Yokana 17 - AKITUTUKET NAKITETET (NEPEPEKA ISABULIN KA AWARAGASIA)

Ilipakini Yesu luke sisiak keng'

¹ Kedau Yesu ejori akiro nu, kikiari nesi akonyen keng' kuju kosodi atemar ebe, “Papa, adolu akolong', koinaki Okoku kon akibusesu, tetere itopoloori Okoku de ijo.

² Naarai ibu ijo koinaki nesi apedor kuju ka itung'a kere, tetere einakini nesi de akijar na emam kedaun ng'ulu kere lu kibuu ijo koinaki nesi.

³ Apolou ka akijar kana emam kedaun erait ajenus ijo, Akuju epe bon loka abeite, kiton ajenus Yesu Kristo, lo ibu ijo kijuku.

⁴ Etodia eong' akibusesu kon kotoma akwap; adau eong' asoma nu kiinakiit ijo eong' asoma;

⁵ Papa, koinakine eong' akibusesu kakonyen kon kipokona, akibusesu bala na ajaasi ka eong' nepepe ka ijo eroko akwap kejeuna.”

⁶ Etodia eong' ekiror kon kotung'a kalu ibu ijo koinak eong' alomun ka akwap; keraasi kesi lukon, kosodi ijo de ainakin eong' kesi korautu lukang'; kesi de aricakisi akirot kon.

⁷ Ajenutu kesi kipokona ebe iboro kere lukiinaki ijo eong' elomuuto kama kon;

⁸ naarai ainaki eong' kesi akiro nu ibu ijo koinak eong', ediasi kesi, ajenutu kabeite ebe alomuni eong' kama kon, eyuutu ebe, ijo nes kijukuni eong'.

⁹ Elipakiit eong' kesi; mam eong' kelipakiit akwap konye ng'ulu lukiinaki ijo eong' naarai eraasi kesi lukon.

¹⁰ Lu eraasi lukang' kere eraasi lukon, lukon eraasi lukang', bobo itodiar akibusesu kang' kotoma kes.

¹¹ Kipokona, mam bobo eong' kajii toma akwap, konye kesi ejaasi toma akwap, abuuti eong' nama kon. Papa Lokalaunan, kidar kesi kokiror kon, ekiror lo kiinaki ijo eong', kidar kesi kojokan tetere eraunete kesi ibore ipe, kwape iraitetere oni ibore ipe.

¹² Na ajaatatare eong' ka kesi, abu eong' kedar kesi kokiror kon kalokiinaki ijo eong'. Edara eong' kesi, emam ipede kama kes awoli adepar okoku lo ewoliorit, tetere edoliete agirasia nukalaunak.

¹³ Konye kipokona abutu eong' nama kon; inera eong' akiro nu ka akwap, tetere ejaikinosi kesi ka ailel kang' kakileleba kotoma kes.

¹⁴ Adau eong' ainakin kesi akirot kon, konye aare akwap kesi naarai mam kesi keraasi luka akwap kwape emamar eong' karaitere loka akwap.

¹⁵ Mam eong' kelipit ijo alemar kesi ka akwap, konye ebe kidar ijo kesi kamaka lokaronon.

¹⁶ Mam kesi keraasi luka akwap, kwape emamar eong' karaitere loka akwap.

¹⁷ Kitalau kesi kotoma abeite; akirot kon erait Abeit.

¹⁸ Ekipone lo kijukuna ijo eong' toma akwap, nes ejukaria eong' de kesi toma akwap.

¹⁹ Kanu kes nes alemuner eong' akijaanakin ijo, tetere elemunosi kesi de akijaanakin ijo.

²⁰ Mam eong' kelipakiit lu bon, konye ng'ulu de lu iyuuto eong' kanuka akirot kes.

²¹ Elipit eong' korautu kesi kere ibore ipe. Kojaasi kesi toma wok kwape ijaare ijo toma kang', tetere emunokini akwap ebe kijaasi ijo kijukuni eong'.

²² Akibusesu na inaki ijo eong', ainaki eong' kesi, tetere eraunete kesi ibore ipe, kwape iraatatare oni ipe,

²³ ajii eong' toma kes, kojii ijo toma kang', tetere eraunete kesi ibore ipe kotenan, tetere ejenuni akwap ebe ijuku ijo eong', bobo ebe imina ijo kesi kwape kiminuna ijo eong'.

²⁴ “Papa! Iinaki ijo eong' kesi. Akote eong' kesi kojaasi ka eong' nama ajii eong' tetere ebeikinete kesi anyun akibusesu kang', akibusesu nakiinaki ijo eong'; naarai ibu ijo kominu eong' sek eroko kisubuna akwap.

²⁵ Okwai Papa lo edolit, mam akwap kijenuut ijo, konye ajenu eong' ijo; ejenete lu ebe ijukuut ijo eong'.

²⁶ Etejenu eong' ekiror kon kama kes, bobo abuni eong' akitolosit, tetere ekipone lo kiminar ijo eong', kojii toma kes, tetere ajii eong' de toma kes.”