1 Jon 5 - Tennet

U̱tu̱we̱t Ngerrti Ta̱mu̱ta̱dde̱no̱

¹ Ming a̱tu̱ e̱e̱ti̱ imma zoz ci azi ne Ye̱su̱ ci een Ki̱ri̱sto̱, een enne do̱le̱c ci Ta̱mu̱ta̱dde̱no̱. Ming irez e̱e̱ti̱ imma Be̱e̱ti̱nna̱ wa een Ta̱mu̱ta̱dde̱n, irez enne dooli ciginnek bu̱k.

² Ka̱gga̱ zin naga kirez naga dooli cik Ta̱mu̱ta̱dde̱no̱ ke̱te̱: kirez naga nonno kar ki̱li̱ngli̱ngte̱ lo̱ti̱nno̱k ciginnek.

³ I̱ye̱la̱i̱ zin rezinet ci kireze naga Ta̱mu̱ta̱dde̱n go̱o̱le̱ ci ka̱li̱ngli̱nge̱ lo̱ti̱nno̱k ciginnek, iróng lo̱ti̱nno̱wa̱ ne̱ke̱ okkomi,

⁴ eci dooli cik Ta̱mu̱ta̱dde̱no̱ ommog kaal cik lo̱o̱c cu. Kar tu̱we̱ne̱t cinna ci aanyet doiz ci kommoge kaal ne̱ko̱ do̱o̱k.

⁵ I̱llo̱i̱ e̱e̱t imma ci wo̱ye̱ ommog kaal cik gerzek lo̱o̱tu̱ ming iróng enne anyak tu̱we̱ne̱t ci a̱tu̱we̱ enne Ye̱su̱ ci een Ngerrti Ta̱mu̱ta̱dde̱no̱.

⁶ A̱kku̱ Ye̱su̱ Ki̱ri̱sto̱ maame ki bi̱ye̱te̱. Iróng enne a̱kku̱ maame do̱, abarik a̱kku̱ maame ki bi̱ye̱te̱. Okko Vongizi ibbac zoz neci ming een de̱de̱, eci Vongizi i̱ye̱la̱ zoz ci een de̱de̱.

⁷ I̱yo̱ko̱ zin anyak kaal cik e̱e̱ggi̱n i̱i̱yo̱ cik ibbac zoz ci Ki̱ri̱sto̱:

⁸ Vongiz ci A̱li̱le̱ ki maam ki bi̱ye̱ kar zin kaala cik e̱e̱ggi̱n i̱i̱yo̱ ko̱ anyak wowonet.

⁹ Kelemna zin naga zoz ci ibbac ol do̱o̱k, abarik zoz ci ibbac Ta̱mu̱ta̱dde̱n ommog veelek, eci een necu zoz ci ibbace Ta̱mu̱ta̱dde̱n zoz ci Ngerinne.

¹⁰ I̱yo̱ko̱ zin, ming a̱tu̱ e̱e̱ti̱ zoz ci Ngerrti Ta̱mu̱ta̱dde̱no̱, anyak enne zoz ci ibbace enne ko̱ zinine cinne. Imma e̱e̱ti̱ ci iróng elemi zoz ci Ta̱mu̱ta̱dde̱no̱, angany enne Ta̱mu̱ta̱dde̱n azi ne een volongnyoit, eci iróng enne elemi zoz ci ibbace Ta̱mu̱ta̱dde̱n Ngerinne.

¹¹ Een necu zoz ci ibbac Ta̱mu̱ta̱dde̱n ko̱: Aanyet enne agit ruget ci aave udut, a̱kku̱ rugeti neci ngati Ngerinne.

¹² Ming a̱tu̱ e̱e̱ti̱ Ngerinne, anyak enne ruget. Imma ming iróng e̱e̱ti̱ a̱tu̱ Ngerrti Ta̱mu̱ta̱dde̱no̱, iróng enne anyak ruget ci aave udut.

Zoz ci vu̱rrto̱

¹³ Keherakkung anna i̱ge̱t ol wak a̱tu̱yyu̱ zar cik Ngerrti Ta̱mu̱ta̱dde̱no̱ ko̱, kar abunna ming a̱gga̱yyu̱ een rugeti ci aave udut ko̱ cunno̱ng.

¹⁴ Een necu zoz ci karikka naga zi̱nze̱tti̱ Ta̱mu̱ta̱dde̱n: Ming ka̱jji̱na̱ nonno gi̱i̱ imma go̱o̱le̱ ci okko ki zinin cinne, okko enne aanyeta.

¹⁵ Kar ming ka̱gga̱ naga aziknet enne agit odohize ming kala nonno, ka̱gga̱ zin naga de̱de̱ aanyyet atin Ta̱mu̱ta̱dde̱n do̱o̱k kaal cik kala naga ngatinne.

¹⁶ Ming acin e̱e̱ti̱ gooni ci ogon mu̱nye̱n cik wo̱ye̱ iróng anyahak nonno daiz, abunna ming alawek enne nonno Ta̱mu̱ta̱dde̱n kar keela nonno kuruba ruget ci aave udut. Een zoz neci ngati ol wak ogon mu̱nye̱n cik iróng anyaha daiz. Imma mu̱nye̱na̱ cik ogon e̱e̱ti̱ anyaha daiz ko̱, iróng anna kazi ne anyik nonno kala Ta̱mu̱ta̱dde̱n zo̱ze̱ ci mu̱nye̱n cik anyaha daiz ko̱.

¹⁷ E̱e̱ggi̱n kaala cik gerzek ko̱ do̱o̱k mu̱nye̱n. Ma̱i̱je̱ ngatu iróng mu̱nye̱na̱ do̱o̱k anyaha daiz.

¹⁸ Ka̱gga̱ naga do̱o̱k iróng dooli cik Ta̱mu̱ta̱dde̱no̱ aalna zo̱ze̱ ci ogone mu̱nye̱n odohize; eci Ngerrti Ta̱mu̱ta̱dde̱no̱ azunne nogo, iróng zin lo̱rye̱nti̱ ogonik nogo gi̱i̱ ci gerze.

¹⁹ Ka̱gga̱ naga niko ming ke̱e̱ggi̱n naga dooli cik Ta̱mu̱ta̱dde̱no̱, imma lo̱rye̱nti̱ abal ol wak lo̱o̱tu̱ iróng a̱gga̱ Ta̱mu̱ta̱dde̱n ko̱ do̱o̱k.

²⁰ Ka̱gga̱ naga do̱o̱k a̱kku̱ Ngerrti Ta̱mu̱ta̱dde̱no̱ lo̱o̱c kar ki̱ki̱ya̱ kaanyyet gool ci een de̱de̱ ka̱gga̱we̱ Manyi wa een de̱de̱. Karume zin naga ki nonno, ki bo̱do̱k Ngerinne Ye̱su̱ Ki̱ri̱sto̱, Manyi wa een de̱de̱ ki ruget ci aave udut.

²¹ I̱yo̱ko̱ zin, dooli cigannik zinino, u̱zu̱tte̱ e̱le̱tti̱ cuggo̱k to̱do̱yo̱we̱ cik e̱e̱ggi̱n ta̱mu̱ta̱dde̱ne̱t wak adimanai azzine.