Tito 3 - AKITUTUKET NAKITETET (NEPEPEKA ISABULIN KA AWARAGASIA)

Iponosio ka Ekristayot

¹ Kisitokisi itung'a kus ayong'ite lu ipugaete kiton lukapolok, koyong'ata kesi, kiton alokokina asoma nu ejoka kokipone kere.

² Kolimokisi kesi mam ejori nukarokok kuju ka itwan ipede, konye kojaasi ka aipuc kiton epaperone, bobo ng'in pak kitodutete ejautene loka akiyamara kamaka ng'ini itwan akolong' kijoni.

³ Naarai oni ikulopek ka apak kace ibang'aka, mam oni kiyong'ara, bobo idiakarito oni. Iraito oni ibulesun lu akotosi iboro luka etau kiton iboro lu italakarito kere. Idautu oni akitosoma akijar wok kotoma aronus kiton alilit; ice ang'erito oni, bobo oni de ing'erito kesi.

⁴ Konye na apukorere arimanut kiton amina ka Akuju Loketajaran wok,

⁵ abu nesi kolaku oni. Mere kanuka ajokusio apede kanu kisomato oni ikulopek, konye kanuka asianut keng' ka elope nes kelakuna nesi oni, kotoma Omoyo Lokalaunan, lo einanakini oni akidouno nakitetet kiton akijar nakitetet ka kilong' oni.

⁶ Kobuku Akuju Emoyo Lokalaunan nama wok kotoma Yesu Kristo Loketajaran wok,

⁷ tetere ka asianut keng' itodolikino oni ka Akuju bobo ka araun ikulopek akijar na mam kedaun na imunikito oni.

⁸ Erait lo ejori loka abeite. Akote eong' ijo akitogogongor akiro nu, tetere ng'ulu lu iyuuto Akuju ipiakito adama kes ainakiite akolong' kes asoma asomisio nu kajokak, nu ejoka bobo ing'arakito ng'in itwan.

⁹ Konye kinyekis apega naka abang'anut, iroria ka lukasonya lu ipu, ang'olopa, kiton ejie kuju ka ikisila. Mam kesi adumunet.

¹⁰ Koinaki ng'ulu lu eyauto atyakatyaka akwenyareta aare, bobo mam ajaus ka ibore kipede ka kesi.

¹¹ Ijeni ijo ebe itung'a kwape ka ng'ulu ebosito, bobo arokusio kes itoduto ebe ediakarito kesi.

Akisisianakino nake esial

¹² Na ejukuna eong' Artemas kere de Ticicus nama koni, kotamaki cut abunore nama kang' ko Nikopoli, naarai adau eong' atyakun akiboi kane apaarasia nuka akiru etaa ci.

¹³ Kotamak cut aking'arakin Sena lokatubonokinan kiton Apolo kogeutete elotote kes, bobo kotamak cut ainakin kesi ng'ini ibore ni ekotosi kesi.

¹⁴ Ejii itung'a wok akisisiaun akitosoma akolong' kes asoma nu ejoka, kanuka adumun iboro lu ekotokina; mam kesi akijar na mam adumunet.

¹⁵ Kimalato osi ng'ulu kere lu ejaasi ka eong'. Koinakisi amalan kosi ipoupatin kotoma akiyuun. Kojii asianut ka Akuju ka osi kere.