Yokana 4 - AKITUTUKET NAKITETET (NEPEPEKA ISABULIN KA AWARAGASIA)

Yesu nepepe ka aberu nako Samaria

¹ Nakejenuna Lokapolon ebe kebutu Ifarisayon kiirasi ebe kibeleunene Yesu ka akibatisa lukesisiak lu ipu adepar Yoana,

² (konye Yesu elopet kemam kibatisae adepar lukesisiak keng'),

³ abu nesi koloma ko Yudea kobong'ori bobo Galilaya.

⁴ Ebusakinit nesi akitor kiding' ka Samaria.

⁵ Kodoli nesi ore lokapolon loko Samaria lokenyarite Sukar lo edunyasi kiton alaro na kebu Yakobo koinaki okoku keng' Yosef.

⁶ Kejii neni ecor ka Yakobo. Kanu kepasiter Yesu kanuka elotete keng', kebu nesi kiboikin arir kecor. Kerait bala isaan ikanykape.

⁷ Kobuni neni aberu nako Samaria akiwoko akipi. Kolimokini Yesu nesi ebe, “Koinakine eong' akipi kamat.”

⁸ Naarai keikarito ikesisiak keng' ore lokapolon agwela inyamat.

⁹ Kolimokini Asamariat nesi ebe, “Koni ilipitere ijo Eyaudit eong' Asamariat akipi?” Naarai Iyaudin kiton Isamaritan mam kemorete iboro ipede.

¹⁰ Kinyakakini Yesu nesi ebe, “Kere kijeni ijo idutat nika Akuju, bobo kere kijeni ijo ng'ai kilimonokini ijo ebe, ‘Koinakine eong' akipi kamat,’ tin ijo kidau aking'it nesi, bobo tin nesi keinaki ijo akipi nuka akijar.”

¹¹ Kolimokini aberu nesi ebe, “Ejakait, mam ijo kijaasi ka ibore niwokiet, bobo iduloro ecor. Ai idumuna ijo akipi ng'unu nuka akijar?

¹² Ipolo ijo adepar Papa wok Yakobo lo ainakini siong' ecor lo, komasi nesi elopet nepepe ka kidwe keng', ka ibaren keng' alomun kocor kalo?”

¹³ Kolimokini Yesu nesi ebe, “Itwan kere ni emasi akipi nu, ari akure bobo,

¹⁴ konye ng'ini kere ni emasi akipi ng'unu nu ainakini eong' nesi mam bobo akure kaari nesi cut. Akipi nu ainakini eong' nesi eraunete kotoma keng' ecor loka akipi nu einakinete akijar na emam edung'e.”

¹⁵ Kolimokini aberu nesi ebe, “Ejakait, koinaki eong' akipi ng'unu, tetere emam bobo akure kaari eong', kere de tetere emam kabuni ne akiwoko akipi.”

¹⁶ Kolimokini Yesu nesi ebe, “Koloto, konyarau okilen kon, kobuutu ne.”

¹⁷ Kinyakakini aberu nesi ebe, “Emam eong' ekiliokit.” Kolimokini Yesu nesi ebe, “Ilimu ijo abeite ebe, ‘Emam eong' ekiliokit.’

¹⁸ Naarai ijaikinosi ijo ka ikiliok ikany, bobo nesi lo ejaasi ka ijo kipokona mam kerait okilen kon. Erait abeite nu ilimu ijo.”

¹⁹ Kolimokini aberu nesi ebe, “Ejakait, anyu eong' ebe irait ijo lokadwaran.

²⁰ Elipenenete kes ka papa kosi komoru kalo. Konye osi ibalasi ebe Yerusalem nesi ejii alaro na itemokina itung'a akilipia.”

²¹ Kolimokini Yesu nesi ebe, “Toto, komunok eong', ebuuti apak na imam osi kilipiata Papa komoru kalo kere de ko Yerusalem.

²² Ilipiete osi ibore ni mam osi kijenete. Konye siong' ilipiete ibore ni kijeni naarai alakunio elomuut kamaka Iyaudin.

²³ Konye ebuut apak, bobo apak nes na, na elosiata lukelipak akilipi Papa komoyo kiton abeite. Naarai ng'ulu nesi ekote Papa kilipiete nesi.

²⁴ Erait Akuju Emoyo, ng'ulu lu ilipiete nesi itemokina kesi akilipi nesi komoyo kiton abeite.”

²⁵ Kolimokini aberu nesi ebe, “Ajeni eong' ebe ebuut Kristo. Na ebunia nesi, ebuni alimokin siong' iboro kere.”

²⁶ Kolimokini Yesu nesi ebe, “Eong' lo inerasi ka ijo, nes nesi.”

²⁷ Kapak kanipe kang'in kodolunete ikesisiak keng'. Koumokinete kesi kanu kineratatare Yesu ka aberu, konye amam ipede ni abu kotema, “Inyena ikote ijo” Kere de “Inyo ineratatar ijo ka aberu kang'ini?”

²⁸ Kosodi aberu akinyekin amoti keng' naka akipi, koikari ore lokapolon kolimokini itung'a,

²⁹ “Kobuutu, koanyutu etwan lo alimoki eong' iboro kere lu esoma eong'. Ebeikini ca erait Kristo?”

³⁰ Kolomunete kesi kore, kalosite nama keng'.

³¹ Kapak kanip kang'ini kimaimaete ikesisiak keng' nesi ebalasi ebe, “Rabi, konyama.”

³² Konye kinyakakini nesi kesi ebe, “Ajaasi eong' ka inyamen kalu mam osi kijenete.”

³³ Kosodete ikesisiak alimonokin ebalasi ebe, “Ainu ca itwan ice nesi inyamen?”

³⁴ Kolimokini Yesu kesi ebe, “Inyamen kang' eraasi asoma nu ekote lokejukuni eong', ka akirikakin asoma keng'.

³⁵ Mam osi kibalasi ebe, ‘Ideuna ilapio iwong'on, kodoluni akidwenye!’ Kalimokini eong' osi ebe, kikiasi akonyen kus koanyutu kwape elokokinatatar iraito adwenyo.

³⁶ Ng'ini ni edwenyi edumuni eropit, kosodi nesi atukonokin araito kanuka akijar kana emam kedaun, tetere elakarosi lokayaan nepepe ka lokadwenyan.

³⁷ Naarai erait abeite awaragan na ebala ebe, ‘Eyei ipe kosodi nice akidweny.’

³⁸ Abu eong' kejukia osi akidwenye amana na amam osi kisomato. Esomata luce konye ilomata osi toma aswam kes.”

³⁹ Apotu Isamaritan lu ipu ko ore kang'olo kiyuutu nesi kanuka akitejenuun ka aberu ebe, “Abu nesi kolimok eong' ng'unu kere nu esomate eong'.”

⁴⁰ Kanuka ng'un, na abuniata Isamaritan nama keng', kilipiete kesi nesi akideun ka nesi; kosodi nesi akideun kaneni apaarasia aare.

⁴¹ Abutu ice lu ipu kiyuutu nesi kanuka akirot keng'.

⁴² Kolimokinete kesi aberu ebe, “Mere kanuka ejori kon nes iyuutetere siong' naarai iirasi siong' ikulupek. Bobo ijenete siong' ebe erait lo teni Lokayuunan akwap.”

Itang'aleuni Yesu okoku ka ejakait

⁴³ Kedaunosi apaarasia aare, koikari Yesu Galilaya.

⁴⁴ Naarai abu Yesu elopet kotema ebe mam lokadwaran keyong'ite ka akwap keng' kelopet.

⁴⁵ Kedolo nesi Galilaya, abutu itung'a kang'ina kidiautu nesi naarai kaanyuto kesi nukisomate nesi ko Yerusalem kopucit kaloka Epaska naarai kelosito kesi de opucit ng'olo.

⁴⁶ Kosodi nesi abunore bobo Kana ko Galilaya, nama kitarauna nesi akipi ebino. Ko Kapernaum, kejii etwan lokapolon lokedeka okoku keng'.

⁴⁷ Nape kiirara nesi ebe kelomu Yesu ko Yudea ejii Galilaya, kolosi akimaima nesi kijesun tetere itang'aleuni okoku keng', naarai kapuuti cut atwanare

⁴⁸ Kolimokini Yesu nesi ebe, “Kimam osi kianyuuto aumosia kiton nuka akitim, mam osi kiyuunete cut.”

⁴⁹ Kolimokini ejakait ng'oli nesi ebe, “Lokapolon, kijesun eroko ikoku kang' ketwaana.”

⁵⁰ Kolimokini Yesu nesi ebe, “Koloto, ebuni ikoku kon akijar.” Abu etwan ng'oli kiyuu akirot na alimokini Yesu nesi koikari.

⁵¹ Ijesara nesi, kosodete lukejaanakinak keng' akiriamakin ka nesi kosodete alimokin nesi ebe keng'aleu okoku keng'.

⁵² Kosodi nesi aking'it kesi akolong' nakeng'aleuna okoku keng'. Kinyakunete kesi ebe, “Idian, isaan ikanykaare nes enyekina amwanus nesi.”

⁵³ Kojenuni papa ebe ng'ini nes akolong' nakelimokina Yesu nesi ebe, “Ebuni ikoku kon akijar.” Kiyuuni nesi elope nepepe kaluko ore keng' kere.

⁵⁴ Na nes aumosit nakiyareit na abu Yesu kisoma nakebunia nesi ko Yudea elosi Galilaya.