Yokana 9 - AKITUTUKET NAKITETET (NEPEPEKA ISABULIN KA AWARAGASIA)

Itang'aleuni Yesu Etwan Lokidoute erait Emuduki

¹ Na atuborere Yesu, abu nesi koanyu etwan lokidoute emudukana.

² King'siete ikesisiak keng' nesi ebe, “Rabi, etwan lo isomate arokusio kere lukauriak keng' tetere idouno nesi emudukana?”

³ Kinyakuni Yesu ebe, “Mere ebe kisomate etwan lo arokusio, kere de lukauriak keng', konye kisomakinosi nu tetere asomisio ka Akuju itodiarosi kama keng'.

⁴ Kibusakinit oni aswam asomisio nuka ng'oli kalo kijukuuni eong' ering'a erait paran. Edoluut akware na emamare itwan ipede kepedori asoma.

⁵ Aring'a eong' ajii toma akwap, arait eong' acaus naka akwap.”

⁶ Kedau nesi atemar nu, kimwakini nesi akimwala kwap, kosubuni adwata naka akimwala, kosodi ajukokin adwat akonyen nuka emuduki,

⁷ kolimokini nesi ebe, “Koloto, kilota kagwal kanako Siloam (apolou keng' erait ebe Ni Ijukarite).” Koikari nesi, kilotari kobong'uni nesi itee.

⁸ Kosodete ipadukotin keng' nepepe kalu kaanyuto nesi sek erait lo kilipanar atemar ebe, “Mere lo nes etwan lo eboenenee sek ilipanar?”

⁹ Kotemarete ice ebe, “Erait nesi.” Ice kotemarete ebe, “Mam, konye eputosi ka nesi.” Kotemari lo amudukana sek ebe, “Erait eong'.”

¹⁰ King'isete kesi nesi ebe, “Konye kikote akonyen kon eng'arosi ai?”

¹¹ Kinyakuni nesi ebala ebe, “Etwan lo enyarite Yesu nes asuduni adwat kinyonyoikini akonyen kang' kolimokini eong' ebe, ‘Koloto Siloam kilota. Kasodi eong' alosite, kelotari eong', kadumuni eong' apedor naka akitere.’”

¹² King'isete kesi nesi ebe, “Ai ejii nesi?”. Kinyakakini nesi kesi ebe, “Mam eong' kajeni.”

Eng'icito Ifarisayon akitang'aleuno

¹³ Koyaunete kesi nama ka Ifarisayon etwan lokerait sek emuduki.

¹⁴ Kerait apaaran naka esabato apaaran nakesuduna Yesu adwat kang'aar akonyen keng'.

¹⁵ King'isete Ifarisayon bobo nesi ekipone lokedumuna nesi apedor naka akitere. Kolimokini nesi kesi ebe, “Abu nesi kipiaki adwat akonyen kang', kelotari eong', kanuka ng'un kipokona etee eong'.”

¹⁶ Kotemarete Ifarisayon ice ebe, “Mam etwan lo kelomuut kamaka Akuju, naarai mam nesi kericit apaaran naka esabato.” Konye kotemarete ice ebe, “Koni ebeikina itwan nika arokusio asoma aumosia nu?” Ajii epegete kiding' kes.

¹⁷ King'isete Ifarisayon bobo etwan lo amudukana ebe, “Inyena ibala ijo kuju keng', keng'a bere nesi akonyen kon?” Kotemari nesi ebe, “Erait nesi ekadwaran.”

¹⁸ Mam Iyaudin abutu kiyuutu ebe kemudukana nesi sek bobo ebe itee nesi kipokona, akitodol nakenyaraunata kesi lukauriak luka etwan kalo kebuutu akonyen keng' kong'aarosi.

¹⁹ King'isete kesi lukauriak keng' ebe, “Erait lo okoku kus, lo ibalasi osi ebe kidouno emudukana? Koni bo itaa nesi kipokona?”

²⁰ Kinyakunete lukauriak keng' ebe, “Kijenete siong' ebe erait lo okoku kosi, edouno nesi emudukana.

²¹ Konye ikamuut ekipone lo itaa nesi kipokona, mam siong' kijenete. Bobo mam siong' kijenete nikeng'aari akonyen keng'. King'itata nesi. Epolo nesi, kiner elope.”

²² Ketemarete lukauriak keng' kong'in naarai kekuriaka kesi Iyaudin, naarai ketiakuuto Iyaudin ebe kecamu itwan kere ebe nesi erait Kristo, ireng'iaro ko osinagogi.

²³ Kanuka ng'un kotemarete lukauriak keng', “Epolo nesi, king'itata nesi.”

²⁴ Kosodete kesi akiworoun nakiyareit etwan lokidoute emudukana. Kolimokinete nesi ebe, “Kitur Akuju. Ijenete siong' ebe erait etwan lo loka arokusio.”

²⁵ Kinyakuni nesi ebe, “Ati keraiti nesi lokarokusio, mam eong' kajeni ng'unu. Ibore ipe ni ajeni eong' erait ebe amudukana eong' sek, konye kipokona etee eong'.”

²⁶ King'isete kesi nesi ebe, “Inyena kisomakini nesi ijo? Koni keng'aara nesi akonyen kon?”

²⁷ Kinyakakini nesi kesi ebe, “Adau eong' alimokin osi konye mam osi kipupete. Inyo ikototore osi akiirar bobo? Ikotosi osi de araun ikesisiak keng'?”

²⁸ Koratunete kesi nesi ebalasi ebe, “Irait ijo ekesisian keng', konye siong' kiraasi ikesisiak ka Musa.

²⁹ Ijenete siong' ebe enerata Akuju ka Musa, konye ikamuut etwan lo, mam siong' kijenete nama elomuuter nesi.”

³⁰ Kinyakuni etwan ebe, “Inyo, erait na aumosit! Mam osi kijenete nama elomuuter nesi, konye ang'a nesi akonyen kang'.

³¹ Kijenete siong' ebe mam Akuju kiiranari lukarokusio, konye itamae itwan kere Akuju, kisomae nu ekote nesi, iirari Akuju nesi.

³² Ape kageunet ka akwap, mam kiirarite ebe kebu itwan ipede kong'a akonyen nuka etwan kalokidoute emudukana.

³³ Kere kemam etwan lo kelomuut kamaka Akuju, tin emam kepedori asoma ibore ipede.”

³⁴ Kinyakakinete kesi nesi ebe, “Edouno ijo kotoma arokusio nu ipuaka, ibeikiit ijo akisisianakin siong'?” Kosodete kesi akireng'iar nesi king'a.

Amudukanut naka Akiyuun

³⁵ Kebu Yesu kiira ebe kebuutu kesi kireng'iasi nesi king'a. Nape kedumuna Yesu nesi, king'isi nesi ebe, “Iyuuti ijo Okoku ka Etwan?.”

³⁶ Kinyakuni etwan ebe, “Ng'ai nesi, Lokapolon, tetere eyuuni eong' nesi?”

³⁷ Kolimokini Yesu nesi ebe, “Idau ijo anyun nesi, nesi nes lo inerasi ka ijo.”

³⁸ Kotemari nesi ebe, “Lokapolon, eyuut eong'.” Kogeyari nesi akijaanakin Yesu.

³⁹ Kotemari Yesu ebe, “Kanuka atubonokin nes abunia eong' toma akwap na, tetere ng'ulu lu emam kiteete anyunete, bobo ng'ulu lu ekwenyete eraunete lu emudukaka.”

⁴⁰ Kiirarete Ifarisayon ice lukidunyasi ka nesi nu, king'isete kesi nesi ebe, “Imudukaka siong' de?”

⁴¹ Kinyakakini Yesu kesi ebe, “Kere kimudukaka osi, ti osi emam arokusio. Konye kanu ibalatatare osi ebe, ‘Kikwenyete siong',’ ideunosi arokusio kus.”