1 Jon 3 - Tennet

Ke̱e̱ggi̱nna̱ naga dooli cik Ta̱mu̱ta̱dde̱no̱

¹ A̱ppwa̱ rezinet ci irezet Baba oroot, awuyet zin ol agit kizetta dooli cik Ta̱mu̱ta̱dde̱no̱, ke̱e̱ggi̱n naga dooli cik Ta̱mu̱ta̱dde̱no̱ de̱de̱. Kar zin zoz ci iróng olli lo̱o̱tu̱ a̱gga̱yye̱t ko̱ icu, iróng nege a̱gga̱ nonno.

² Gonogga wak zinino, ke̱e̱ggi̱n naga de̱de̱ dooli cik Ta̱mu̱ta̱dde̱no̱, iróng naga ka̱gga̱ ogon e̱le̱tti̱ cigga̱c ku̱. Abarik ka̱gga̱ atin naga e̱le̱tti̱ cigga̱c kogon naga ki i̱yo̱ko̱ Ki̱ri̱sto̱ ko̱, ming okko enne obodak lo̱o̱c, eci kacin atin naga nonno de̱de̱.

³ Imma e̱e̱ti̱ ci arike zinin zoz ci Ki̱ri̱sto̱, adiman ele cinne ki̱li̱li̱, ki i̱yo̱ko̱ Ki̱ri̱sto̱ ming a̱li̱le̱ ko̱.

⁴ Imma e̱e̱ti̱ ci ogon mu̱nye̱n, u̱du̱l enne lo̱ti̱nno̱k cik Ta̱mu̱ta̱dde̱no̱, eci e̱e̱ti̱ ci ogon mu̱nye̱n abure lo̱ti̱nno̱k cik Ta̱mu̱ta̱dde̱no̱.

⁵ A̱gga̱yyu̱ niga a̱kku̱ Ki̱ri̱sto̱ kar ki̱ki̱ya̱ kaara mu̱nye̱n cigga̱c, iróng enne eliya anyak mu̱nye̱n udut.

⁶ Imma e̱e̱ti̱ ci annu nonno, iróng ogon mu̱nye̱n. Imma e̱e̱ti̱ ci ogon mu̱nye̱n ko̱, iróng acin nonno icima iróng a̱gga̱ nonno udut.

⁷ Niga dooli wagannik tu̱we̱nta̱, ma anyikku e̱e̱t imma kalabaung ki̱ti̱ku̱ng tu̱. Okko e̱e̱ti̱ ci ogon kaal cik abunna, een enne e̱e̱t ci abunna ki i̱yo̱ko̱ Ki̱ri̱sto̱ ming abunna ko̱.

⁸ Imma e̱e̱ti̱ ci ogon mu̱nye̱n ko̱, een enne e̱e̱t ci lo̱rye̱nto̱, eci lo̱rye̱nti̱ u̱tu̱gu̱ mu̱nye̱n arrak oowa kanante ci lo̱o̱tu̱. A̱kku̱ zin Ngerrti Ta̱mu̱ta̱dde̱no̱ kar ki̱ki̱ya̱ kidita li̱ngli̱ngo̱n ci lo̱rye̱nto̱.

⁹ I̱llo̱i̱ e̱e̱t imma ci een do̱le̱c ci Ta̱mu̱ta̱dde̱no̱ ci ogon mu̱nye̱n. Iróng enne uule kar ku̱tu̱gu̱ mu̱nye̱n, eci Ta̱mu̱ta̱dde̱n ci a̱rri̱ta̱ nonno.

¹⁰ Een zin necu gool ci ka̱gga̱we̱ naga dooli cik Ta̱mu̱ta̱dde̱no̱ ki dooli cik lo̱rye̱nta̱k. Ming ogon e̱e̱ti̱ imma gi̱i̱ ci gerze, icima iróng irez gotoni, iróng enne een do̱le̱c ci Ta̱mu̱ta̱dde̱no̱.

Irezit e̱le̱tti̱ cuggo̱k do̱o̱k

¹¹ Een necu kaviyak cik iziktu niga arrak ba̱li̱ye̱ oowa. Azi ne, abunna kirezo naga do̱o̱k e̱le̱tti̱.

¹² Ma ogonnu ki bali Kaini, abak baiz ci lo̱rye̱nto̱ kar ku̱ru̱k gotoni ka̱da̱k. Nya ming amuny enne gotoni ko̱? Amuny enne gotoni eci baizi cinne gerza, imma gotoniya ogon kaal cik abunna.

¹³ Gotonogga tu̱we̱nta̱, ma a̱ku̱le̱kku̱ je̱e̱n, ming amarinnung ol cik lo̱o̱tu̱.

¹⁴ Ka̱gga̱ kiyokta naga daiza, kar ki̱vi̱ta̱k ruget wa aave udut, eci kirez naga gotonogget tu̱we̱nta̱. Imma e̱e̱ti̱ ci iróng irez ol, ngen enne erahek daiza.

¹⁵ Ming amarine e̱e̱ti̱ imma gotoni, een enne e̱e̱t ci a̱ru̱k ol, a̱gga̱yyu̱ niga iróng e̱e̱ti̱ ci a̱ru̱k ol ko̱ amuda baiz wa aave udut.

¹⁶ Gool zin ci ka̱gga̱we̱ naga rezinet ci een de̱de̱ ko̱ necu: A̱da̱i̱ Ye̱su̱ Ki̱ri̱sto̱ zo̱ze̱ cinna. Abunna zin naga bu̱k baize cinna ming ka̱da̱i̱ zo̱ze̱ ci gotonogget ki ngonogget tu̱we̱nta̱.

¹⁷ Ming anyak e̱e̱ti̱ kaal cik meelek, kar kicin gooni imma ci amati, kar iróng enne eela nonno, aave wo̱ye̱ rezinet ci Ta̱mu̱ta̱dde̱no̱ ngatinne ku̱?

¹⁸ Niga dooli wagannik tu̱we̱nta̱, abunna kirez ol rezinet ci een de̱de̱ ngati kogonne kaal cik abunna baize cinna, iróng een zoza utuga.

¹⁹ Ming kirez naga ol u̱gge̱, ka̱gga̱ naga niko kaavtte naga zo̱ze̱ ci een de̱de̱, kar zi̱nze̱tti̱ cigga̱c ka̱vvu̱to̱ lo̱o̱ta̱ ki nonno,

²⁰ ma̱i̱je̱ ming anganyet gi̱i̱ co̱de̱ zinina. A̱ddi̱ki̱re̱ Ta̱mu̱ta̱dde̱n kommog zi̱nze̱tti̱ cigga̱c, a̱gga̱ enne kaal do̱o̱k cik ki̱no̱n naga.

²¹ Gonogga wak zinino, ming iróng zi̱nze̱tti̱ cigga̱c anganyet mu̱nye̱ne̱, kanyak naga doiz ci kojongoze Ta̱mu̱ta̱dde̱n,

²² kar kurubta kaal do̱o̱k cik ka̱jji̱n naga ngatinne, eci naga kazunne lo̱ti̱nno̱k ciginnek kar ku̱tu̱gu̱z kaal cik orong enne.

²³ Een zin necu ti̱lo̱wi̱ne̱t cinne: Abunna ka̱tu̱we̱ zare cik Ngerinne Ye̱su̱ Ki̱ri̱sto̱, kar kirezit e̱le̱tti̱ cigga̱c do̱o̱k ki bali u̱du̱wa̱e̱t enne agit ke̱.

²⁴ Ming ko̱ngo̱o̱le̱ naga lo̱ti̱nno̱k cik Ta̱mu̱ta̱dde̱no̱, kaavtte naga ki nonno zi̱nze̱tti̱nne̱, okko enne aave ki agit bu̱k. Kovvo naga ka̱gga̱ aave enne ngatinna Vongize bali aanyet enne agit ke̱.