Yokana 8 - AKITUTUKET NAKITETET (NEPEPEKA ISABULIN KA AWARAGASIA)

Aberu na Ekamuno Kadoteu

¹ Konye koikari Yesu Omoru loko Olifeti.

² Taparacu sek abu nesi koloto bobo Otogo ka Akuju, kosodi nesi akiboikin kwap kogeuni nesi akisisianakin kesi.

³ Koyaunete ikesisianakinak kiton Ifarisayon aberu na ekamuute kadoteu, kosodete akitogwo nesi kokiding'

⁴ kolimokinete kesi nesi ebe, “Lokesisianakinan, ekamuno aberu na isomae adoteu.

⁵ Kotoma okisil abu Musa kicoraki siong' akibiribir itwan bala eni kamoru. Inyena ibala ijo kuju keng'?”

⁶ Kelimunete kesi nu kanuka akitama nesi tetere edumunete kesi akirot naka akiwosa nesi. Konye koluri Yesu, kigiri kwap kebokorit keng'.

⁷ Itolosito kesi aking'iting'it nesi, kogwoi Yesu kosodi alimokin kesi ebe, “Kogee ng'in kere kama kus ni emam kejaasi ka aronus akibir nesi kamoru”

⁸ Koluri nesi bobo kwap, kosodi akigir kwap kebokorit keng'.

⁹ Konye nakiirarata kesi kong'in, kogeunete aikanar ipe ipe ageun kamaka ni epoloro cut ka akideun Yesu bon ka aberu egwoi koking'aren keng'.

¹⁰ Kikieuni Yesu akou keng' kuju kosodi aking'it aberu ebala ebe, “Aberu, alu kesi? Emam itwan ipede kamaka lu kitubokiito ijo?”

¹¹ Kinyakuni nesi ebe, “Emam ipede, Lokapolon.” Kotemari Yesu ebe, “Eong' de mam katubokini ijo, koika konye siri kibong'oki asoma arokusio bobo.”

Yesu acaus naka akwap

¹² Kolimokini Yesu kesi bobo ebala ebe, “Araiti eong' acaus naka akwap. Nesi nikatupi eong', mam cut kebuni alosite kakirionus, konye ejaikinosi ka acaus naka akijar.”

¹³ Kosodete Ifarisayon alimokin nesi ebe, “Itejenuuna ijo ilopet bon, mam akitejenuuna kon kerait naka abeite.”

¹⁴ Kinyakuni Yesu ebala ebe, “Karaida ketejenuuna eong' elopet, erait akitejenuuna kang' naka abeite, naarai ajeni eong' nama alomuna eong' kiton nama alosi eong', konye osi mam kijenete nama alomuna eong' kiton nama alosi eong'.

¹⁵ Itubonokinete osi atupa ka akwan, eong' mam katubonokini itwan.

¹⁶ Konye atikere katubonoki eong', erait atubonikin kang' naka abeite, naarai mam kerait eong' bon nes atubonokini, konye eong' nepepe ka nesi lokejukuni eong'.

¹⁷ Kokisil kus igirite ebe akitejenuun naka itung'a kiare erait naka abeite;

¹⁸ etejenuuni eong' elope, konye Papa lokejukuni eong' itejenuuni kuju kang'.”

¹⁹ Kosodete kesi aking'it nesi ebe, “Ai ejii Papa kon?” Kinyakakini Yesu kesi ebe, “Mam osi kijenete eong' karaida Papa kang'; Kere kijenete osi eong' tia osi ijenete Papa kang' de.”

²⁰ Kiner nesi akiro nu kama ing'adanakinere ikabel, isisianakini nesi ko Otogo ka Akuju. Konye amam itwan abu kikamu nesi naarai keroko apak keng' kedolo.

Mam osi kibeikinete alosite nama alosi eong'

²¹ Kolimokini Yesu kesi bobo ebe, “Aikari eong', ibunete osi akote eong' konye itwakete osi kotoma arokusio kus. Nama alosi eong' mam osi kipedorete abunore.”

²² Kosodete Iyaudin atemar ebe, “Emiedakin ca elope, naarai ebala, 'Nama alosi eong' mam osi kipedorete abunore?”

²³ Kolimokini nesi kesi ebe, “Ilomutu osi kokwap, alomuut eong' kokuju. Iraasi osi luka akwap kana, mam eong' karait loka akwap kana.

²⁴ Abu eong' kalimoki osi ebe itwakete osi kotoma arokusio kus. Itwakete osi kotoma arokusio kus kimam osi kiyuunete ebe, arait eong' lo abala eong' arait eong'.”

²⁵ Kosodete kesi aking'it Yesu ebe, “Ng'ai ijo?” Kinyakakini Yesu kesi ebe, “Alimoki eong' osi ape kageunet.

²⁶ Ajaasi eong' ka akiro kanu ipu nu limuna kuju kon bobo kanu tubonokina. Konye nesi lokejukuni eong' erait abeite. Alimonokini eong' akwap nu eira eong' alomun kama keng'.”

²⁷ Amam kesi abutu kojenutu ebe kelimokini Yesu kesi kuju ka Papa.

²⁸ Kanuka ng'un kolimokini Yesu kesi ebe, “Na ikiarata osi Okoku ka Etwan nes ijenunata osi ebe arait eong' nesi, bobo ebe mam eong' kesomae ibore ipede kapedor kang' bon. Konye enera eong' kwape kesisianakina Papa eong'.

²⁹ Nesi lokejukuni eong' ejaasi nepepe ka eong'. Mam nesi kinyekiit eong' bon naarai ng'ini paki esomaenene eong' nu italakaarito nesi.”

³⁰ Itolosit nesi ejori kong'in, abutu itung'a lu ipu kiyuutu nesi.

Ebuni Abeite Alakun ijo

³¹ Kolimokini Yesu Iyaudin lukiyuuto nesi ebe, “Kitupata osi akirot kang', iraito osi teni ikesisiak kang' luka abeite,

³² ijenunete osi abeite, kosodi abeite alakun osi.”

³³ Kinyakakinete kesi nesi ebe, “Araito siong' idwe ka Aburaam, emam cut apak nakiraitotor siong' ijoloi luka itwan kere. Koni ibalare ijo ebe 'Kijalakino osi'?”

³⁴ Kinyakakini Yesu kesi ebe, “Abeite, abeite, kalimokini eong' osi ebe, ng'ini itwan ni isomae arokusio erait ejolot loka arokusio.

³⁵ Mam ejolot kiboe ko otogo ikaru kere, konye okoku ideun ko otogo ikaru kere.

³⁶ Kanuka ng'un, kelacaki Okoku osi, ilacakinosi osi cut.

³⁷ Ajeni eong' ebe iraasi osi auri naka Aburaam. Konye ikotosi osi akiyar eong' naarai mam akirot kang' kedumuut alaro kotoma kus.

³⁸ Enera eong' nu anyu eong' ejaasi ka Papa kang', bobo isomaete osi nu iirasi osi kamaka papa kus.”

³⁹ Kinyakakinete kesi nesi ebalasi ebe, “Aburaam nes papa kosi.” Kolimokini Yesu kesi ebe, “Kere kiraito osi idwe luka Aburaam, tin osi isomaete asomisio nu abu Aburaam kisoma,

⁴⁰ konye kipokona ikotosi osi akiyar eong', etwan lokilimoki osi abeite na abu eong' keira kamaka Akuju. Mam nu keraito nu esomate Aburaam.

⁴¹ Isomaete osi nukisomate papa kus.” Kolimokinete kesi nesi ebe, “Mam siong' kiwurute kadoteu. Ijaasi siong' ka Papa epe, Akuju.”

⁴² Kolimokini Yesu kesi ebe, “Kere keraiti Akuju Papa kus, tin osi iminasi eong', naarai alomuni eong' kamaka Akuju. Amam eong' abuni kapedor kang' konye nesi elope kejukuuni eong'.

⁴³ Inyo imam osi kikamuuteter nu abala eong'? Erait kanu imamare osi kibeikinata atitinyu akiirar akirot kang'?

⁴⁴ Iraasi osi idwe luka papa kus, Asatanit. Bobo nu ikotosi osi erait asoma atupa kanu emina papa kus. Araiti nesi ekaaran ape kageunet. Bobo mam nesi kekote ibore ipede nika abeite naarai emam abeite kotoma keng'. Ing'alae nesi, inera nesi atupa kejautene keng' kelope, naarai erait nesi eliokoi, papa loka aliokonu.

⁴⁵ Konye kanu enerare eong' abeite, mam osi kiyuuto eong'.

⁴⁶ Ng'ai kama kus kewosae eong' kanuka arokusio? Kenere eong' abeite inyo imamare osi kiyuunata eong'?

⁴⁷ Ng'ini ni erait nika Akuju epupi akiro ka Akuju. Atenikina emamare osi kipupiata erait ebe mam osi kiraasi luka Akuju.”

Yesu kiton Aburaam

⁴⁸ Kinyakakinete Iyaudin nesi ebalasi ebe, “Mam siong' kideerete ibalasi siong' ebe irait ijo Esamariat bobo ijaasi ijo keparait lokaronon?”

⁴⁹ Kinyakuni Yesu ebe, “Mam eong' kajaasi keparait lokaronon. Ayong'it eong' Papa kang', konye osi kinwang'ito eong'.

⁵⁰ Konye mam eong' kakote akibusesu kanu kang'. Ejii Ng'oli lo ekote akibusesu, bobo erauni nesi lokatubonokinan.

⁵¹ Abeite, abeite kalimokini eong' osi ebe kericaki itwan kere akirot kang', mam nesi ketwani.”

⁵² Kolimokinete Iyaudin nesi ebe, “Kanuka nu, ijenutu siong' ebe ijaatatar ijo keparait lokaronon. Aburaam abu kotwana, ikadwarak de apotu kotwakata. Konye ibala ijo ebe, ‘Kericaki itwan kere akirot kang', mam cut kiiri atwanare.’

⁵³ Itelekarit ijo papa kosi Aburaam lo abu kotwana? Apotu ikadwarak kotwakata! Ituuti ijo irait ijo ng'ai?”

⁵⁴ Kinyakuni Yesu ebe, “Kainaki eong' elopet akibusesu, emam akibusesu kang' adumunet apede. Papa kang' lo ibalasi osi erait Akuju kus nes einakini eong' akibusesu.

⁵⁵ Konye mam osi kijenuuto nesi. Ajeni eong' nesi. Katema eong' ebe mam eong' kajeni nesi arauni eong' eliokoi kwape kus. Konye ajeni eong' nesi bobo aricit eong' akirot keng'.

⁵⁶ Abu papa kus Aburaam kolelakin kanuka anyun apaaran kang', koanyuni nesi kosodi nesi alakar.”

⁵⁷ Kosodete Iyaudin alimokin nesi ebe, “Keroko bere ijo kidolo ikaru akaisakany, kianyu ijo teni Aburaam?”

⁵⁸ Kolimokini Yesu kesi ebe, “Abeite, abeite, kalimokini eong' osi ebe, eroko Aburaam kejaikina, ajii eong' sek.”

⁵⁹ Kosekunete kesi amor ekotosi akibiribiri Yesu. Konye abu Yesu kong'op, kolomari ko Otogo ka Akuju.