Yokana 13 - AKITUTUKET NAKITETET (NEPEPEKA ISABULIN KA AWARAGASIA)

Ilosi Yesu Akejen nuka lukesisiak keng'

¹ Ering'a apaaran naka epucit kaloka Paska kedolo, nakejenuna Yesu ebe adolu esaa keng' loka anyoun kakwap kana alosite namaka Papa, kedau nesi aminun lukeong' lukejaasi toman akwap, kominuni nesi kesi akitodol osial.

² Kenyemete Yesu nepepe ka lukesisiak keng' inyamen lukatabong'. Kedauti Asatanit akipiakin awomowomosia nuka agwelar Yesu otau ka Yuda Isikariot, okoku loka Simon.

³ Kejeni Yesu ebe kedaut Papa ainakin nesi apedor kere; kejeni nesi ebe kelomuut nesi kamaka Akuju bobo alosi nesi nama ka Akuju,

⁴ konyouni nesi konyamen, kolacari inapen keng', koyenikini nesi etaulo ang'abet keng'.

⁵ Kobukokini nesi akipi abeseni, kogeuni akilot akejen ka lukesisiak keng' ka akimwat ka etaulo kalo keyenikiit nesi ang'abet.

⁶ Kodolokini nesi Simon Petero; king'isi Petero nesi ebe, “Lokapolon, ilosi ijo akejen kang'?”

⁷ Kinyakakini Yesu nesi ebe, “Mam ijo kijeni kipokona nu esomae eong', konye ijenuni ijo kokau.”

⁸ Kotemari Petero ebe, “Mam ijo kilosi akejen kang'.” Kinyakakini Yesu nesi ebe, “Kemam eong' kelosi ijo, mam bobo ijo kirait lokesisian kang'.”

⁹ Kinyakakini Simon Petero nesi ebe, “Lokapolon, mere akejen kang' bon, konye akanin kang' kiton akou kang' de.”

¹⁰ Kolimokini Yesu nesi ebe, “Nesi ni ilong'it, mam bobo nesi kitemokina akilot adepar akejen keng' bon, naarai elae nesi kajokin; ilaete osi, konye mere osi kere.”

¹¹ Naarai kejeni nesi ni kelosi agwelar nesi; ng'ini nes atenikina ketemara nesi ebe, “Mam osi kere kilaete.”

¹² Nakedauna Yesi akilot akejen kes, kakinap igoyen keng', kakiboikin nama kiboyaa nesi, king'isi nesi kesi ebe, “Ijenete osi nu esomaki eong' osi?

¹³ Kinyarito osi eong' Lokesisianakinan ka Lokapolon; ideerete osi naarai kwang'in nes arait eong'.

¹⁴ Kilosit Lokapolon kus ka Lokesisianakinan kus akejen kus, ibusakinit osi de akilot akejen nuka nice.

¹⁵ Naarai ainaki eong' osi aputo, kisomata osi de kwape esoma eong'.

¹⁶ Abeit, abeite, kalimokini eong' osi, mam ebulesut kitelekarit ejakait keng'; karaida ekiyakia akitelekar lokijukuni nesi.

¹⁷ Kijenete osi nu, kisirereng'io osi kisomata osi kesi.”

¹⁸ Mam eong' kenera kuju kus kere; ajeni eong' lu aseu eong'; erait ebe tetere itodolokinosi agirasia nukalaunak ebe, “Nesi lo abu konyam inyamen kang', araun epading'a kang'.

¹⁹ Kalimokini eong' osi nu kipokona ering'a kisomakina tetere iyuunete osi kisomakinosi ebe arait eong' Nes Nesi.

²⁰ Abeit, abeite, kalimokini eong' osi, ng'ini kere ni idiauni ni ejukuni eong', kediauni eong', bobo ng'ini ni kediauni eong', idiauni ng'oli lokejukuni eong'.”

Edwaruni Yesu agwelaro keng'

²¹ Kedau Yesu ejori nu, abu nesi kicanakin ko otau keng', kotemari, “Abeit, abeite, kalimokini eong' osi ebe, elosi ipe kama kus agwelar eong'.”

²² Kosodete lukesisiak ang'olenikin, emam kejenete ng'ai kinera nesi kuju keng'.

²³ Kegong'akina lokesisian epe lo kemina Yesu aturub keng';

²⁴ kokwetuni Simon Petero nesi kolimokini nesi ebe, “Kolimok siong' kuju ka ng'ai inera kuju keng'.”

²⁵ Kosodi lokesisian ng'oli apikin Yesu, king'isi ebe, “Lokapolon erait ng'ai?”

²⁶ Kinyakuni Yesu ebe, “Lo alosi eong' ainakin abiletait na kadau eong' akilumokin.” Kedau nesi akilumokin abiletait, koinakini nesi Yuda, okoku loka Simon Iskariot.

²⁷ Kedau Yuda akidiaun abiletait, kolomi Asatanit toma keng'. Kolimokini Yesu nesi ebe, “Kisoma atipet nu ikote ijo aswam.”

²⁸ Amam ipede kamaka lu anyemete ni abu kojenu atenikina nakelimokina nesi Yuda kong'in

²⁹ Ice kiituuto ebe kanu kedakiter Yuda ecwe loka ikabel, kelimokini Yesu nesi ebe, “Kogwel iboro lu ikotosi oni kanuka epucit, kere ebe itemokina nesi ainakin lukapalapalak ibore.”

³⁰ Kedau nesi akidiaar abiletait, atipet kolomari nesi king'a; kerait kware.

Akitutuket Nakitetet

³¹ Nakedauna nesi alomar king'a, kotemari Yesu ebe, “Kipokona nes itopolorere Okoku ka Etwan, kotoma keng' de itopolorite Akuju;

³² kitopolorite Akuju kotoma keng', elosi Akuju de akitopoloor nesi kotoma keng' kelopet, ka akitopoloor nesi atipet.

³³ Idwe kang', mam eong' kajaikinosi ka osi ka apak kana euja. Ibunete osi akote eong'; konye kalimokini eong' osi kipokona nu alimokiit eong' lukapolok Kiyaudin ebe, ‘Mam osi kibeikinete alosite nama alosi eong'’

³⁴ Kainakini eong' osi ekisil lokitetet ebe, kominasi. Kwape aminuna eong' osi, kominasi osi de konipe kong'in.

³⁵ Ekipone lo nes ejenunata itung'a kere ebe iraasi osi lukesisiak kang', kiminasi osi.”

Edwaruni Yesu ekipone lo eng'welara Petero nesi

³⁶ Kolimokini Simon Petero nesi ebe, “Lokapolon, ai ilosi Ijo?” Kinyakuni Yesu ebe, “Nama alosi eong', mam ijo kibeikini akitup eong' kipokona; konye kitupuni ijo eong' kokau.”

³⁷ King'isi Petero nesi ebe, “Lokapolon, inyo emamare eong' ka apedori akitupu ijo kipokona? Atwani eong' kanu kon!”

³⁸ Kinyakuni Yesu ebe, “Itwani ijo kanu kang'? Abeit, Abeit, kalimokini eong' ijo ebe mam emasinik keruokini ering'a ijo king'eria eong' irwan kauni.”