Tito 1 - AKITUTUKET NAKITETET (NEPEPEKA ISABULIN KA AWARAGASIA)

¹ Alomuni kamaka Paulo, ekejaanakinan ka Akuju kiton ekiyakia ka Yesu Kristo. Apon koseune eong' ka akijukiar eong' aking'arakin akiyuun ka itung'a lu eseut Akuju ka ayaite kesi abeite na isisianak edini wok,

² lo ejii kuju ka amunokina ka akijar na kikaru kere. Akuju na mam king'alae, abu kitumunik oni akijar na ering'a akwapa kesuba,

³ konye ka apak kana itemokina kopuko nesi akirot keng'. Koinakine eong', kasodi eong' alimor akirot na atupa ka akicorasit ka Akuju Loketajaran wok.

⁴ Egiri eong' nama ka Tito, okoku kang' loka abeite kotoma akiyuun na imorete siong'. Koinak ijo Akuju Papa kiton Yesu Kristo Loketajaran wok asianut kiton aipuc.

Asoma ka Tito ko Krete

⁵ Abu eong' kenyek ijo ko Krete, tetere itenakini ijo iboro lu akotokina asoma bobo ka aseun imojong' luka ekanisa kang'olo tauni. Kitute acorasia kang':

⁶ Lukapolok komam aronus; kojaasi ka aberu kape bon, idwe keng' koraito lu emunokina, komam keraito ikokolak kere de lu mam keyong'ito.

⁷ Naarai lokapolon ka ekanisa epolokit asoma ka Akuju, nesi amamus ka aronus. Mam nesi ajaus ka epogi kere de lo edodor etau anyunyurari kere de emerana kere akutukanut kere ajaus ka emuwane loka ikabel,

⁸ konye koraite lo idiaunene itung'a bobo komina nu ejoka, ejii nesi ayaite ejautene keng' kojokan, idere, lokalaunan bobo kojaasi ka iponosio lukajokak;

⁹ ejii nesi akirumite ka agogong' akirot naka abeite kwape kisisianakinere, kokipone kalo ebeikini nesi akitogogong' luce kasisianakino kanaka abeite bobo de ejii akitodun adiakarete ka ng'ulu kalu itepegete.

¹⁰ Naarai ejaasi lu ipuwaka, kacut lu alomutu kodini ka Iyaudin, lu emenito ka aking'ala luce ka abang'anut kes.

¹¹ Ejii akirebokin ejori kes, naarai isialete kesi ireria kere ka akisisianakin nu mam kekotokina kesi akisisianakin, isomaete kanuka asilutu kanuka adumun ameda naka ikabel.

¹² Epe kama kes kikulopek, ekadwaran lo kes kikulopek, abu kotema, “Ikretayon eraito lukaliokok, ityeng' lukarokok, ikalanyak luka emwane.”

¹³ Kanuka ng'unu, ejii ijo akiretakin kesi kadedeng'u, tetere kesi ejaasi ka akiyuun na eng'ale

¹⁴ kinyekisi acoite akiro ka Iyaudin kiton acorasia ka etung'anan nu elomuto kamaka itung'a kalu ang'eroto akiyuun abeite.

¹⁵ Elaete iboro kere kamaka ng'ulu kalu elaete; konye mam ibore ipede ni elae kamaka ng'ulu kalu emunauna kiton amamus ka akiyuun, naarai adama kes kiton awomowomosia kes emunauna.

¹⁶ Ebalasi ebe ejenete kesi Akuju, konye kasomisio kes eng'erito. Ereitosi kesi bobo komam keyong'ara, mam esi kilesikina asoma ibore ipede nikajokan.