Yokana 15 - AKITUTUKET NAKITETET (NEPEPEKA ISABULIN KA AWARAGASIA)

Yesu nesi emusabibu loka abeite

¹ “Arait eong' emusabibu loka abeite. Papa kang' nes lokesoman.

² Ng'ini ateni kang' na emam kirai araito, ebuni nesi alemari. Ng'ini ateni na irai araito, igwerari nesi tetere iyatakini araito.

³ Adaun akitalaun osi kakirot kana adau eong' alimokin osi.

⁴ Kideunosi kotoma kang', eong' de kotoma kus. Kwape emamare ateni kepedori akiraikin araito kanu keng' bon kemam kideun kotoma omusabibu, nes ekipone lo emamare osi kipedorete akidoun araito kemam osi kideunosi kotoma kang'.”

⁵ Arait eong' emusabibu, iraasi osi ateniek. Ng'ini ni ideun kotoma kang', eong' de kotoma keng', ng'ini nes ni irai araito nu ipu, naarai kemam eong', mam osi kipedorete asoma ibore ipede.

⁶ Kemam itwan kideun kotoma kang', ecakaro nesi king'a kwape kateni, kowoni; kotukokinete ateniek, kocakakinete kesi toma akimi kakicweikin.

⁷ Kideunosi osi kotoma kang', kideunosi akiro kang' de kotoma kus, kilipata osi ibore kere ni ikotosi osi, isomakino osi.

⁸ Kokipone kalo itopoloro Papa kang' kanuka akira kus araito nu ipu kakitodiar kokipone kalo ebe iraito osi lukesisiak kang'.

⁹ Kwape kaminuna Papa kang' eong', nes ekipone lo aminuna eong' de osi; kideunosi kotoma amina kang'.

¹⁰ Kiricata osi ikisila kang', ideunosi osi kotoma amina kang' kwape aricakina eong' ikisila ka Papa kang' kakideun kotoma amina keng'.

¹¹ Alimoki eong' osi nu, tetere alakara kang' ejaikin toma kus, alakara kus de kitodolikin.

¹² “Ekisil kang' nes lo: Kominasi kwape aminuna eong' osi.

¹³ Emam itwan ni ejaatatar kamina adepar na, ebe akipala itwan akijar keng' kanuka ipaupatin keng'.

¹⁴ Iraasi osi ipaupatin kang' kisomata osi nu ecorakini eong' osi.

¹⁵ Mam bobo eong' kanyarit osi lukejaanakinak, naarai lokejaanakinan mam kejeni nu isomae ejakait keng'; konye anyarau eong' osi ipoupatin naarai alimoki eong' osi ng'un kere nu eira eong' kamaka Papa kang'.

¹⁶ Mere osi kiseunete eong', konye eong' kaseuni osi ka ainakin osi asoma, alosite osi akira araito, bobo kideunosi araito kus; tetere kiinakini Papa osi ibore kere ni ilipete osi kokiror kang'.

¹⁷ Nu nes nukecorakini eong' osi: Kominasi.

Areit naka akwap

¹⁸ “Kireit akwap osi, kojenete ebe karee eong' eroko kerea osi.

¹⁹ Kere kiraasi osi luka akwap, tin akwap emina osi bala itung'a keng'; konye kanu emamare osi kiraatatar luka akwap, bobo kanu aseuna eong' osi alomun kakwap, nes atenikina kireitere osi akwap.

²⁰ Kiitutete akirot na abu eong' kalimok osi ebe, ‘Mam lokejaanakinan kepolo akitelekaar lokapolon keng'’ Kisicanito kesi eong', ebunete kesi akisican osi de; kericito kesi akirot kang', ebunete kesi aricite nakus de.

²¹ Konye ebunete kesi akisomakin osi nu kere kanu kang', naarai mam kesi kejenete ng'oli lokejukuni eong'.

²² Kere kemam eong' kabuut ejori ka kesi, tin kesi emam kejaasi karonus; konye kipokona emam kesi akitimio kanuka aronus kes.

²³ Nesi nikareit eong', ereit nesi Papa kang' de.

²⁴ Kere kemam eong' kesomate kama kes asomisio nu emam itwan ice isomate, tin emam kesi kejaasi karokusio; konye kipokona anyutu kesi kareite eong' nepepe ka Papa kang'.

²⁵ Eraito nu akitodolikin akirot na igirite toma okisil kes ebe, ‘Abutu kareata eong' along'u.’

²⁶ “Konye nape ebunia Lokeng'arakinan, lo alosi eong' akiyakuun alomun kamaka Papa, atikere Emoyo loka abeite, lo elomuni kamaka Papa, elosi nesi akitejenuun nukang';

²⁷ osi de iraasi lukajenak, naarai ijaikinosi osi ka eong' ape kageunet.