Yakobo 3 - AKITUTUKET NAKITETET (NEPEPEKA ISABULIN KA AWARAGASIA)

Ang'ajep

¹ Ikanacan ka akanacan kang', mere lu ipuaka kama kus ekotokina araun lukesisianakinak. Kwape ijenata osi, siong' lukesisianakinak adumunet atubokino na epolo noi akilanya luce.

² Oni kere idiakanarete. Konye kemam itwan kediakari kojori keng', edolit nesi bobo ebekini nesi ayaite ejautene keng' kere.

³ Ipiakinete oni ibore akituk ka afarasit tetere kiyongi oni, kokipone kang'olo ibeikinete oni ayar nama ikotosi oni.

⁴ Kere k'itu ataker: Atikere kepolo bobo koyaite ekuwan lo epolo, eyaite ka ibore kani edite ni enyarite rada, kosodi alosite nama ekote lo eyait.

⁵ Nes ang'ajep: Kaditeu keng'; ebeikini epog kuju ka iboro ka lukapolok. Kitee ekipone lo elalar amoni ebeikino akinokin ka ikim kidiosi!

⁶ Ang'ajep esit bala akimi. Ejaasi ka akwap karokusio, eyiyarit alaro keng' kotoma awate wok bobo ka akisiarakin aronus ojautene wok kere. Inokini akimi ojautene wok kere ka akimi kana elomuni kamaka akimi na emam esial.

⁷ Epedori etung'anan akitapan bobo adau akitapan iboro luce lu esubite kere, ityeng' kiton ikwenyi nepepe ka ikole.

⁸ Konye emam itwan ipe ebeikini akidar ang'ajep. Erait asatanit bobo mam kebeikin akidario, ileleba ekeya lokatwanare.

⁹ Itosomaete oni ang'ajepa wok akiyalamikin Lokapolon Papa wok kiton bobo akiyalamikin itung'a luce, lu esubite kotoma aputo ka Akuju.

¹⁰ Akiro nuka akiyalamikin kiton nuka akilama ebukunosi ka akituk kang'ipekang'ini. Ikinacana ka akanacan kang', mam kitemokina akisomakin nu!

¹¹ Emam ecori lo ebukuni akipi nu ejim kanu edwaraka ka akong' kape kebekini alemuni akipi nuka ajimak kiton nukadwaraka ka akong' ka ape.

¹² Mam ekaererete, ikanacan ka akanacan kang' kebeikini akiraikin olive; mam ekitoi ka akinyete kiraikin araito ka ekaererete, kere de mam ecori loka acube kelemun akipi nuka ajimak.

Acoa alomuni kokuju

¹³ Ejaasi itung'a kiding' kus lu ecoaka ka akijene? Ejii kesi akitodun ka akijar kes kana ejokuna, ka asomisio kes nukajokak nu isomate ka akiyamara kiton acoa.

¹⁴ Konye kileleba itauon kus eding', apipilu, kiton ationusu, mam akitopolor ka ejori aliokonu kuju ka abeit.

¹⁵ Acoa kwape kang'in mam kelomuuti kokuju; erait naka akwap, erait naka asatanit bobo naka ipara.

¹⁶ Naarai nama ejii eding' kiton ationus, neni ejii ejie kiton aronus naka ng'olo ekipone.

¹⁷ Konye acoa na elomuni kokuju, nasodit, eliara; bobo de inapakina, iyapepera, ejaasi ka epaperone; ileleba akitim, iraikin araito nuka asoma nukajokak; elakakina kamaka asegara kiton esoswai.

¹⁸ Erait adolite araitoit na elomuut kamaka icoka kalu iraete lu eyauto aipuc.