Yokana 3 - AKITUTUKET NAKITETET (NEPEPEKA ISABULIN KA AWARAGASIA)

Yesu kiton Nikodemo

¹ Kejii etwan, Efarisayot, lo anyarite Nikodemo, lokepugan Iyaudin.

² Kobuni nesi namaka Yesu kware, kosodi aking'it nesi ebe, “Rabi, kijenete siong' ebe iraiti ijo lokesisianakinan lo elomuut kamaka Akuju. Naarai emam itwan ipede ni epedori asoma aumosia nu isomae ijo nu kemam Akuju kejaasi ka nesi.”

³ Kinyakakini Yesu nesi ebe, “Abeit, abeite kalimokini eong' ijo ebe, kemam kidouno itwan nakiyareit, mam nesi kepedori anyun ajakaanut naka Akuju.”

⁴ King'isi Nikodemo nesi ebe, “Ikoni idouno bobo itwan ai kemojong'it nesi? Epedori itwan akilomo akook ka toto keng' nakiyareit kakidouno bobo?”

⁵ Kinyakakini Yesu nesi ebe, “Abeit, abeite kalimokini eong' ijo ebe kemam itwan keuruute kakipi kiton Emoyo, mam nesi kepedori akilomo toma ajakaanut naka Akuju.

⁶ Itwan euruuni itwan konye Emoyo euruuni Emoyo.

⁷ Siri kiumoki kanu alimokina eong' ijo ebe, ‘Ibusakinit ijo auruuno bobo.’

⁸ Ekuwam ekusi wai lo ekoto, kosodi ijo akiirari akiruruma keng' konye mam ijo kijeni nama kelomuna kere de nama elosi. Ikoni neni itwan ni euruut Emoyo.”

⁹ King'isi Nikodemo nesi ebe, “Isomakinosi nu koni?”

¹⁰ Kinyakakini Yesu nesi ebe, “Irait ijo lokesisianakinan loko Israel konye mam ijo kijeni akiro nu?

¹¹ Abeit, abeite kalimokini eong' ijo ebe inerasi siong' nu ijenete siong' ka akitejenuun kuju kanu anyutu siong'. Konye mam osi kicamuuto akitejenun kosi.

¹² Kalimokiit eong' osi akiro nuka akwap konye komam osi kimunokiito, ikote osi imunokinete ai kalimoki eong' osi akiro nuko kuju?

¹³ Emam itwan apelem ni edokarit kuju adepar nesi ng'olo lo abu kijesun alomun kokuju, Okoku ka Etwan.”

¹⁴ Ekipone lo kikacakina Musa emun okitoi komoding', nes ekipone itemokinare Okoku ka Etwan akikacakino okitoi,

¹⁵ tetere ng'ini kere ni iyuuni nesi ejaikinosi ka akijar na emam kedaun.

¹⁶ Amina Akuju akwap noi, akitodol nama alemuna nesi Okoku keng' lotelit tetere ng'in itwan kere ni iyuuni nesi emam ketwaani konye kodumu akijar na emam kedaun.

¹⁷ Naarai mam Akuju ejukuni Okoku keng' akwap kanuka atubonokin akwap, konye tetere elakuno akwap akitoro nama keng'.

¹⁸ Ng'ini ni iyuut nesi mam ketubokino. Ng'ini ni emam kiyuut nesi adaun atubokin nesi, naarai mam nesi kiyuut ko okiror ka Okoku kaloteluna loka Akuju.

¹⁹ Na nes atubokino, ebe abu acaus akwap konye abutu itung'a kominutu noi akirionus akilanya acaus naarai aroko asomisio kes.

²⁰ Naarai ng'ini kere ni isomae arokusio mam kemina acaus, mam kebuni nama ejii acaus. Kebuu, itodiaro asomisio keng'.

²¹ Konye ni isomae nuka abeite ebuni nama ejii acaus tetere etakanunete asomisio keng' eraito nukisomai kanuka ayong'ite Akuju.

Yesu kiton Yoana Lokebatisan

²² Kokau kanu, kolosi Yesu nepepe ka ikesisiak keng' akwap nako Yudea, kakideun nesi kang'ina ka kesi. Kosodi nesi akibatisa itung'a.

²³ Ebatisae Yoana de kalaro kanako Ainon akidunya ka alaro nako Saleim naarai epuaka akipi kalaro kang'in. Kobunete itung'a kibatisaete kesi.

²⁴ Naarai kering'a kecakakina Yoana aenis.

²⁵ Kogeuni epeget kokiding' ka ikesisiak ka Yoana kiton Eyaudit ikamuut akilosio nakakitalauno.

²⁶ Kolosete kesi namaka Yoana, kolimokinete kesi nesi ebe, “Rabi, ng'olo lo ajaasi nenipe ka ijo kitala je loko Yordan, lo ibu ijo kitejenaa, elo kane ibatisae. Aikasi itung'a kijokin nama keng'.”

²⁷ Kinyakuni Yoana ebe, “Emam itwan epedori adumun ibore ipede adepar ni einakiite nesi alomun kokuju.

²⁸ Ijenete osi ikulopek ebe abu eong' katema mam eong' karait Kristo konye kejukun eong' akigee koking'aren keng'.

²⁹ Nesi lo ejaasi ka ateran erait eteran. Epoupa keteran kalo egwoi ka akipup nesi elelakini noi kiira eporoto loka eteran. Kanuka ng'un, ailel kang' ileleba.

³⁰ Ibusakinit nesi apoloor konye eong' aditeun.”

Ng'olo lo elomuni kokuju

³¹ Nesi lo elomuti kokuju, ilanyit itung'a kere. Nesi nika akwap erait nika kwap, bobo inera nesi nuka akwap. Nesi ni elomuuti kokuju itelekarit itung'a kere.

³² Inera nesi kuju kanu anyu nesi kiton nu eira nesi, konye emam itwan ni ecamuut akiro keng'.

³³ Ng'ini kere ni ecamuni akiro keng' itogogong'oorit ebe erait Akuju abeite.

³⁴ Nesi ni ijukuut Akuju inera akiro nuka Akuju, naarai einakini Akuju itwan ng'ini Emoyo Lokalaunan emam akitemeteme etyae.

³⁵ Emina Papa Okoku keng', bobo egwaaki nesi iboro kere akanin keng'.

³⁶ Ng'ini ni emunokiit Okoku ejaasi ka akijar na emam kedaun. Ng'ini ni emam kemunokiit Okoku mam kejaikinosi ka akijar na emam edung'e, konye ideun atubokino ka Akuju kama keng'.