Yokana 5 - AKITUTUKET NAKITETET (NEPEPEKA ISABULIN KA AWARAGASIA)

Akitang'aleuno kotoma abwal

¹ Kedaunosi nu, kejii epucit loka Iyaudin, kosodi Yesu aikar Yerusalem.

² Ejii abwal Yerusalem arir orute lo enyarite loka Amerekekin, kang'ajep Kiyaudin enyarite Betsata, ejaasi ka alarosinoi akany nama kejaasi akipi.

³ Katukesia kang'un, kejaasi lukadekak lu ipu: Imudukaisik, ing'walaisik ka lukiteregegiara. Kidarito kesi kigurwoki itwan akipi

⁴ naarai irwana ipu kijesunun emalaikat akigurwokin akipi kabwal. Ng'ini kere ni agei akilumokin akipi kedaun akigurun, abu kong'aleu kadeka kere kanakikamuut nesi.

⁵ Kejii etwan epe neni lokedekit ikaru akaisauni ka ikanykauni.

⁶ Na kanyuna Yesu nesi kajenun ebe kiboi kaneni kapaki kana euja, king'isi Yesu nesi ebe, “Ikote ijo ang'aleun?”

⁷ Kinyakakini lokadekan nesi ebe, “Ejakait, emam itwan ni igwaakini eong' toma akipi kigurwokin akipi. Ng'in paki atamakini eong' akilomo toma abwal, egei itwan ice kama kang' akilom toma.”

⁸ Kolimokini Yesu nesi ebe, “Konyou, kodak akapet kon, kolot.”

⁹ Atipet, kong'aleuni etwan, kosekuni ejamu keng' kolosi. “Kerait apaaran ng'ini naka esabato.”

¹⁰ Kosodete Iyaudin alimokin etwan lokitang'aleuno ebe, “Lolo erait naka esabato, mam kibusakinit ijo akigwokite akapet kon.”

¹¹ Konye kinyakakini nesi kesi ebe, “Etwan loketang'aleuni eong' nes kalimokini eong', Kodak ejamu kon, kolot.”

¹² King'isete kesi nesi ebe, “Ng'ai etwan lokilimokini ijo, ‘Kodak ejamu kon kolot’?”

¹³ Konye kemam etwan lokitang'aleuno kejeni ng'ai nes kitang'aleuni nesi naarai kebu Yesu kikunya kanuka akipuakus ka itung'a kalaro kang'in.

¹⁴ Kokau kang'unu, kodumuni Yesu nesi ko Otogo ka Akuju kosodi alimokin nesi ebe, “Kitee, ing'aleu ijo! Siri kisoma bobo aronus tetere emam ibore nikaronon noi kidumuni ijo.”

¹⁵ Koikari etwan, kolimokini Iyaudin ebe kerait Yesu nes kitang'aleuni nesi.

¹⁶ Kogeunete Iyaudin akisicana Yesu kanu kisoma nesi ng'unu ka apaaran kanaka esabato.

¹⁷ Konye kinyakakini Yesu kesi ebe, “Eroko Papa kang' isomae, eong' de esomae.”

¹⁸ Na nes atenikina kekotototore Iyaudin akiyara nesi, mere be kanu kebilia nesi ekisil loka esabato konye bobo kanu kenyaritere nesi Akuju Papa keng' kelope, itirianasi nesi ka Akuju.

Apedor naka Okoku

¹⁹ Kolimokini Yesu kesi ebala ebe, “Teni, teni kalimokini eong' osi ebe, emam ibore ipede ebeikini Okoku asoma kwape ekotore nesi elopet emam kerait ng'unu bon nu itee nesi Papa keng' isomae, naarai ibore kere ni isomae Papa nes isomae Okoku de.

²⁰ Naarai emina Papa Okoku, ka akitodikin nesi ng'unu kere nu isomae nesi elopet. Ebuni Papa akitodikin nesi asomisio nu itelekaarito nu tetere kiumokini osi.

²¹ Naarai kwape itajarunana Papa lukatwak ka ainakin kesi akijar, kong'ip kong'in nes einanakina Okoku de ng'ulu lu ekote nesi akijar.

²² Mam Papa ketubokini itwan ipede, konye ainaki nesi Okoku keng' apedor kere naka atubonokin,

²³ tetere eyong'ete itung'a kere Okoku kwape eyong'itotore kesi Papa. Ng'ini ni emam keyong'it Okoku mam keyong'it Papa lo ejukuni nesi.”

²⁴ Teni, teni, kalimokini eong' osi ebe, ng'ini ni iirari akirot kang' ka akiyuun ng'olo lokejukuni eong', ejaasi ka akijar na emam kedaun. Mam ketubokino nesi konye atubor nesi katwanare ka akilomo akijar.

²⁵ Teni, teni kalimokini eong' osi ebe ebuut akolong'o, adolu de, na iirarata lukatwak eporoto loka Okoku ka Akuju. Ng'ulu lu iirarete nesi ebunete akijar.

²⁶ Naarai kwape ejaatatar Papa ka akijar kotoma keng' kelopet, nes ekipone lo adauna nesi ainakin Okoku keng' de apedor naka ajaus ka akijar kotoma keng' kelopet,

²⁷ bobo de ainaki nesi apedor naka atubonokin, naarai erait nesi Okoku ka Etwan.

²⁸ Siri kiumokisi kanuka nu, naarai edoluuti apak na iirarata ng'ulu kere lu ejaasi atesin eporoto keng',

²⁹ ka alomun katesin kes. Ng'ulu lu isomato nukajokak enyounete ka akijar. Konye ng'ulu lu isomato nukarokok enyounete kosodete akisicanio.

Lu ejenete Yesu

³⁰ “Mam eong' kabeikini asoma ibore ipede ka apedori kang' bon. Atubonokini eong' itung'a kwape elimonokina Akuju eong', kanuka ng'un, atubonokin kang' erait naka abeite. Mam eong' kesomae nu akote eong' elopet adepar ng'unu nu ekote nesi lokejuukuni eong'.”

³¹ Karaiti eong' loketejenuunan nukang' kelopet, mam akitejenuunet kang' kerait naka abeite.

³² Konye ejii itwan ice ni itejenaari nu ikamuto eong', bobo de ajeni eong' ebe akitejenuun keng' kuju kang' erait naka abeite.

³³ Ibuutu osi kijukasi namaka Yoana akirot. Etejenuu nesi abeite.

³⁴ Mam kerait ebe akitejenuuno na adumu eong' elomuut kamaka etwan, konye enera eong' nu tetere kiyuuno osi.

³⁵ Arait Yoana bala atara na anoki kocae, bobo alokokina osi alelakin kapaki kana euriana kotoma acaus keng'.

³⁶ Konye akitejenuuno na ejaasi ka eong' epolo noi adepar naka Yoana, naarai asomisio nu esomae eong' nu, nu ainaki Papa eong' asoma, itejenuto ebe Papa nes kejukuut eong'

³⁷ Bobo Papa elopet lokejukuut eong' etejena kuju kang'. Mam cut osi apelem kiirarito eporoto keng', bobo mam osi apelem kaanyuto aputo keng';

³⁸ bobo mam osi kiricakiito akirot keng' kotoma otawon kus naarai mam osi kiyuuto nesi ng'oli lo ejukuni nesi.

³⁹ Imoete osi agirasia nukalaunak, naarai iituto osi ebe idumunete osi kotoma kes akijar na emam kedaun. Agirasia Nukalaunak nupe nu nes inerasi kuju kang'!

⁴⁰ Konye ing'eroto osi abunere nama kang' tetere idumunete osi akijar.

⁴¹ “Mam eong' kakote akitamao na elomuni kamaka itung'a.

⁴² Konye ajeni eong' ebe emam amina naka Akuju kotoma kus.

⁴³ Abu eong' kokiror ka Papa kang', konye mam osi kidiauto eong'; konye kebu ice kokiror keng' kelopet, idiaunete osi nesi.

⁴⁴ Koni ibeikinata osi akiyuun, osi lu idumuneneete akitamao alomun kotung'a kaluce komam kikotosi akitamao na elomuni kamaka Akuju ka epe bon.

⁴⁵ Siri kiwomowomata ebe kewosae eong' osi kamaka Papa, erait Musa nes kiwosae osi, lo ibuutu osi komunokisi.

⁴⁶ Kere kiyuuto osi Musa, tin osi iyuuto eong' de naarai abu nesi kigiri nu ikamuto eong'.

⁴⁷ Konye kemam osi kiyuuto nu iwadikate nesi, koni iyuunata osi akiro kang'?”