Yakobo 4 - AKITUTUKET NAKITETET (NEPEPEKA ISABULIN KA AWARAGASIA)

Epaperone ka Akwap

¹ Ejie ka ang'olopa kere kama kus ai elomutere? Elomuto kotoma akote ka awate kus nu italakarto, nu ejiosi kotoma kus ng'in pa.

² Ikotosi osi iboro, konye mam osi kidumunete kesi, kanuka ng'unu ilokokina osi akiyara; ikotosi osi kesi ka agogong', konye mam osi kidumunete kesi, kolomete osi ang'olopa ka ejie. Mam osi kijatatar kiboro lu ikotosi osi naarai mam osi kilipete Akuju.

³ Bobo na ilipata osi, mam osi kidumunete, naarai awomomoosia kus eroko; ilipito osi iboro kanuka akitalakar awate kus.

⁴ Itung'a lu mam kemunokina! Mam osi kijenete ebe araus ipaupatin ka akwap erait araun ipading'a ka Akuju? Itung'a lu ekotosi araus ipaupatin ka akwap eraunete ikulopek ipading'atin ka Akuju.

⁵ Mam akiitunun ebe emam abeite ka agirasia nukalaunak nu ebalasi ebe, “Emoyo lokipiakini Akuju toma wok ileleba akote na ededeng'.”

⁶ Konye asianut na einakini Akuju oni icasit. Kwape ebalatatar Agirasia nukalaunak, “Eng'erit Akuju lu ipogasi, konye einakin asianut lu iyapeperasi.”

⁷ Kanuka ng'unu, koyong'ata Akuju. Kong'eroto Asatanit, kosodi nesi alepori kama kus.

⁸ Kikunyutu nama ka Akuju, kosodi nesi de akikunyun nama kus. Kilotasi akanin, osi lukarokusio! Kitalautu itauono kus, osi luka esoswai!

⁹ Kituriete, komonyete, bobo kiluluete; kibelokisi akwena kus korau akimonyo, alakara kus korau akituru!

¹⁰ Kiapeperasi koking'aren ka Lokapolon, kosodi nesi akikieun osi.

Akikwenyar kuju ka Atubonokin Ikiristayon Luce

¹¹ Ikanacan ka akanacan, mam akitoron nice. Kitoron ijo ikristayon luce kere atubokin kesi, Itoroni ijo ekisil ka atubokin. Kitubok ijo ekisil, mam bobo ijo kirait lo iyong'it ekisil, konye lo etubonokini.

¹² Akuju bon nesi lo einanakini ikisila ka ekatubonokinan. Nesi boni epedori alakun ka amudiar. Imunit ijo irait ijo ng'ai, lo itubokini itwan nice?

Akikwenyar kuju ka epogi

¹³ Kopupokisi eong', osi lu ibalasi ebe, “Lolo kere moi ilosete ore ece lokapolon, nama iboyata siong' ekaru epe ka ageun ebele ka adumuni ikabel lu ipuaka.”

¹⁴ Mam osi kijenete de ikoni akijar kus naki imoi ai! Iraito osi kwape ka apuru ka etaba, na epuruni atipet kosodi awoli

¹⁵ Nu itemokina osi ajori nesi nu: “Kere kecamuti Lokapolon, ijarete oni ka asoma nu kere kua.”

¹⁶ Konye kipokona ipogasi osi, bobo idelasi osi; edel kere bala ng'olo erono.

¹⁷ Kanuka ng'un, ng'in kere ni ejeni nu ideerete nu itemokina asoma konye komam kisomakini, esoma aronus.