ci keet neci do̱o̱k, abarik ariri bu̱ra̱, labitot icima bu̱ra̱co̱c imma ci aave do̱.

³⁸ Abarik Ta̱mu̱ta̱dde̱n aanyik inyemenit kitiliza kanyak ele ki ming odola enne ke̱, kar kaanyik i̱nyo̱mo̱ do̱o̱k kanyait e̱le̱tti̱ cik aavtte do̱ do̱.

³⁹ Iróng e̱le̱tti̱ cik e̱le̱gje̱nnu̱ ki iballi ki u̱lu̱g do̱o̱k atubo.

⁴⁰ Anyak e̱le̱tti̱ cik aavtte ta̱mu̱-kenga, ki e̱le̱tti̱ cik aavtte lo̱o̱ta̱. Imma e̱le̱tti̱ cik aavtte ta̱mu̱-kenga ko̱ anyak zi̱zi̱wo̱n ci aave do̱ ki e̱le̱tti̱ cik aavtte lo̱o̱ta̱ ko̱.

⁴¹ Anyak koor zi̱zi̱wo̱n cinne do̱, okko nyelowi anyak zi̱zi̱wo̱n cinne do̱, ovvo bo̱do̱k munyunya anyak zi̱zi̱wo̱n cigge̱k cik aavtte do̱ do̱.

⁴² Ogon zin atin niko ming ovvo e̱le̱tti̱ cigga̱c ingazi daiza kuruget. A̱da̱i̱ atin e̱le̱tti̱, imma e̱le̱tti̱ cik okko Ta̱mu̱ta̱dde̱n ingane ol daiza ko̱ aruge udut.

⁴³ Ming a̱da̱i̱ e̱e̱ti̱ ci diiri, iróng ele cinne a̱zi̱ze̱ iróng bo̱do̱k okkomi. Imma ming ingazi e̱e̱ti̱ daiza, okko ele cinne a̱zi̱ze̱ kar bo̱do̱k kokkom kak.

⁴⁴ Ma̱i̱je̱ ming a̱da̱i̱ e̱e̱ti̱, adawek ol ele ci kanyak naga lo̱o̱ta̱ ngatu ko̱ lo̱o̱c. Ming okko atin enne ingazi daiza, okko anyak ele ci vongizo. Ming anyak e̱e̱ti̱ ci diiri ele ci lo̱o̱tu̱ ngatu, aave bo̱do̱k ele ci vongizo to.

⁴⁵ E̱he̱rye̱ Warage ci Ta̱mu̱ta̱dde̱no̱ azi ne, “Arrak bali oowa ke̱ eenyca Ta̱mu̱ta̱dde̱n e̱e̱t wa azi zara Adam, kar kanyik nonno ruget.” Imma Adami wa a̱kku̱ vu̱rrta̱, een enne Vongiz wa a̱kku̱ kar ki̱ki̱ya̱ kaanyik ol ruget.

⁴⁶ Iróng zin arrak naga kanyak e̱le̱tti̱ wak vongizak. Abarik arrak kanyak e̱le̱tti̱ wak lo̱o̱tu̱ ngatu, imma vu̱rrta̱ kanyait e̱le̱tti̱ wak vongiz ci Ta̱mu̱ta̱dde̱no̱.

⁴⁷ Eenyca Ta̱mu̱ta̱dde̱n Adam, e̱e̱t wa een oo todowai, okko e̱e̱ti̱ ci vu̱rrto̱ een Ye̱su̱, a̱kku̱ ta̱mu̱-kenga.

⁴⁸ Anyak olli lo̱o̱tu̱ do̱o̱k e̱le̱tti̱ cik ogon ki e̱e̱ti̱ wa een oo bali eenyca Ta̱mu̱ta̱dde̱n todowai ke̱. Imma ollik ta̱mu̱-kengo ko̱ ogon nege ki e̱e̱ti̱ ci a̱kku̱ ta̱mu̱-kenga.

⁴⁹ Ki i̱yo̱ko̱ zin ming ka̱du̱wo̱ naga ki e̱e̱t bali eenyca Ta̱mu̱ta̱dde̱n todowai ke̱, kovvo atin naga bo̱do̱k ka̱du̱wo̱ ki e̱e̱t bali a̱kku̱ ta̱mu̱-kenga ke̱.

⁵⁰ Gotonogga ki ngonogga tu̱we̱nta̱, ka̱du̱wa̱kku̱ng zoz ci e̱le̱tti̱ cik kanyak naga lo̱o̱ta̱ ngatu ko̱, iróng atin aragiz ba̱a̱li̱ne̱t ci Ta̱mu̱ta̱dde̱no̱, ovvo e̱le̱tti̱ cik lo̱o̱tu̱ a̱da̱i̱ atin ko̱, i̱llo̱i̱ nogo ngin imma rugete ci aave udut.

^51-52 Ijaktte da̱, ja ku̱du̱wa̱u̱ng zoz ci a̱lu̱gnye̱: Iróng atin naga ka̱da̱i̱ veelek, abarik uhu atin Ta̱mu̱ta̱dde̱n e̱le̱tti̱ cigga̱c, ku̱tu̱gu̱zzo̱ kiwagon ming acine e̱be̱re̱ci̱ wa uturi ko̱. Ming okko ture abuwe ovvo ol wak a̱da̱i̱to̱ ingazi daiza kuruget. Ukce zin agit e̱le̱tti̱ do̱o̱k, kar iróng naga ngen ka̱da̱i̱ bo̱do̱k.

⁵³ Ma̱i̱je̱ e̱le̱tti̱ cigga̱c kanyak naga amuje ko̱, ovvo atin ukce kize e̱le̱tti̱ cik okkomi. Imma e̱le̱tti̱ cigga̱c gon a̱da̱i̱ ko̱, abunna ukce kizeto e̱le̱tti̱ cik aruge.

⁵⁴ Imma e̱le̱tti̱ cik kanyak naga i̱yo̱ko̱ ko̱, amuje kar bo̱do̱k ovvo atin a̱da̱i̱. Abarik ukce atin e̱le̱tti̱ kizeto e̱le̱tti̱ cik abak udut. Kar zin zo̱zzo̱wa̱ cik e̱he̱rye̱ Warage ci Ta̱mu̱ta̱dde̱no̱ kizeto de̱de̱, azi ne, “I̱llo̱i̱ daiz komiz. Ommog Ta̱mu̱ta̱dde̱n daiz.

⁵⁵ I̱nno̱ doiz ci daizo? Iróng daizi ngen a̱u̱ce̱?”

⁵⁶ Aanyik mu̱nye̱na̱ daiz wu̱ce̱z cinne, kar lo̱ti̱nno̱wa̱ kanyait komiz ci ommog mu̱nye̱n.

⁵⁷ Abarik kanycik Ta̱mu̱ta̱dde̱n zany eci aanyyet komiz ngati Manyitinna Ye̱su̱ Ki̱ri̱sto̱.

⁵⁸ Gotonogga ki ngonogga tu̱we̱nta̱, ibilet ju̱rru̱m ci iróng gi̱i̱ imma omonung tu̱we̱nta̱. Abunna ming anyikku e̱le̱tti̱ cuggo̱k li̱ngli̱ngo̱n ci Manyi, eci li̱ngli̱ngo̱ni̱ cunno̱ng ngati Manyi iróng e̱de̱nye̱.