Yokana 10 - AKITUTUKET NAKITETET (NEPEPEKA ISABULIN KA AWARAGASIA)

Awaragan kuju ka lokejokon

¹ “Abeite, abeite, kalimokini eong' osi ebe nesi ni emam kitori orute elomi toma agola naka amerekekin konye koporokini toma korot kece, erait ikokolan bobo erait ikademan.

² Konye nesi ni itori orute erait lokejokon loka amerekekin.

³ Eng'akini lokedaran nesi ekek. Epupete amerekekin eporoto keng'. Iworounene nesi amerekekin keng' kiroria kes kitolomari nesi kesi king'a.

⁴ Na emiara nesi amerekekin keng' king'a, ing'areni nesi, kotupakinete amerekekin nesi, naarai ejenete kesi eporoto keng'.

⁵ Mam kesi ketupakinete elong'ait, konye eleporosi kama keng' naarai mam kesi kejenete eporoto kelong'ait.”

⁶ Abu Yesu kolimok kesi awaragan na konye mam kesi abutu kojenutu apolou ka akiro kanu alimonokini nesi kesi.

Yesu Lokecokon Lokajokan

⁷ Kolimokini Yesu bobo kesi ebe, “Abeit, abeite, kalimokini eong' osi ebe, arait eong' ekeki loka amerekekin.

⁸ Eraasi ikokolak ka ikademak ng'ulu kere lukepotu kogeata kama kang' abunore. Konye mam amerekekin abutu kiirasi kesi.

⁹ Eong' nes ekek. Kelomo itwan kere toma itorit nama kang', eyuuno nesi kosodi nesi akilomo toma ka alomar kodumuni inya.

¹⁰ Ebuni ekokolan akokoo, akiyar ka amunaar. Abu eong' kabu tetere idumunete osi akijar, akijar na epolo noi.”

¹¹ “Eong' nes lokejokon lokajokan. Lokejokon lokajokan epali akijar keng' kanuka amerekekin keng'.

¹² Etwan lo eropio, lo emam keraiti lokejokon, lo emam amerekekin de keraito nukeng', keanyu epeete ebuuti, inyekini amerekekin kode alepori. Kosodi epeete akikamanar ka akisiarakin kesi.

¹³ Elepor nesi naarai erait nesi lo eropio, mam nesi kepodo kuju ka amerekekin.

¹⁴ Eong' nes lokejokon lokajokan. Ajeni eong' lukang' kelope, lukang' de ejenete eong'.

¹⁵ Ekipone lo ejenia Papa kang' eong' nes ekipone ajenia eong' de Papa. Apali eong' akijar kang' kanuka amerekekin.

¹⁶ Bobo ajaasi eong' ka amerekekin kace kanu mam keraito nukesipan kalo. Ibusakinit eong' ayaun ng'unu de, kosodete kesi akiirar eporoto kang'. Kanuka ng'un, ejaikin esipan epe ka lokejokon epe.”

¹⁷ “Kanuka nu, kamina Papa eong' naarai apalit eong' akijar kang' tetere adumuni eong' bobo.

¹⁸ Emam itwan nikademari eong' konye eong' elope nes apali. Ajaasi eong' elope ka apedor naka akipala ka apedor naka adumun bobo. Adumu eong' akicorakinet na kamaka Papa kang'.”

¹⁹ Abu bobo atakataka kojaikin kiding' ka Iyaudin kanuka akiro kanu.

²⁰ Abutu lu ipu kama kes kotemasi ebe, “Ejaatatar ka eparait, bobo ejaasi ka ibiler Inyo epupere nesi?”

²¹ Abalasi ice ebe, “Mere lo ejori loka itwan kani ejaatatar ka eparait. Epedori eparait ang'aari akonyen kimudukaikis?”

Ang'eri Yesu

²² Kerait apak naka epucit loka akigwaakin etogo ka Akuju akanin keng' ko Yerusalem.

²³ Kerait apaarasia nuka akiru etaa akwap ci. Bobo kelosi Yesu ko Otogo ka Akuju ka alomaret kanuka Suleimani.

²⁴ Kosodete Iyaudin akigalikin nesi, king'isete nesi ebe, “Itodoli ijo iwori imunonikiit ijo siong' akiro? Kirait ijo Kristo kitebeikine siong'.”

²⁵ Kinyakakini Yesu kesi ebe, “Abu eong' kalimoki osi, konye mam osi kiyuuto. Asomisio nu esomae eong' kokiror ka Papa kang' kesi ketejenaarito eong'.

²⁶ Konye mam osi kiyuuto, naarai mam osi kijaasi osipan ka amerekekin kang'.

²⁷ Amerekekin kang' epupete eporoto kang', ajeni eong' kesi, kesi de katupito eong'.

²⁸ Bobo ainakini eong' de kesi akijar na emam kedaun, bobo mam cut kesi ketwakiyarete. Bobo mam itwan ebuni ademar kesi kakanin kang'.

²⁹ Papa kang' lokainakini eong' kesi epolo noi akitelekaar kere. Kanuka ng'un emam itwan ni epedori akopor kesi kakan ka Papa.

³⁰ Eong' ka Papa kiraito ipe.”

³¹ Kosodete Iyaudin bobo akirum amor ekotosi akibiribir nesi.

³² Kosodi Yesu akinyakakin kesi ebala ebe, “Etodiki eong' osi aswamisio nu ipu nukajokak alomun kamaka Papa. Kanuka nu kamaka nu kibiribiriata osi eong' ka amoru?”

³³ Kinyakakinete Iyaudin nesi ebalasi ebe, “Mam siong' kibiribirete ijo kanuka aswamisio kanukajokan konye kanuka ekenit kon. Naarai irait ijo itwan usa, konye itamakiit ijo ilopet akitarauna Akuju”.

³⁴ Kinyakakini Yesu kesi ebe, “Mam kigirite okisil kus ebe, ‘Atemarit eong' iraasi osi ikujusinei?’

³⁵ Ng'ulu lu apon koinakine akirot keng' abu konyaraune kesi ikujusinei. Kijenete siong' de ebe eraasi abeite ng'ini pak agirasia nukalaunak.

³⁶ Ng'oli lo etalau Papa ka akijukun akwap nesi ibalasi osi ebe ‘Ikeni ijo’ kanu atemara eong' ebe, ‘Araiti eong' Okoku ka Akuju’?

³⁷ Kemam eong' kesomae asomisio nuka Papa kang', mam akiyuun eong';

³⁸ Konye kesomaki eong', atikere kimam osi kiyuuto eong', kocamutu aswamisio tetere ijenunete osi ebe ejii Papa toma kang' bobo eong' de ajii toma ka Papa.”

³⁹ Kotamakinete bobo akikamun nesi konye abu nesi koburucaar kakanin kes.

⁴⁰ Kodokari nesi kitala je loka ang'ololo kanako Yordan, nama ebatisa Yoana kosodi nesi akideun kang'ina.

⁴¹ Apotu lu ipu kobutu nama keng'. Kotemarete kesi ebe, “Amam aumosit apede na esomate Yoana, konye araito abeite ng'unu kere nu enerit Yoana kuju ka etwan kalo.”

⁴² Abutu itung'a ipuaka kiyuutu nesi kang'ina.