Yokana 11 - AKITUTUKET NAKITETET (NEPEPEKA ISABULIN KA AWARAGASIA)

Atwanare ka Lasaro

¹ Apak ng'ini, kejii etwan lokedeka, ekiror keng' Lasaro loko Betani, aduket nakiboyata Maria nepepe ka kinac keng' Marita.

² Maria na nes nakinyonyoikini Lokapolon akinyet kosodi amwatanar akejen keng' kitima keng'. Nesi ng'ipe ng'in nes kedeka onace keng' Lasaro.

³ Abutu akanacan ng'unu kijukiasi akirot namaka Yesu ebe, “Lokapolon, edeka noi ng'oli lo imina ijo.”

⁴ Konye nakiirara Yesu akiro ng'unu, kotemari ebe, “Mam adeka na kerait nakaaran, erait naka akitur Akuju tetere itopolorio Okoku ka Akuju.”

⁵ Kemina Yesu Marita kiton kinaci keng' nepepe ka Lasaro noi.

⁶ Kedau nesi apupun kuju ka adeka ka Lasaro, abu nesi kitoloto akiboi apaarasia aare kama kejii nesi.

⁷ Kau kanu, kolimokini nesi ikesisiak keng' ebe, “Kabong'osi bobo Yudea.”

⁸ Kolimokinete ikesisiak keng' nesi ebe, “Rabi, akotosi Iyaudin akibiribir ijo ka amoru, ilosi ijo ng'ina bobo?”

⁹ Kinyakuni Yesu ebe, “Mam kejaasi isaan itomonkaare apaaran? Keloto itwan kere paran, emam ibore einakini nesi igatari naarai itee nesi acaus naka akwap kana.

¹⁰ Konye keloto itwan kere kware egatari nesi naarai emam acaus kotoma keng'.”

¹¹ Kebu Yesu kiner akiro nu kosodi nesi alimokin kesi ebe, “Ejotoe opaupa wok Lasaro. Konye alosi eong' akitekwenyuun nesi kajoo.”

¹² Kolimokinete ikesisiak keng' nesi ebe, “Lokapolon, kejotooro nesi, ebuni ang'aleun.”

¹³ Kinerit Yesu ikamuuti atwanare keng', konye kemunokiito kesi ebe kinera Yesu kuju ka akiyeng'uute kajo.

¹⁴ Kosodi Yesu akitebeikin kesi ebe, “Ketwana Lasaro,

¹⁵ konye kanu kus alakara eong' ebe amam eong' ajii ng'ina, tetere osi iyuunete. Konye kalototo nama keng'.”

¹⁶ Kosodi Tomas lokenyarite Emwatonit alimokin ikesisiak luce ebe, “Kalototo oni de, tetere itwakete oni nepepe ka nesi.”

Yesu nes erait Ajarun nepepe ka Akijar

¹⁷ Nakedolia Yesu ng'ina, kodumuni nesi ebe kejaikin Lasaro toma ates apaarasia awong'on.

¹⁸ Kidunyasi Betani kiton Yerusalem, bala amailoi aare.

¹⁹ Kebuuto Iyaudin lu ipu namaka Marita kiton Maria aking'aing'a kesi kanuka onac kes.

²⁰ Nakiirara Marita ebe ebuuti Yesu, kolomari akisiriama nesi, ideuna Maria iboe ko otogo.

²¹ Kolimokini Marita Yesu ebe, “Lokapolon kere kijii ijo ne tin onac kang' emam ketwaanit.

²² Konye kipokona de ajeni eong' ebe ng'unu kere nu ilipi ijo kamaka Akuju, kiinakini Akuju ijo.”

²³ Kolimokini Yesu nesi ebe, “Enyouni onac kon bobo.”

²⁴ Kolimokini Marita nesi ebe, “Ajeni eong' ebe enyouni nesi bobo kapaki kana ejarunere ka apaaran kana kesial.”

²⁵ Kolimokini Yesu nesi ebe, “Araiti eong' ajarun ka akijar de. Ni iyuni eong' ejaruni bobo atikere ketwana.

²⁶ Ng'ini kere ni ejari kiyuute eong', mam cut ketwani. Iyuuti ijo akiro nu?”

²⁷ Kinyakakini Marita nesi ebe, “Eebo, Lokapolon, eyuuti eong' ebe iraiti ijo Kristo, Okoku ka Akuju lo ebuuti toma akwap.”

Emonyi Yesu

²⁸ Kedau Marita alimun ng'unu, kolosi nesi anyaraun Maria kinac keng', kiwewaikini nesi ebe, “Ejei lokesisianakinan ne, kinyarit ijo.”

²⁹ Nakiirara Maria nu, kosodi adetun atipet, kolosi nama keng'.

³⁰ Keroko Yesu keloma toma ore, konye kering'a nesi ejii alaro na esiriamia Marita nesi.

³¹ Na anyunata Iyaudin lu ajaasi ka Maria otogo ing'aeng'aete nesi edetun atipet, ka alomar king'a, kotupakinete kesi nesi, emunokiito ebe elosi nesi ates akimony.

³² Kedolo Maria nama kejii Yesu, koanyuni nesi Yesu kosodi akibirokin akejen keng', kolimokini nesi Yesu ebe, “Lokapolon, kere cut kijii ijo ne, tin emam onac kang' ketwanit.”

³³ Na anyuna Yesu Maria emonyi, nepepe ka Iyaudin de lukeupasi ka Maria, abu nesi kojaikinosi ka akisoni ka akicanakin noi kotau keng',

³⁴ king'isi nesi kesi ebe, “Ai idaikiito osi nesi?” Kinyakakinete kesi nesi ebe, “Lokapolon, kobuni koanyu.”

³⁵ Kodelori Yesu.

³⁶ Kotemarete Iyaudin ebe, “Koanyutu kwape keminar Yesu Lasaro!”

³⁷ Konye kotemarete ice kama kes ebe, “Kemam etwan lo ang'aari akonyen nuka emuduki kepedori akirebokin atwanare ka etwan kalo?”

Etajarun Lasaro

³⁸ Kosodi Yesu alosite ates, ejaasi ka akisoni bobo ko otau keng'. Keraiti ates abua nakegolokiite kamoru.

³⁹ Kotemari Yesu ebe, “Kolemasi amoru ng'ini.” Kolimokini Marita, kinaci kalokatwan, Yesu ebe, “Lokapolon, ejii kipokona asaus nakapolon noi, naarai adaunosi apaarasia awong'on ape atwania.”

⁴⁰ Kolimokini Yesu nesi ebe, “Kemam eong' kalimokiit ijo ebe kiyuu ijo, iyanyuni ijo akibusesu naka Akuju?”

⁴¹ Kolemarete kesi amoru. Kong'oliari Yesu kuju kotemari ebe, “Papa, keyalamikiit eong' ijo kanuka akiirar eong'.

⁴² Ajeni eong' ebe iranari ijo eong' apakio kere, konye enera eong' akiro nu kanuka itung'a kalu egwoete kane tetere iyuunete kesi ebe kijukuuti ijo eong'.”

⁴³ Kedau nesi alimun ng'unu, kiworouni nesi keporoto kaloko kuju ebe, “Lasaro, kolom king'a.”

⁴⁴ Kosodi etwan loketwanit alomun king'a etokite akanin keng' ka akejen keng' kinagai kalu idaere itwan ka ereet keng' erapite kenaga. Kolimokini Yesu kesi ebe, “Kolacakisi nesi, koisikisi nesi koika.”

Imanite akikamun Yesu

⁴⁵ Abutu Iyaudin lu ipu, lu abuuto namaka Maria koanyutu nu abu Yesu kisoma, kiyuunete kesi Yesu,

⁴⁶ konye abutu ice kama kes kolototo namaka Ifarisayon kolimokinete kesi nu abu Yesu kisoma.

⁴⁷ Kosodete isaserdotin lukapolok kiton Ifarisayon akiworoun atuket, ka aking'it ebe, “Inyena isomakinete oni? Naarai isomae etwan lo aumosia nu ipu.

⁴⁸ Kinyekisi oni nesi kitolosite ekipone lo, ebuni ng'ini itwan akiyuun nesi kosodete Iromayon abunere amunaun Etogo ka Akuju nepepe ka akwap wok.”

⁴⁹ Konye kosodi epe kama kes lokenyarite Kaiyafas, lokerait esaserdotit lokapolon ko okaru kang'oli alimokin kesi ebe, “Mam osi cut kijenete ibore ipede.

⁵⁰ Mam osi kijenete ebe ibusakinit itwan ipe atwanare kanuka itung'a tetere emam akwap kere kemudiaro.”

⁵¹ Kemam nesi kinerit nu kanuka akote keng' kelope ejori, konye kanu keraitere nesi esaserdotit lokapolon kokaru kang'oli, abu nesi kodwaru ebe etwani Yesu kanuka ateker Kiyaudin,

⁵² bobo mere kanuka ateker kang'ini bon, konye tetere etukokini nesi nenipe idwe luka Akuju lu esiarakina.

⁵³ Alomun apaaran ng'ini abutu ikapolok Kiyaudin kiirarosi ekipone loka akiyar nesi.

⁵⁴ Kanuka ng'unu amam bobo Yesu abu kitoloto alosite ko Yaudin, konye abu nesi koika alaro na edunyasi ka moding', otaun lo anyarite Efraim, ka akideun nesi kang'ina nepepe ka ikesisiak keng'.

⁵⁵ Kapie epucit Kiyaudin loka Epaska, kosodete itung'a ipuaka alosite Yerusalem ering'a apak naka epucit kedolo tetere italaunosi kesi.

⁵⁶ Akotosi kesi Yesu, kosodete kesi akineranakin egwoete ko otogo ka Akuju ebalasi ebe, “Inyena iitunene ijo? Etakani bala mam cut nesi kebuni opucit?”

⁵⁷ Abutu isaserdotin lukapolok Kifarisayon kolemutu akicorasia ebe kejenu itwan kere nama ejii Yesu, itemokina akitodikin kesi tetere ikamuno nesi.