Yuda 1 - AKITUTUKET NAKITETET (NEPEPEKA ISABULIN KA AWARAGASIA)

¹ Alomun kamaka Yuda, ekejaanakinan ka Yesu Kristo, onac keng' ka Yakobo. Namaka ng'ulu kalu kedau Akuju anyaraun, lu iboyete kotoma amina ka Akuju Papa bobo igwaikite kojokan Yesu Kristo.

² Kiyatakin akitim, aipuc, nepepe ka amina kama kus.

Lukesisianakinak luka aliokonu

³ Luminan kang' ajii eong' akigirakin osi kuju ka alakuno na imorete oni, na anyuna eong' ebe ekotokina akigirakin osi atipet kanuka akisicat osi itawon akitolosite ka akiyuun na abu Akuju kolemik itung'a keng' katipe bon.

⁴ Naarai itung'a lu mam keyong'ito Akuju alomata kokipone kalo mam kejena kiding' wok, itung'a lu emunauto akirot naka asianut ka Akuju wok kanuka akitolot ka irotin kes lukarokok, bobo ka aking'ere Yesu Kristo lo erait nesi bon Ejakait nepepe ka Lokapolon wok. Kedauto agirasia nukalaunak sek adwarun kuju ka atubokino kana adautu kesi adumun.

⁵ Atikere kijenete osi nu kere, akote eong' akisitokin osi ekipone lo alakuna Lokapolon itung'a luko Israel alomun ko Misiri, konye kokau abu nesi komudia ng'ulu lu amam abutu kiyuutu.

⁶ Ayene Akuju imalaikan lu abutu kong'eroto akilesikin ka icolong'o kes luka akipuga. Ayeni kesi kotoma akirionus kinyororon kaluka ikaru kere tetere etubokino kesi ka apaaran kanakapolon.

⁷ Kiitutu Sodoma ka Gomora, nepepe ka ireria lu edunyatatara; lu abutu itung'a kes kisomata kwape ka imalaikan kang'ulu; kisomaete adoteu nepepe ka iboro ice lu mam kecamakina ka ekisili. Icanakinosi kesi ican luka akicweo ka akimi na emam esial, erait akikwenyaret kotung'a kere.

⁸ Kokipone kalope kang'olo, ejaasi itung'a luka eruja lo emunauni awate kes, itamamuuto kesi apedor ka Akuju, ka akirata iboro luka akibusesu luko kuju.

⁹ Atikere emalaikat de Mikael lokapolon amam esomate nu. Kotoma apega keng' ka Asatanit, epegasi kesi kuju kani eyari akwana ka Musa, mam Mikael abu kotamak atubokin Asatanit ka akiro kanuka akirat. Konye abu nesi kotema ebe, “Kiretak Lokapolon ijo!”

¹⁰ Konye itung'a lu elomikinete ka akirat ng'ini ibore ni mam kesi kejenete, ka iboro ng'ulu lu ebunete kesi ajenun along'u, bala ityeng' luko okitwi, nes iboro lupeng'ulu lu edaunete kesi.

¹¹ Ikoni eronaari kama kes ai! Atupata kesi eroto lo abu Kain kotup. Kanuka amina ikabel alomata kesi aronus na esomate Balaam. Ang'eroto kesi kwape keng'eria Korah, bobo kwape keng' emudiaro kesi.

¹² Na enyemiata itung'a luka osi kopucin kus luka akiitunun amina ka Lokapolon, eputosi kesi ka amoru nukarokok kotoma akipi nu ebeikinete akitogwo osi. Eputosi kesi ka idowono lu ekutarit ekuwam lu mam keyaunete akiru. Eputosi kesi ka ikito lu emam akwii apaarasia nuka akamu. Bobo mam kiraikinete araito.

¹³ Eputosi kesi ka ikokoron luka akare, lu itoduto asomisio kes nu emam asilut elemete ekuyetete. Eputosi ka akanyere nu ireonorosi, nu kedau Akuju akiguwaikin alaro ikaru kere kama ejii akirionus na epolo noi.

¹⁴ Arait Enok loka auri ka Adamu naka ikanyet kaare, lo kokolong'o sek abu kodwaru kuju kes: “Ebuni Lokapolon ka aritai ka imalaikan lukalaunak

¹⁵ ayaun atubokino namaka ka itung'a kere, akitisilar kesi kere ka asoma nu mam keraito nuka Akuju nepepe ka akiro kere nukarokok nu inerito kesi luka arokusio nuka aking'ere nesi!”

¹⁶ Ing'urung'urasi itung'a lu ng'in pak ka amonya luce, isomaete kesi nukarokok nu ekotosi kesi; ipogasi kesi ikulopek, ka akitamaa luce naka esoswai kanuka adumun nu ekotosi kesi.

Akikwenyareta ka akicorasia

¹⁷ Konye kiitutu, ipoupatin kang', nu abutu ikiyakia ka Lokapolon wok Yesu Kristo kotemasi kokau.

¹⁸ Abutu kesi kolimokisi osi, “Ka apaarasia kanuka esial, ejaikinosi itung'a lu ekwenare osi, kotupitete ejautene kes lo mam kecoit Akuju.”

¹⁹ Itung'a lu nes eyaunete atyakatyaka, lu eyaito akote ka awate kes, lu mam kejaasi ka Emoyo.

²⁰ Konye osi ipoupatin kang' kitolositete akigang'anari kotoma akiyuuni kus nakalaunan cut. Kilipete kotoma apedor naka Emoyo Lokalaunan;

²¹ kiboete osi ikulopek kotoma amina ka Akuju, idarito osi Lokapolon wok Yesu Kristo kotoma asyanut keng' ainakin osi akijar na emam esial.

²² Kitodikisi asyanut ng'ulu lu ebuonokinete;

²³ kiyuutu ice kotoma akimi; bobo namaka ice kitodikisi asyanutu imorikikina ka akurianu, konye koding'akinos ka inapen kes, lu eng'urito arokusio nuka akote ka akwan.

Akilip naka akitur

²⁴ Nama keng' lo ebeikini akidar ijo tetere emam ijo kibirori, kosodi ayaun ijo emam aronus ka ayauni ijo kalakara akibusesu na ejii nesi,

²⁵ nama ka Akuju lo bon loketajaran wok, kotoma Yesu Kristo Lokapolon wok, kojii akibusesu, agogong' nepepe ka apedor, alomuni ikaru kere lu atuborosi, bobo kipokona, kiton ikaru kere! Ikote nepeneni.