Yokana 2 - AKITUTUKET NAKITETET (NEPEPEKA ISABULIN KA AWARAGASIA)

Epucit loka adukokin ko Kana

¹ Aparaan nakiuniet, kejii epucit loka adukokin Kana ko Galilaya. Kejii toto keng' ka Yesu de ng'ina.

² Anyaraute Yesu de opucit, nepepe ka ikiyakia keng'.

³ Nakedaunere ebino, kolimokini toto keng' ka Yesu nesi ebe, “Emam kesi ebino.”

⁴ Kinyakakini Yesu nesi ebe, “Okwai toto! Inyena nukon ka eong'. Eroko apaki kang' kedolo.”

⁵ Kolimokini toto keng' ka Yesu lukejaanakinak ebe, “Kisomata ibore kere ni elimokini nesi osi asoma.”

⁶ Ajaasi neni amotio akanykape nu etenite ka amoru esipokiite neni kanuka etale kaloka Iyaudin loka alaus. Ng'ini amoti ajaasi ka agalanin akanykauni kere akanykawong'on.

⁷ Kolimokini Yesu lukejaanakinak ebe, “Kilelebata akipi amotio.” Kosodete kesi akilelebe akipi pucu.

⁸ Kolimokini nesi kesi ebe, “Aso kowokutu akipi adis koinasi lo epolokiit epucit.” Koyang'arete kesi.

⁹ Napekiiria lokepolokiit epucit akipi nukebuutu koliorosi ebino, komam kejeni nama kelomuna (konye kejenete lukejaanakinak lu awokete akipi), konyarauni lokepolokiit epucit eteran

¹⁰ kosodi alimokin nesi ebe, “Ng'in itwan egeyenene akorun ebino lo ejijim. Kedautu itung'a akimonikin kosodi nesi konye akorun ebino lo epiana. Konye ing'adaki ijo ebino lokajokan akitodolo kipokona!”

¹¹ Na nes aumosit keng' nasodit na abu Yesu kisoma ko Kana ko Galilaya, kosodi akitodiar akibusesu keng', kosodete ikiyakia keng' akiyuun nesi.

¹² Kokau kanu, koikarete nesi nepepe ka toto keng', ka ikinacan keng' kiton ikesisiak keng' Kapernaum. Kosodete kesi akideun kang'ina apaarasia adis.

Elosi Yesu Otogo ka Akuju

¹³ Kaaput epucit loka Epaska loka Iyaudin, koikari Yesu Yerusalem.

¹⁴ Kodumuni nesi ko Otogo ka Akuju itung'a lukigwelete imong'in, amerekekin, ikaburukukun kiton lukelonyak ikabel ejaasi obele kes.

¹⁵ Kojeuni nesi edasit loka aunoi, kireng'iari nesi kesi kere king'a kiton amerekekin kes ka imong'in ko Otogo ka Akuju. Kosodi nesi acakanar king'a abolai kalukebelok ikabel ka akitukumoonor acelei kalukelonyak abolai.

¹⁶ Kolimokini nesi lukegwelanarete ikaburukukun, “Kolemasi iboro lu kane. Siri kitarautu etogo ka Papa kang' alaro na egwelere ka agwelanara.”

¹⁷ Kiitunete ikesisiak keng' ebe kiwadikate ebe, “Amina etogo kon nes kecwei eong'.”

¹⁸ Kosodete Iyaudin aking'it nesi ebe, “Inyena aumosit ibeikiit ijo asoma na itodikini ebe ijaasi ijo ka adolite naka asoma nu?”

¹⁹ Kinyakakini Yesu kesi ebe, “Kotijakisi Etogo ka Akuju lo kwap. Adukuni eong' kapaarasia kauni.”

²⁰ Kosodete Iyaudin atemar ebe, “Abu kodau ikaru akaisawong'on ka ikanykape akiduk Etogo ka Akuju lo, idukuni ijo kapaarasia kauni?”

²¹ Konye etogo lo enera Yesu kuju keng' arait akwaan keng'.

²² Kanuka ng'un, nakitajarunere nesi kamaka lukatwak, abutu ikesisiak keng' kiitutu ebe ketemarit nesi nu. Kosodete kesi akiyuun agirasia nukalaunak kiton akirot nakinerit Yesu.

Akijen ka Yesu ejautene ka etung'anan

²³ Nape ajaare nesi Yerusalem, opucit loka Paska, abutu itung'a ipu kiyuutu kokiror keng' nape kaanyunata kesi aumosia nukisomae nesi.

²⁴ Konye mam Yesu amunokin kesi naarai kejeni nesi kesi kere.

²⁵ Kemam atenikina alimokin itwan ipede nesi kuju kes. Naarai kejeni nesi elopet kojokan nukejaasi otawon kes.