Tito 2 - AKITUTUKET NAKITETET (NEPEPEKA ISABULIN KA AWARAGASIA)

Akisisianakino na ejokuna naka Akiro ka Akuju

¹ Konye osi, kisisianakisi nu einakinete Akiro ka Akuju adumunete.

² Kicoro imojong' mam amera, kocoaka, koyaitos ikulopek kojokan; kojoka kotoma akiyuun kes, kominasi, bobo kojaasi ka atitinyu.

³ Kokipone kalope kang'oli kicoro aberu nu mojong' kojaasi kwape ekotokinare aberu nu eyaito akijar nakalaunan asoma. Mam kesi arausi nuka elodo kere ajooloi nuka ebinu. Ejii kesi akisisianakin nu kajokak,

⁴ kanuka akisisianakin aberu nu katumunaka amina ikilioko kes kiton idwe kes,

⁵ koraasi nu eyaitosi akulopek bobo kolaete, bobo koraitete aberu nuko otogo nu ejoka nu eyong'ito ikilioko kes, tetere mam itwan ni inera nukarokok kuju ka akirot na elomuni kamaka Akuju.

⁶ Kokipone kalope kang'olo, kicoro ikilioko lukatumunak koyaitosi ikulopek.

⁷ Kotoma ng'in ibore ejii ijo elope araite lo ijaasi ka iponesio lu ejoka. Komunokina ka akicasite kotoma akisisianakino kon.

⁸ Kitosoma akiro nukajokak nu mam kitepegio, tetere itisilikino ipading'atin kon kokipone kalo mam kedumunata ibore ipede ni elimunete kuju wok.

⁹ Ejii ibulesun koyong'ite lukapolok kes bobo ka akitalakarite kesi koboro kere. Mam kesi abong'onokin kesi

¹⁰ kere akoko kama kes. Konye, ejii kesi akitodun ebe ejoka kesi ng'in pak bobo emunokina kesi, kanuka ayaun ajokun akisisianakino kuju ka Akuju lokeketajaran wok kotoma ng'in bore ni isomaete kesi.

¹¹ Naarai apuko Akuju asianut keng' kanuka alakun itung'a kere.

¹² Isisianakini asianut oni akinyekin akijar na mam kecoit Akuju kiton akote ka etau iboro luka akwap, ka akijar iyaitoi ilope, idere, ka ajaus ka akijar naka Akuju ka akwapa kana,

¹³ iring'a oni idarito apaaran naka asuluwany na imunokito oni, na etakanunere akibusesu ka Akuju wok kiton loketajaran Yesu Kristo.

¹⁴ Kolemun nesi elope kanu wok, ayuun oni kamaka arokusio kere bobo ka akitaraun oni itung'a lu elaete cut lu eraito lukeng' boni, bobo elokikina asoma nu ejoka.

¹⁵ Kisisianak iboro luka akitosoma apedor kon kere inakiit ijo kesi etau lokajokan kiton akiretakin lu epupete ijo. Mam ipede kama kes akitamamun ijo.