Yokana 6 - AKITUTUKET NAKITETET (NEPEPEKA ISABULIN KA AWARAGASIA)

Itani Yesu Akwap Kitung'a

¹ Kedaunosi ng'un, kebu Yesu kodoka okitala loce loka Akare nako Galilaya na erait Akare nako Tiberia.

² Kosodi akwap ka itung'a akigwap nesi, naarai keanyuto kesi aumosia nu kisomanakini Yesu ng'ulu lukedekasi.

³ Kolosi Yesu kuju moru, kosodi akiboikin nepepe ka lukesisiak keng'.

⁴ Kapuut epucit loka Iyaudin loka Paska.

⁵ Kong'oliari Yesu, koanyuni akwap ka itung'a na epolo noi ebuuti nama keng', kosodi nesi alimokin Filipo ebe, “Ai ibeikitetere oni agwelia inyamen lu ilesikina akitania itung'a lu kere?”

⁶ Kelimuni nesi nu erait akitama Filipo naarai nesi elope kejeni nu kekote nesi asoma.

⁷ Kinyakakini Filipo nesi ebe, “Isiring'in akwatai aare mam kilesikinosi agwela inyamen lu ilesikinosi ng'ini ipe kama kes.”

⁸ Kosodi epe kamaka lukesisiak keng', Anderea onac keng' ka Simon Petro alimokin nesi,

⁹ “Ejii isapat ne ni ejaasi ka imugatin ikany ka ikole iare, konye inyena ng'ulu kotung'a kalu kere.”

¹⁰ Kolimokini Yesu kesi, “Kisiboikisi itung'a kwap.” Kejaasi inya ipu alaro ng'ini. Kosodete ikiliok akiboikin kwap, apiarito bala aritai akany.

¹¹ Kolemuni Yesu imugatin, kedau akiyalamikin, kokorakini ng'ulu lukiboyete; ng'ini itung'anan kwape kekotor, kisomakini nesi ikole de kong'ipe kong'in.

¹² Kedautu kesi akinyam kakimonikin, kolimokini nesi lukesisiak keng' ebe, “Kotukonokisi ararasia nu edeunosi tetere emam ibore ipede ni ecakaro.”

¹³ Kosodete kesi atukonokin ararasia, kilelebete ibukito itomonkaare luka ararasia nuka imugaatin kikany nukideunete lu kenyemito.

¹⁴ Na anyunata itung'a aumosit na kebu Yesu kisoma, kotemarete kesi ebe, “Lo cut nesi ekadwaran, lo ebuut toman akwap!”

¹⁵ Nakejenuna Yesu ebe kekotosi kesi akikamun nesi ka akikurakin nesi araun ejakait, kosodi nesi asiyaar bon moru.

Elosi Yesu kokuju kakipi

¹⁶ Na awaria akwap, kosodete ikesisiak keng' akijesar kwap akare,

¹⁷ Kodokete kesi toma ataker, koikarete Kapernaum. Abu akwap kirionor, bobo aring'a Yesu kebuno nama kes.

¹⁸ Kogeuni akare akinyalun kanu akusia ekuwam lokapolon.

¹⁹ Kedautu kesi elotete loka amailoi bala auni arai awong'on, koanyunete kesi Yesu elosi kakar, apuut ataker. Abutu kesi koriang'utu noi,

²⁰ konye kolimokini Yesu kesi ebe, “Mam akurianu, erait eong'.”

²¹ Kosodete kesi alakari ayaari nesi toma ataker. Kodoli ataker atipet okitolima, alaro na alosiorito kesi.

Ekotosi itung'a Yesu

²² Kapaaran kana atupakini, kosodete itung'a lukideuna kokitala kaloce kaloka akare anyun ebe kejii ataker ape bon neni, bobo kemam Yesu kebu kodok toma ataker nepepe ka lukesisiak keng', konye ebe kebutu lukesisiak keng' koikasi kesi bon.

²³ Abutu atakerin ace alomun ko Tiberias kobutu apus kalaro kana anyemiata kesi emugati kedau Lokapolon akiyalamikin.

²⁴ Na anyunata itung'a ebe kemam Yesu kang'ina nepepe ka ikesisiak keng', abutu kesi ikulopek kodokata toma atakerin alosite Kapernaum, akote Yesu.

Yesu nesi Emugaati loka Akijar

²⁵ Nakedumunata kesi nesi kokitala kaloce kaloka akare, abutu kesi king'itata Yesu ebe, “Rabi, iwori bo kibunia ijo ne?”

²⁶ Kinyakakini Yesu kesi ebe, “Abeite, abeite kalimokini eong' osi ebe, kikotosi osi eong' mere kanu kiyanyuteter osi aumosia, konye kanu inyemiata osi emugati ka akimonikin.

²⁷ Mam apodo kanuka inyamata kalu emunaunosi, konye kopodosi kanuka inyamata kalu emam kemunaunosi ka akijar kana emam kedaun, na einakini osi Okoku ka Etwan; naarai nama keng' nes adau Akuju, Papa akigwaakin acamakinet keng'.”

²⁸ Kosodete kesi aking'it nesi ebe, “Inyena itemokina siong' asoma tetere isomaete siong' asoma nuka Akuju?”

²⁹ Kinyakakini Yesu kesi ebe, “Nu nes aswam nu ekote Akuju osi kisomata: akiyuun osi nesi ng'oli lo kijukuuni nesi.”

³⁰ Kinyakunete kesi ebe, “Inyena aumosit na isomakini ijo tetere anyunete siong' ka akiyuun ijo? Inyena ibore isomakini ijo?

³¹ Kepotu kes ka papa kosi konyamata emana komoding'; kwape iwadikatere ebe, kebu nesi koinak kesi konyamata emugati lokijesun kokuju.”

³² Kolimokini Yesu kesi ebe, “Abeite, abeite, kalimokini eong' osi ebe, mere Musa nes kinakini osi emugati lo ejesuni kokuju. Papa kang' nes kinanakini osi emugati loka abeite alomun kokuju.

³³ Naarai emugati loka Akuju erait ng'oli lo ijesuni kokuju ka ainakin akwap akijar.”

³⁴ Kolimokinete kesi nesi ebe, “Lokapolon, koinanakini siong' emugati lo ng'ini pak.”

³⁵ Kolimokini Yesu kesi ebe, “Arait eong' emugati lo ejaasi ka akijar, ng'ini ni ebuni nama kang', mam kiirari eteng'e. Bobo ng'ini ni iyuuni eong' mam cut akure kaari.

³⁶ Konye abu eong' kalimoki osi ebe iyanyutu osi eong' konye mam osi kiyuuto.

³⁷ Ng'ini kere ni einakini Papa kang' eong', ebuni nama kang'. Bobo ng'ini ni ebuni nama kang', mam eong' kacakari king'a.

³⁸ Naarai ejesun eong' kwap alomun kokuju, mere ebe kanuka asoma ng'unu nu akote eong', konye nu ekote nesi lokejukuni eong',

³⁹ nu nes nu ekote lokejukuni eong', ebe mam kitemokina eong' akitowoli ipede kamaka lu ainaki nesi eong', adepar akitajarun kesi kaparaan kanaka esial.

⁴⁰ Naarai nu nes nu ekote Papa kang', ebe itemokina ng'ini kere ni anyuni Okoku kosodi akiyuun nesi ajaus ka akakijar na emam kedaun. Bobo etajaruni eong' nesi kaparaan kanaka esial.”

⁴¹ Kogeunete Iyaudin aking'urung'ura kuju keng' kanu atemara nesi ebe, “Araiti eong' emugati lo ejesuni kwap alomun kokuju.”

⁴² Kotemarete kesi ebe, “Mere lo Yesu okoku ka Yosef, lo ijenete oni papa keng' kiton toto keng'? Inyo konye ebalare nesi ebe, ‘Abu eong' alomun kokuju?’ ”

⁴³ Kinyakakini Yesu kesi ebe, “Mam aking'urung'ura osi ikulopek.

⁴⁴ Emam itwan ipede ni epedori abunore nama kang' kemam Papa lokejukuun eong' kenyarauti nesi. Bobo etajaruni eong' nesi ka apaaran kanaka esial.

⁴⁵ Igirito lukadwarak ebe, ‘Ebuni Akuju akisisianakin kesi kere.’ Ng'ini kere ni eira ka akisisiaun kamaka Papa ebuni nama kang'.

⁴⁶ Mere ebe anyu itwan ipede Papa adepar nesi lo elomuut kamaka Akuju. Anyu nesi Papa.

⁴⁷ Abeite, abeite, kalimokini eong' osi ebe nesi ni iyuuni ejaasi ka akijar na emam kedaun.

⁴⁸ Araiti eong' emugati loka akijar.

⁴⁹ Kepotu luka asonya kus konyamata emaana komoding', konye abutu kotwakata.

⁵⁰ Lo nes emugati lo ijesun kwap alomun kokuju tetere enyemi itwan komam ketwani.

⁵¹ Arait eong' emugati lo ejari lo ejesun alomun kokuju. Kenyam itwan kijokin emugati lo, ejari nesi ikaru kere. Bobo emugati lo alosi eong' alemun kanuka akijar ka akwap erait akwaan kang'.”

⁵² Kosodete Iyaudin apeganakin kokiding' kes ebalasi ebe, “Koni ebeikina etwan lo ainakin oni akwana keng' akinyam?”

⁵³ Kosodi Yesu alimokin kesi ebe, “Teni, teni kalimokini eong' osi ebe kimam osi kinyemete akwana naka Okoku ka Etwana ka akimata awokot keng', emam osi kijaasi ka akijar kotoma kus,

⁵⁴ nesi ni enyemi akwana kang' ka akimata awokot kang' ejaasi ka akijar na emam kedaun, bobo etajaruni eong' nesi ka apaaran kana kosial.

⁵⁵ Naarai erait akwana kang' inyamen teni, bobo awokot kang' eraito imatan teni.

⁵⁶ Nesi ni enyemi akwana kang' ka akimata awokot kang' ejii toma kang', eong' de ajii toma keng'.

⁵⁷ Kwape kijukuna eong' Papa lo ejari, bobo kajari eong' kanuka Papa, nes ekipone ejaria nesi ng'ini ni enyemi akwaan kang'.

⁵⁸ Lo nes emugati lo ejesun kwap alomun kokuju, mam kerait kwape kalo kenyemete kes ka papa kotwakete. Nesi ni enyemi emugati lo ebuni akijar ikaru kere.”

⁵⁹ Enera nesi akiro nu kotoma osinagogi na esisianakina nesi ko Kapernaum.

Akiro nuka akijar kana emam edung'e

⁶⁰ Nakiirarata ikesisiak keng' lu ipu akiro nu, abutu kotemasi ebe, “Eraito nu akisisianakino nu icasito noi. Ng'ai epupuni nu?”

⁶¹ Konye kejeni Yesu elopet ebe king'urung'urasi ikesisiak keng' kuju kanu kosodi nesi aking'it kesi ebe, “Akirot na nes kiinakini ikotosi osi akinyekin akiyuun kus?

⁶² Abo konye kere kianyuto osi Okoku ka Etwan edokari kuju nama kejii nesi sek?

⁶³ Erait Emoyo nes einananakini akijar, emam adumunet apede kakwana. Akiro nu alimonoki eong' osi eraasi emoyo kiton akijar.

⁶⁴ Konye ejaasi ice kama kus lu emam kiyuuto.” Naarai ape kageunet, kejeni Yesu ebe kes ka ng'ai ng'ulu lu kemam kebuutu kiyuutu, bobo ng'ai ng'ini ni ebilakini nesi ebotet.

⁶⁵ Kotemari nesi ebe, “Na nes atenikina na kalimokiiter eong' osi ebe emam itwan ebeikini abunore nama kang' kemam Papa keinakiit nesi apedor.”

⁶⁶ Kanuka nu, kosodete ikesisiak keng' lu ipu abong'or ka akinyekin aupa ka nesi.

⁶⁷ Kosodi Yesu aking'it itomonkaare ebe, “Ikotosi osi de aikar?”

⁶⁸ Kosodi Simon Petero akinyakakin nesi ebe, “Lokapolon, namaka ng'ai ilosiete siong'? Ijaasi ijo ka akiro nuka akijar naka ikaru kere.

⁶⁹ Iyuutu siong', bobo ajenutu siong' ebe irait ijo Lokalaunan loka Akuju.”

⁷⁰ King'isi Yesu kesi ebe, “Kemam eong' kaseut osi, itomonkaare, konye ipe kama kus arau Asatanit?”

⁷¹ Enera nesi kuju ka Yudas, okoku ka Simon Iskariot. Naarai Yudas nes alosi agwelar nesi, konye arait nesi epe kamaka ikesisiak kitomonkaare.