1 Ko̱ri̱nto̱ 12 - Tennet

Arizet ci aanyik Vongizi ci Ta̱mu̱ta̱dde̱no̱ ol wak a̱tu̱we̱

¹ I̱yo̱ko̱ gotonogga ki ngonogga tu̱we̱nta̱, kozozi zoz ci arizet ci aanyyet Vongizi ci Ta̱mu̱ta̱dde̱no̱, korongnyung abunna ming a̱gga̱yyu̱ kaale ne̱ko̱ do̱o̱k.

² A̱gga̱yyu̱ baling ngen niga a̱gga̱c zoz ci Ta̱mu̱ta̱dde̱no̱, alabanung ba̱li̱ye̱ lo̱rye̱nti̱ i̱ge̱t kar unuwet to̱do̱yyo̱k cik e̱e̱ggi̱n ta̱mu̱ta̱dde̱ne̱t wak adimanai azzine iróng ozozi.

³ Korongi zin ku̱du̱wa̱u̱ng, i̱llo̱i̱ e̱e̱t imma ci ozoz Vongize ci Ta̱mu̱ta̱dde̱no̱ azi ne, “Anyik Ye̱su̱ kotore,” i̱llo̱i̱ zin e̱e̱t imma ci azi ne, “Een Ye̱su̱ Manyi,” Vongiz ci A̱li̱le̱ do̱ niko ci ozoz niko.

⁴ Anyak arizet cik meelek oroot, aanyik Vongizi ci A̱li̱le̱ ol wak a̱tu̱we̱, a̱vvu̱ arizet ne̱ko̱ do̱o̱k Vongize co̱de̱.

⁵ Anyak li̱ngli̱ngo̱no̱k cik aavtte do̱ do̱, a̱vvu̱ ngati Manyi co̱de̱ ṯok.

⁶ Anyak bo̱do̱k ol do̱o̱k li̱ngli̱ngo̱no̱k cik aavtte do̱ do̱, abarik zin Ta̱mu̱ta̱dde̱n co̱de̱ ci aanyik ol ki̱li̱ngli̱nge̱t li̱ngli̱ngo̱no̱k ne̱ke̱ ngati ol do̱o̱k.

⁷ I̱ye̱la̱ Vongizi ci A̱li̱le̱ ele olle do̱o̱k go̱o̱lo̱we̱ cik aavtte do̱ do̱ abunna ming eela nogo do̱o̱k.

⁸ Aanyik Vongizi ci A̱li̱le̱ e̱e̱t doiz ci kar enne kozoz arizet ci obod ki zoz ci genyizo. Okko bo̱do̱k ngati e̱e̱t imma aanyik doiz ci a̱gga̱we̱ zoz ci abunna a̱du̱wa̱k ol.

⁹ Aanyik bo̱do̱k Vongizi ci A̱li̱le̱ ol u̱gge̱ doiz ci tu̱we̱nto̱. Aanyik bo̱do̱k ol u̱gge̱ doiz ci alawek nege ol cik omori Ta̱mu̱ta̱dde̱n kar kubunnta mo̱ri̱zo̱we̱.

¹⁰ Aanyik Vongizi ci A̱li̱le̱ ol u̱gge̱ komiz ci ogone kaal cik a̱vu̱la̱. Aanyik ol u̱gge̱ bo̱do̱k komiz ci uwahek nege ol zoz ci Ta̱mu̱ta̱dde̱no̱ ju̱rru̱m. Okko aanyik ol u̱gge̱ ka̱gga̱c vongiz ci abunna ki vongiz ci gerze. Aanyik ol u̱gge̱ doiz ci ozoze nege u̱tu̱ge̱tti̱ne̱ cik aavtte do̱ do̱, kar kaanyik ol u̱gge̱ doiz ci oobek nege ol u̱nge̱tti̱ cik zo̱zzo̱k ne̱ke̱.

¹¹ E̱e̱ggi̱n ne̱ko̱ do̱o̱k li̱ngli̱ngo̱n ci e̱e̱t co̱de̱ ki Vongiz neci ele, aanyik enne nogo do̱o̱k e̱co̱de̱ e̱co̱de̱ ki ci orong enne.

Ele co̱de̱ ki ngintiginnek meelek giir

¹² A̱gga̱yyu̱, o̱de̱ ele ci e̱e̱t ci diiri ṯok niko, ming adimanai kanyak ngintik meelek giir; ming anyak ngintik meelek nu̱nu̱n, e̱e̱ggi̱n ne̱ke̱ alawo do̱o̱k cik ele co̱de̱. Ogon Ki̱ri̱sto̱ ki i̱yo̱ko̱ ele ko̱.

¹³ Kogon naga bu̱k niko. A̱gga̱mto̱zi̱k ba̱li̱ye̱ ol ba̱ti̱ti̱mo̱ Vongize co̱de̱ ki ele co̱de̱, ming e̱e̱ggi̱nnu̱ Ya̱u̱d icima Gi̱ri̱k, ol cik e̱e̱ggi̱n du̱cca̱k icima ol cik iróng e̱e̱ggi̱n du̱cca̱k. Abarik Vongizi ci Ta̱mu̱ta̱dde̱no̱ a̱gga̱me̱t ba̱ti̱ti̱mo̱ eliye ci Ki̱ri̱sto̱, Vongize co̱de̱. I̱yo̱ko̱ kaude naga do̱o̱k Vongize co̱de̱.

¹⁴ Adimanai ele kanyak ngintik meelek, abarik ngen een ele co̱de̱ ṯok niko.

¹⁵ Ming azi zoci wo̱ye̱ ne, “Eci iróng anna ke̱e̱ni̱ a̱zzi̱t, iróng anna karumena ki ele,” Iróng zin i̱yo̱ko̱ zoci ngen arume ki ele?

¹⁶ Kar ming azi itati ne, “Eci iróng anna ke̱e̱ni̱ e̱be̱re̱c, iróng ke̱e̱ni̱ alawoc ci eliyo,” iróng zin itati engeryai eliya zo̱ze̱ necu?

¹⁷ Ming wo̱ye̱ een ele do̱o̱k e̱be̱re̱c, amuda wo̱ye̱ ele gool ci aziknene nga? Ming ize ele do̱o̱k ci een itat, amuda wo̱ye̱ da̱ ele gi̱i̱ ci ocowe kaal nga?

¹⁸ Abarik zin Ta̱mu̱ta̱dde̱n idiman kaal cik eliyak veelek, adiman do̱o̱k e̱co̱de̱ e̱co̱de̱ go̱o̱le̱ ci oronge enne ele ci e̱e̱to̱ ki̱li̱ngli̱ng.

¹⁹ Ming weda kaale ne̱ko̱ do̱o̱k ketenyce kize o̱to̱ne̱ co̱de̱ ci eliyo, iróng weda een ele de̱de̱.

²⁰ Anyak zin ele ngintik meelek giir, ma̱i̱je̱ ngatu ele o̱de̱ ṯok.

²¹ Iróng wo̱ye̱ e̱be̱re̱ci̱ a̱nne̱k a̱zzi̱t ne, “Iróng anna korongnyin!” Kar wo̱ye̱ oo a̱nne̱k zo̱o̱ ne, “Iróng anna korongnyung!”

²² Abarik ngintik eliyak kacin naga kazi ne iróng okkomi ko̱ nogo cik riilik eliya oroot.

²³ Kar ngintik eliyak wak kacin iróng riilik ko̱, ka̱gga̱m naga nogo ju̱rru̱m. Ma̱i̱je̱ ngintik eliya a̱li̱le̱ ko̱, e̱e̱ggi̱n ngintik abunna riilik oroot.

²⁴ Abunna kazunne nogo kommog ngintik a̱zi̱ze̱ eliya. Adimana Ta̱mu̱ta̱dde̱n kaal cik eliyak do̱o̱k kar kuzute o̱to̱n wa acin enne iróng riili oroot.

²⁵ Iróng wo̱ye̱ ele anyak ngero, abarik aanyik o̱to̱n imma ka̱vvu̱to̱ labak ki kaal cik eliyak do̱o̱k.

²⁶ Ming apirna o̱to̱ni̱ co̱de̱, apirna o̱to̱ do̱o̱k ki nonno, ming atalne o̱to̱ni̱ co̱de̱, atalne o̱to̱ do̱o̱k ki nonno.

²⁷ I̱yo̱ko̱ e̱e̱ggi̱nnu̱ niga ele ci Ki̱ri̱sto̱, e̱e̱ggi̱nnu̱ niga do̱o̱k o̱to̱ cik ele neci.

²⁸ Kar zin ke̱le̱ci̱a̱, atahala arrak Ta̱mu̱ta̱dde̱n to̱ni̱a̱k, ol wak a̱li̱ngli̱ng zoz cinne, kar bo̱do̱k katahala a̱ri̱tto̱k cik zoz cinne, kar bo̱do̱k katahala de̱me̱zzo̱k wak edemez zoz cinne, kar bo̱do̱k katahala ol wak ogon kaal cik a̱vu̱la̱, ki ol wak anyak arizet ci alaweke Ta̱mu̱ta̱dde̱n ol wak omori ki̱zzi̱ morizi to, ki ol wak i̱i̱rke̱ eela ol kaale, ki ol wak anyak arizet ci abale ol, ki ol wak anyak arizet ci a̱gga̱we̱ u̱tu̱ge̱tti̱ cik aavtte do̱ do̱.

²⁹ Iróng ol do̱o̱k e̱e̱ggi̱n to̱ni̱a̱k. Iróng ol do̱o̱k e̱e̱ggi̱n a̱ri̱tto̱k, icima de̱me̱zzo̱k, icima ogon kaal cik a̱vu̱la̱.

³⁰ Anyak ol do̱o̱k arizet ci alawek ol cik omori Ta̱mu̱ta̱dde̱n kubunnta? Anyak ol do̱o̱k arizet ci ozoze u̱tu̱ge̱tti̱ne̱ cik aavtte do̱ do̱? Anyak ol do̱o̱k arizet ci a̱du̱wa̱ne̱ u̱nge̱tti̱ cik zozzak?

³¹ Abarik nege orong arizet ci a̱ppwe̱ oroot. Ki̱ye̱le̱ku̱ng atin gool ci abunna ngatu.