Yokana 16 - AKITUTUKET NAKITETET (NEPEPEKA ISABULIN KA AWARAGASIA)

¹ “Alimoki eong' osi nu kere tetere imam kipasi osi akiyuute.

² Ebunete itung'a akireng'iar osi ko otogoi luka alipasia ka Iyaudin. Bobo ebuuti akolong' na anyuna itwan kere nikiari osi ituni ebe kokipone kaloka asoma nu, ijaanakini nesi Akuju.

³ Ebunete kesi akisomakin osi nu naarai mam kesi kejenete Papa, bobo mam kesi kajenete eong'.

⁴ Konye adau eong' alimokin osi akiro nu ebe kedol akolong' kes ibeikinete osi akiitun ebe abu kalimokite osi.” “Amam eong' abu kalimoki osi akiro nu ape kageunet, naarai ajaasi eong' ka osi.

Asoma nuka Emoyo Lokalaunan

⁵ Konye kipokona alosi eong' namaka lokejukuni eong'. Konye emam ipede kama kus nikeng'isit eong' ebe, ‘Ai ilosi ijo?’

⁶ Konye kanu alimokina eong' osi akiro nu, elelebun akituur otawon kus.

⁷ Konye kalimonokini eong' osi abeite: Aikar kang' erait adumunet kama kus, naarai kemam eong' kaikari, mam Lokeng'aranakinan kebuni nama kus. Konye kaika eong', alosi eong' akijukuun nesi nama kus.

⁸ Na ebunia nesi, ebuni nesi akitodikin itung'a luka akwap ebe ewolito kesi ikamuuti arokusio, adolite nepepe ka atubonokino naka Akuju.

⁹ Epacarito kesi ikamuut arokusio naarai mam kesi kiyuuto eong';

¹⁰ ikamuut adolite, naarai alosi eong' nama ka Papa, osi de mam bobo kilosete anyun eong';

¹¹ bobo ewolito kesi ikamuut atubokino, naarai adaun atubonokin lokepugan akwap na.”

¹² “Aring'a eong' ajaasi ka iboro kalu ipu noi lu limonokina osi, konye mam osi kipedorete atiting'ikin kesi kipokona.

¹³ Na ebunia Emoyo loka abeite, ebuni nesi ayaite osi toma abeite kere; naarai mam nesi kebuni ejori kanu keng' bon, konye ng'ini ibore ni iirari nesi ebuni nesi ejori, bobo de kitejenikini nesi osi iboro lu ebuuto koking'aren.

¹⁴ Einakini nesi eong' akibusesu, naarai idiauni nesi nu atemari eong' kolimokini nesi osi.

¹⁵ Iboro kere lu ejaasi ka Papa, eraasi lukang'; kanuka ng'un abu eong' katema ebe ebuni nesi akidiaun ni erait nikang' kalimokin osi.

Akituuru kiton Alakara

¹⁶ “Kapak kana edite, mam osi kianyunete eong' bobo; bobo kapak kana edite kianyunete eong'.”

¹⁷ Abutu lukesisiak keng' ice kineranakinosi ebalasi ebe, “Inyena nu elimonokini nesi oni ebe, ‘Kapak kana edite, mam osi kianyunete eong' bobo, ebe kapak kana edite ianyunete osi eong' bobo’, bobo ‘Kanu alosia eong' namaka Papa?’”

¹⁸ Kotemarete kesi ebe, “Inyena apolou kanu ebala nesi ebe ‘Kapak kana edite?’ Mam siong' kijeni apolou kanu inera nesi.”

¹⁹ Kejeni Yesu ebe kekotosi kesi aking'it nesi; king'isi nesi kesi ebe, “Nu nes ing'itanarosi osi ikulopek, nu abala eong' na atemara eong' ebe, ‘Kapaki kana edite, mam osi kilosete anyun eong', bobo kapak kana edite ianyunete osi eong'?’

²⁰ Abeit, abeite, kalimokini eong' osi, ibunete osi akimony kakibwooro, konye ebuni akwap akilel; ilosete osi akituur, konye akituur kus ibelokin araun akilel.

²¹ Na eriebare aberu naka kanuka akidoun, emam nesi alakara naarai adolu apak keng'; konye kedau nesi akidoun ikoku, mam nesi kiituni ariebo kanuka ailel ebe edoun ikoku ka akwap.

²² Kanuka ng'un, ituuriete osi kipokona, konye anyuni eong' osi bobo, kosodete itawon kus ailel, emam itwan nikidemari osi ailel kus.”

²³ Kapaaran kang'ini mam osi kilosete akilip eong' ibore ipede. Abeit, abeite, kalimokini eong' osi, kilipata osi ibore kere kamaka Papa, kiinakini nesi osi kokiror kang'.

²⁴ Akitodol akolong' na, mam osi kilipito ibore ipede kokiror kang'; kilipata, idumunete osi tetere ailel kus ilelebun pucpuc.

Akilanya Akwap

²⁵ “Alimoki eong' osi nu etosomae eong' aputosia; edoluut apak na emamar bobo eong' keneratatar ka osi etosomae aputosia konye akitebeinikin osi nuka Papa.

²⁶ Kapaaran kang'in ilosete osi akilip kokiror kang'; mam eong' kalimokini osi ebe elipi eong' Papa kanu kus;

²⁷ naarai Papa elope kimina osi, naarai iminutu osi eong' bobo iyuutu osi ebe alomuni eong' kamaka Papa.

²⁸ Alomuni eong' kamaka Papa, bobo abu eong' toma Akwap; bobo alomari eong' kakwap, alosite nama ka Papa.”

²⁹ Kotemarete lukesisiak keng' ebe, “Okwai, kipokona itebeik ijo ejori, mere ebe kaputosia kere!

³⁰ Ajenutu siong' kipokona ebe ijeni ijo iboro kere, emam niking'isi ijo; kanuka nu kiyuutu siong' ebe ilomuni ijo kamaka Akuju.”

³¹ Kinyakakini Yesu kesi ebala ebe, “Iyuutu konye osi kipokona?

³² Ebuut akolong', teni adolu, nakisiarakinere osi, ng'ini itwan alosite ore keng', kakinyekin osi eong' bon; konye mam eong' kajii bon, naarai ejaasi Papa ka eong'.

³³ Alimoki eong' osi nu, tetere idumunete osi aipuc kotoma kang'. Kotoma akwap ijaikinosi osi ka ican; konye kicasitete, adau eong' akitelekaar akwap.”