Yakobo 1 - AKITUTUKET NAKITETET (NEPEPEKA ISABULIN KA AWARAGASIA)

¹ Alomuni kamaka Yakobo, ekejaanakinan ka Akuju nepepe ka Lokapolon Yesu Kristo. Emalan namaka itung'a kere ka Akuju lu isiarakina akwap kere.

Akiyuun kiton Acoa

² Ikanacan ka akanacan kang', koanyut osi ikulopek irereng' osi na ebuniata atamisio kere nu egelegela nama kus,

³ naarai ijenete osi ebe na ilanya akiyuun kus atamisio bala ng'unu, adumunet erait apedor naka atitinyu.

⁴ Kojaasi ka abeite ebe atitinyu kus kiyari osi akitodolo asial, tetere osi iraito lu edolito ka akilesikina, mam kikadito ibore ipede.

⁵ Konye kejii ipede kama kus ekadit acoa, ejii osi akilip Akuju, lo einakin osi; naarai Akuju ekori mam kesee konye ekori itung'a kere ka asianut.

⁶ Konye ilipete osi, ejii osi akiyuun komam abuonokini apede. Ng'ini kere ni ebuonokini eputosi ka ekokoro kakare lo ekutarit ekuwam.

⁷ Itung'a kwape ka ng'ulu, mam kebeikinete atyakun ka adama kes,

⁸ mam kejenete nu isomaete, mam kesi awomowomo ebe edumunete ibore ipede alomuni kamaka Lokapolon.

Apalupalut kiton Abara

⁹ Ikristayon ng'ulu lu epalipalito ejii alakar na isirereog'ia Akuju kesi,

¹⁰ Ikristayon lu ebarito ejii kesi alakara na inyakuna Akuju kesi kwap. Naarai lu ebarito etuborosi bala aturo ka ekitoi loko okitwi.

¹¹ Elomun akolong' ka amwanus keng' ka akichweikin ekitoi; edacunosi aturo keng' kwap, kosodi akibusu keng' amunari. Kokipone kalope kang'olo, lu ebarito emunaro ering'a isomaete ebele kes.

Akitetemoor kiton Akitama

¹² Isirereng'ite ng'ulu lu ideunos emunokina kotoma atamisio, naarai na etuborototor kesi atamasia kwape kang'un, edumunete eropit kes lo erait akijar na isumunikiit Akuju lu eminasi nesi.

¹³ Kedumut itung'a atamisio kwape kang'unu, mam kesi atemari, “Atamisio nu elomuto kamaka Akuju.” Naarai mam kebeikino akitama Akuju kanukarokok, bobo mam nesi elope kebeikini akitama itwan ipede.

¹⁴ Konye itung'a edumunete atamisio na ikunyarata kesi awai kosodete akikamun ka akiro kes kanukarokok.

¹⁵ Kosodi akote kes nakaronon akidoun aronus; bobo aronus, kedau apoloun, idouni atwanare.

¹⁶ Mam acamun aliokonu, ikanacan ka akanacan kang' lu minan!

¹⁷ Edutat kere lokajokan kiton edutat kere lo edolit elomuni kokuju; ebuni kwap alomun kamaka Akuju, lokasuban acaus nako kuju, lo mam kibelokin kere lo eyauni akirionus ka akibelonokin.

¹⁸ Ka amina keng' ka elope koyaun oni ajaus kotoma akirot naka abeite, tetere idumunete oni alaro nako king'aren kamaka kalu kesub nesi kere.

Akipup kiton Asoma

¹⁹ Kiitutu nu, ikanacana ka akanacan kang'! Ng'ini itwan kobenen akipup konye komam kebenen ejori, bobo komam kebenen anyunyurari.

²⁰ Anyunyura ka etung'anan mam kedumuni atenikina na edolite naka Akuju.

²¹ Kanuka ng'unu kolemasi asiilianut kere ka iponosio kere lukarokok, kibirokinosi akejen ka Akuju ka acamun akirot na iraikini nesi otauon kus, na ebeikini ayuuni osi.

²² Konye koraitete lu isomaete kwape ekotore akirot, mere lukapupok bon, ing'alasi osi ikulopek.

²³ Naarai kerait itwan ni epupi akirot konye komam kisomae kwape ebalare akirot, eputosi nesi ka etwan lo itee aputo keng' kwape ejaare ka akio.

²⁴ Eng'olekini nesi akwana keng' ka elope kosodi nesi aikar bobo atipet imuruokini nesi ekipone lo eputore nesi.

²⁵ Konye nesi ni itee ekisil lo edolit lo elakuni itung'a, ni itolosit atupite, konye mere akipup along'u ka akimuruokin, konye kisomae nu ekote ekisil, itwan ng'in isirereng'io kang'in bore ni isomae nesi.

²⁶ Kitee itwan epede erait nesi nika edini, konye komam kitee ang'ajepe keng', edini keng' mam kileskina ibore, aliokonu bon.

²⁷ Edini lo elae komam ang'walu koking'aren ka Akuju ka Papa nesi lo: Aking'arakin ikokiok kiton apuseru kocani kes ka akidara ijo elope ejautene koni komam akwap kemunauni ijo.