1 Jon 2 - Tennet

Eelawet Ki̱ri̱sto̱

¹ Niga dooli cigannik tu̱we̱nta̱, keherakkung i̱ge̱t zoz cu kar abunna atin iróng ogonnu mu̱nye̱n. Ming u̱tu̱gu̱ e̱e̱ti̱ imma mu̱nye̱n, kanyak naga Ye̱su̱ Ki̱ri̱sto̱ E̱e̱t wa Abunna O̱de̱ een zoc cinna ozozek Baatinne zoz cinna.

² Ogon enne ki wawaci mu̱nye̱ne̱ cigga̱c. Iróng een wawac cinna do̱, abarik nonno ci een wawac ci olli lo̱o̱tu̱ do̱o̱k.

³ Ming kazunne naga lo̱ti̱nno̱k ciginnek, i̱ye̱la̱ zoz necu azi ne, ka̱gga̱ naga nonno de̱de̱.

⁴ Ming azi e̱e̱ti̱ ne, “Ka̱gga̱ enne nonno,” ma̱i̱je̱ ngatu iróng a̱li̱ngli̱nge̱ lo̱ti̱nno̱k ciginnek, een enne volongnyoit, i̱llo̱i̱ zoz ci een de̱de̱ ngatinne.

⁵ Ma̱i̱je̱ e̱e̱ti̱ ci azunne zoz ci Ta̱mu̱ta̱dde̱no̱, okko rezinet ci Ta̱mu̱ta̱dde̱no̱ aave baize cinne do̱o̱k de̱de̱. Kar zin go̱o̱le̱ necu ka̱gga̱ ke̱e̱ggi̱n naga olli Ta̱mu̱ta̱dde̱no̱.

⁶ Ming azi e̱e̱ti̱ ne kabai zo̱ze̱ cinne, abunna ming abak ki bali Ye̱su̱ Ki̱ri̱sto̱ ke̱.

Ti̱lo̱wi̱ne̱t ci een jor

⁷ Gonogga wak zinino, iróng anna keherakkung ti̱lo̱wi̱ne̱t ci een jor, een ci reeni, iziktu niga ti̱lo̱wi̱ne̱t necu ba̱li̱ye̱.

⁸ Ngen zin keherakkung ti̱lo̱wi̱ne̱t ci een jor; i̱ye̱la̱i̱ zoz cinne de̱de̱ ngati Ki̱ri̱sto̱ ki i̱ge̱ta̱, i̱llo̱i̱ mu̱hu̱ri̱te̱n udut, enyerkai tukuleci ci een de̱de̱.

⁹ Imma e̱e̱ti̱ ci azi ne, kaave enne vooritena ma̱i̱je̱ ngatu amarine gotoni, ngen enne ogon ki e̱e̱ti̱ wa aave mu̱hu̱ra̱ niko.

¹⁰ Imma e̱e̱ti̱ ci irez gotoni, abak enne vooritena. I̱llo̱i̱ zin gi̱i̱ ci gerze adir nonno.

¹¹ Imma e̱e̱ti̱ ci amarine gotoni, aave enne mu̱hu̱ra̱to̱ kar koto ngati mu̱hu̱ri̱. Iróng enne a̱gga̱ nginti okkoye enne, eci mu̱hu̱ri̱ u̱bu̱ng ebere ciginnek.

¹² Dooli wagannik tu̱we̱nta̱, keherakkung anna i̱ge̱ta̱ eci Ta̱mu̱ta̱dde̱n i̱ti̱vi̱la̱ mu̱nye̱n cuggo̱k zo̱ze̱ ci zar cik Ki̱ri̱sto̱.

¹³ Niga be̱e̱ti̱ga̱ni̱k, keherakkung anna i̱ge̱t zoz cu, eci niga a̱gga̱yyu̱ nonno ci bali aave kanante ci lo̱o̱tu̱ ki ci ta̱mu̱-kengo. Niga logoz, keherakkung anna i̱ge̱t zoz cu, eci ommogtu niga lo̱rye̱ni̱t. Niga dooli, keherakkung anna i̱ge̱t zoz cu, eci niga a̱gga̱yyu̱ Ta̱mu̱ta̱dde̱n Baba.

¹⁴ Niga be̱e̱ti̱ga̱ni̱k, keherakkung anna i̱ge̱t zoz cu, eci niga a̱gga̱yyu̱ aave enne kanante ci lo̱o̱tu̱. Keherakkung zin anna i̱ge̱ta̱ bo̱do̱k logoz zoz cu, eci okkomnu niga, kar zoz ci Ta̱mu̱ta̱dde̱no̱ kabak ngatinno̱ng, kar bo̱do̱k niga ommogtu lo̱rye̱ni̱t.

Ma irezzu kaal cik lo̱o̱tu̱

¹⁵ Ma irezzu zoz ci lo̱o̱tu̱ ki kaal ciginnek veelek. Imma e̱e̱ti̱ ci irez kaal cik lo̱o̱tu̱, iróng enne irez Be̱e̱ti̱nna̱ wa een Ta̱mu̱ta̱dde̱n.

¹⁶ A̱kku̱ zoz ci kodonge naga e̱le̱tti̱ ko̱ lo̱o̱ta̱ ngatu, ki zoz ci kamanik naga kaal ki zoz ci koronge naga kaal do̱o̱k cik kacin naga eberene. Iróng baizi ci ogon niko ko̱ a̱kku̱ ngati Baba.

¹⁷ Okko looci ki baiz ci ogon niko ko̱ a̱zze̱ ne dakdak, ma̱i̱je̱ e̱e̱ti̱ ci a̱li̱ngli̱ng zoz ci Ta̱mu̱ta̱dde̱no̱ abak udut.

Mo̱ddo̱ cik Ki̱ri̱sto̱

¹⁸ Izikto niga dooli wagannik tu̱we̱nta̱, i̱ki̱ya̱ ṯurnenet ci lo̱o̱tu̱. Iziktu niga ba̱li̱ye̱ zoz ci azi ne, a̱kku̱ atin mo̱dde̱nti̱ ci amarine Ki̱ri̱sto̱. I̱yo̱ko̱ zin i̱ye̱ltta̱i̱ mo̱ddo̱ cik Ki̱ri̱sto̱ cik meelek. Imma zin zo̱ze̱ neci ka̱gga̱ i̱ki̱ya̱ ṯurnenet ci lo̱o̱tu̱.

¹⁹ Engertta ol ne̱ke̱ e̱le̱tti̱ cigge̱k, iróng nege e̱e̱ggi̱n ol cigga̱c. Ming e̱e̱ggi̱n nege ol cigga̱c de̱de̱, aavtte weda ki agita. Abarik engerttai nege ngatinna, i̱llo̱i̱ rok e̱e̱t co̱de̱ ci kaavtte bu̱k.

²⁰ Ma̱i̱je̱ niga a̱ma̱yu̱ng E̱e̱ti̱ wa A̱li̱le̱ O̱de̱ Ṯok, a̱gga̱yyu̱ zin niga do̱o̱k zoz ci een de̱de̱.

²¹ Keherakkung zin anna zoz cu, iróng een zo̱ze̱ ci ibbezzu niga zoz ci een de̱de̱, abarik eci niga a̱gga̱yyu̱ zoz ci een volong, i̱llo̱i̱ zoz ci een de̱de̱ ci a̱kku̱ nginati.

²² Ming aave e̱e̱ti̱ ci een volongnyoit, een e̱e̱t ci azi ne iróng Ye̱su̱ een Ki̱ri̱sto̱. Een e̱e̱ti̱ necu mo̱dde̱ni̱t ci Ki̱ri̱sto̱ ci abure Baatinne ki Ngerinne.

²³ Ming abure e̱e̱ti̱ Ngerinne, abure enne Baatinne bu̱k. Ming elemi e̱e̱ti̱ Ngerinne, elemi enne Baatinne bu̱k.

²⁴ Imma niga, anyik zoz bali iziktu niga oowa ke̱ ka̱vvu̱ ngatinno̱ng. Ming a̱vvu̱ zoz bali iziktu niga arrak oowa ke̱ ngatinno̱ng, aavtiyyu zin niga bu̱k ngati Ngerinne ki Baatinne.

²⁵ Een necu zoz ci u̱du̱wa̱e̱t enne agita: ruget ci aave udut.

²⁶ Keherakkung zin anna i̱ge̱t zoz necu, akati ol wak a̱ti̱kku̱ng tu̱.

²⁷ Imma ngatinno̱ng, erahek Vongizi ci A̱li̱le̱ bali amudannu niga ngati Ki̱ri̱sto̱ ke̱ ki i̱ge̱ta̱. Iróng niga ngen orongnyu e̱e̱t imma kedemezung eci edemezung atin Vongizi ci A̱li̱le̱ kaal do̱o̱k. Eci enne een zoz ci een de̱de̱, i̱llo̱i̱ volong ngatinne, ki baling edemezung Vongizi ko̱, a̱vvu̱t zin nga̱to̱de̱ ki Ki̱ri̱sto̱.

Dooli cik Ta̱mu̱ta̱dde̱no̱

²⁸ Dooli wagannik tu̱we̱nta̱, urumet zi̱nze̱tti̱ ciggo̱k nga̱to̱de̱ ki Ki̱ri̱sto̱. Kar ming okko enne obodak lo̱o̱c, karike naga nonno zi̱nze̱tti̱ de̱de̱, iróng atin a̱li̱ya̱ni̱ adaketa.

²⁹ Ming a̱gga̱yyu̱ niga de̱de̱ een Ki̱ri̱sto̱ e̱e̱t ci ogon kaal cik abunna, a̱gga̱c zin niko een e̱e̱ti̱ ci ogon kaal cik abunna ko̱ do̱le̱c ci Ta̱mu̱ta̱dde̱no̱.