Yakobo 2 - AKITUTUKET NAKITETET (NEPEPEKA ISABULIN KA AWARAGASIA)

Akikwenyari kuju ka Epogi

¹ Ikanacan ka akanacan kang', kwape kalukeyuunak Lokapolon Yesu Kristo wok, Lokapolon loka akibusesu, mam osi atyakatyaka itung'a.

² Kere kebu etwan atukot kus lo ebarit konapite epeta loka esawabu kiton inapen lu ejoka, bobo kobuni etwan lokapalapalan de enapit apuguoi,

³ Kitodik ijo etwan lo enapit kojokan ayong'it na epolo kosodi ijo alimokin nesi, “Kiboikin okicolong' lokajokan lo,” konye kalimokin etwan lokapalapalan, “koguo kama, kere kiboikin kwap ne akeju kang',”

⁴ kanuka ng'unu mam ng'in kerait atyakatyaka kokiding' kus? Kunuka ng'unu atyakun kus na mam kelomuti ka awomowomosia kanukaroko?

⁵ Kiirasi, ikanacan ka akanacan kang'! Abu Akuju koseu itung'a lukapalapalak luka akwap kana akitarauni luka abara kotoma akiyuun ka ajaus ka ajakaanut na asumunikit nesi ng'ulu lu eminasi nesi.

⁶ Konye imwarito osi lukapalapalk! Ng'ai icikakit osi ka arikorite osi king'aren kalukatubonokinak? Lu ebarito!

⁷ Eraito kesi lu ineras nukarokok kuju ka ekirori kalo elae lo adaun ainakin osi.

⁸ Ibunete osi asoma ibore ni ejokuna kiyong'ata osi ekisil loka Ajakanut, lo edumuni kotoma Agirasia nukalaunak, “Komina ipaduko kon kwape iminara ijo ilope.”

⁹ Konye kityakatyakaete osi itung'a, isomaete osi aronus, kanuka ng'unu kitoroni Ekisil osi bala luka bilaka ikisila.

¹⁰ Ng'in kere ni ebili ekisil epe, abili ikisila kere.

¹¹ Naarai lope ng'olo nesi abala, “Siri kidotee,” bobo de “Siri kiar.” Konye atikere kimam ijo kidotee, irau ijo nikabilan ekisil kiara ijo.

¹² Kinerasi ka asoma bala itung'a lu etubokino ka ekisil lo elakuni oni.

¹³ Naarai mam Akuju kejaikinosi ka akitimi etubokini nesi itwan ni kemam akitimi; konye akitim ilanyit atubokino.

Akiyuun kiton Asomisio

¹⁴ Ikanacan ka akanacan kang', anyena ajokun ejii itung'a atemar ebe ejaasi kesi ka akiyuun komam asomisio kes kitoduuto? Epedori akiyuun ng'in alakun kesi?

¹⁵ Abo kere kejaasi ikanacan kere akanacan lu ekotosi inapen bobo emam lu ilesikina akinyama.

¹⁶ Inyena ajokunu ejii alimokin kon kesi ebe, “Kisirereng' Akuju osi! Kiiraritete amwanus ka akinyama kojokan!” Kimam osi kinakinete kesi inyamen?

¹⁷ Kanuka ng'unu, akiyuun bon emam asomisio etwanit.

¹⁸ Konye etemari itwan ice ebe, “Itwan ipe ejaasi ka akiyuun, ice ejaasi ka asomisio.” Akinyakunet kang' erait, “Kitodiki eong' ekipone lo ebeikina itwan ipede ajaus ka akiyuun komam asomisio. Ketodikini eong' ijo akiyuun kang' kotoma asomisio kang'”.

¹⁹ Ijaasi ijo ka akiyuun ebe ejii Akuju ape bon? Ejokuna! Ipara de ejaasi ka akiyuun bobo icekete ka akurianu.

²⁰ Ebang'ai lo! Ikote ijo kitodikine ijo ebe akiyuun emam asomisio emam asoma?

²¹ Kikoni Aburaam loka asonya wok edumuni adolit kamaka Akuju ai? Arait akitoro asomisio keng', na alemuna okoku keng' Isaka ka alitari.

²² Mam ijo kitee? Akiyuun keng' kiton asomisio abutu kasomata nenipe; abu kitodolikine akiyuun keng' akitoro asomisio keng'.

²³ Kosodete agirasia nukalaunak akisomakin nukigirite ebe, “Kiyuut Aburaam Akuju, kanuka akiyuun keng' kocamuni Akuju nesi bala lo edolit”. Kanuka ng'unu konyaraunete Aburaam opaupa ka Akuju.

²⁴ Ianyuutu konye osiebe erait ka asomisio ka itung'a nesi etaraunere kesi lu edolito kama ka Akuju, mere ka akiyuun kes bon.

²⁵ Arait kong'ipe kong'in ka amalayata Raab. Etaraunete nesi na edolit kama ka Akuju kotoma asomisio keng', kanuka akidiaun luka moaka luko Israel bobo ka akitisii kesi koroto kece.

²⁶ Kanuka ng'un, kwape ka akwan emam emoyo etwanit, kokipone kalope kang'olo akiyuun emam asomisio etwanit.