Matayo 9 - AKITUTUKET NAKITETET (NEPEPEKA ISABULIN KA AWARAGASIA)

Itang'aleuni Yesu Etwan Lo Iteregegara

¹ Kolomi Yesu ataker, kabong'or jewai ka akare, otaun keng' ka elope,

² nama keyaunata itung'a nama keng' etwan lo eteregegiara, eperi ka apetat. Nape kaanyuna Yesu akiyuun na kejaasi ka kesi, kolimokini etwan lo eteregegiara, “Kolakar, okoku kang'! Arimakin arokusio kon.”

³ Kosodete ikesisianakinak ice ka Ikisila alimonokin, “Ikeni etwan lo Akuju!”

⁴ Kojenuni Yesu nu kewomowomoete kesi, kanuka ng'unu kotemari, “Inyo iwomowomota osi iboro lukarokok?

⁵ Inyena etapana, atemar, ‘Arimakin arokusio kon,’ kere atemar, ‘Konyou, kolot?’

⁶ Konye tetere ijenunete osi ebe ejaatatare Okoku ka Etung'anan ka apedor kakwap naka arimakini arokusio.” Kosodi nesi alimokin lo eteregegiara, “Konyou, kirum apetat kon, kolot ore.”

⁷ Konyouni nesi koikari ore.

⁸ Na aanyunata itung'a ng'unu, kokuriakaarosi kesi, kosodete akituru Akuju kanuka ainakini itung'a apedor kwape kang'in.

Enyarauni Yesu Matayo

⁹ Keloma Yesu kalaro kang'ini, kwaanyuni nesi etwan lokenyarite Matayo, iboye ko otogo kalo irarere emusolo; kolimokini, “Kotup eong'.” Konyouni Matayo ka akitup nesi.

¹⁰ Ering'a Yesu enyemi ko otogo ka Matayo, kobunete lukerarak emusolo ipu noi nepepe kalukarokusio, ka akimorikikin ka Yesu ka ikiyakia keng' akinyam.

¹¹ Nape kaanyunata Ifarisayon nu, king'isete ikiyakia ka Yesu, “Inyo enyemiata lokesisianakinan kus nenipe kalukerarak emusolo ka itung'a lukarokusio?”

¹² Konye nape kiirara Yesu nukebalasi, kotemari, “Lu eng'aleete mam kekotosi lokemadan, konye ng'ulu lu edekasi.

¹³ Kolototo kisisiautu apolou ka akirot kana: ‘Akote eong' asyanutu, mere isuban.’ Naarai mam eong' kabuuti anyaraun lu edolito konye lukarokusio.”

Aking'itasit kuju ka Akilip Ikanyo Eteng'e

¹⁴ Kosodete ikiyakia ka Yoana Lokebatisan alosite nama ka Yesu, ing'isito, “Inyo ilipiata siong' ka akikany eteng'e nenipe ka Ifarisayon konye mam cut ikiyakia kon kikanyete eteng'e?”

¹⁵ Kobong'okini Yesu kesi, “Ikotosi osi kituuriete ipejok ka emanyit ejaasi kesi nenipe ka eteran? Mam kebeikinosi! Konye ebuuti apaaran na elemarere eteran kama kes, nesi ilipiata kesi ikanyete eteng'e.

¹⁶ “Emam itwan ni edapakini apugo nakitetet akoti na amojong'it naarai ikamakin apugo ng'in ka aditiar, kosodi anyaar nama kecilil.

¹⁷ Kere de emam itwan ni ebukokini ebino lokitetet ocwe lomojong'it lo itenite ka emukule, naarai egwang'arosi imukulei kosodi ebino abukor kosodete imukulei amunaun. Konye ebino lokitetet ebukonokino ocwe lokitetet lo itenite ka imukulei. Kikokin kong'in, mam icwei lu itenite ka imukulei kegwang'arosi, bobo mam ebino kebukor.”

Akoku ka Ofisa kiton Aberu na kejorori Enaga ka Yesu

¹⁸ Ering'a Yesu inera, kobuni ofisa ka Iyaudin nama keng', kokukokin nama keng' ka atemar, “Atwana akoku kang' kipokona; konye kobu, kidokok akanin kon nama keng', ejaruni nesi.”

¹⁹ Konyouni Yesu, nenipe ka ikiyakia keng' ka atupari nesi.

²⁰ Atipet, kobuni aberu na aiye aokot ikaru itomon ka iare, kojorori esial ka enaga keng'.

²¹ Naarai kebala ko otau keng' ebe, “Kajoro eong' usa enaga ka Yesu, ang'aleuni eong'.”

²² Kibong'i Yesu, kosodi anyuni aberu ng'ini, kolimokini, “Kolakar akoku kang'; etang'aleu akiyuun kon ijo.” Kanepe kaneni, kong'aleuni aberu.

²³ Na kelomia Yesu otogo kaloka apugan, koanyuni lukakutak auleru ka itung'a ipuaka emonyete,

²⁴ kotemari, “Kolomasi; naarai mam apese ketwanit konye ejotoe.” Kosodete akwenare nesi.

²⁵ Konye kedaun akijukiar itung'a king'a, kolomi Yesu toma otogo ka apese, kirumi apese ng'ini kakan, kosodi apese anyouni.

²⁶ Abutu akiro ng'unu kisiarakinosi ng'ini alaro kakwap kang'ini.

Itang'aleuni Yesu Lu emudukaka Iare

²⁷ Keloma Yesu kaneni, kigwapete nesi lu emudukaka iare emonyete koporoto kaloko kuju, “kitimi siong', Okoku ka Daudi!”

²⁸ Kelomo nesi otogo, kobunete lu emudukaka iare nama keng'; Kosodi Yesu aking'it kesi, “Imunokiito osi ebe abeikiit eong' akitang'aleun osi?” Kosodete akinyakakin nesi, “Eebo, Lokapolon.”

²⁹ Kojorori akonyen kes ebala, “Kisomakinosi nama kus atupa ka akiyuun kus.”

³⁰ Kong'aarosi akonyen kes. Kikwenyari Yesu kesi, “Kitetee, mam itwan ipede ajenun nu.”

³¹ Konye kolomarete ka akisiarakin akiro kuju ka Yesu akwap ng'in kere.

Itang'aleuni Yesu Etwan lo mam Abekiit Ejori

³² Elomarete kesi, koyaunete etwan lo mam abeikiit ejori lo kelomito ajokin nama keng'.

³³ Nape kireng'iarere ajokin, kogeuni etwan lo mam abeikiit ejori akinamanama; koumokisi itung'a, ebalasi, “Mam cut kaanyuna ibore ipede kwape ka eni ko Israel!”

³⁴ Konye kosodete Ifarisayon atemar, “Ireng'ianari ajokin kapedor kanaka ejakait kaloka ajokin.”

Isonie Yesu Itung'a

³⁵ Kirimok Yesu ireria kaduketa, isisianakini ko otogoi luka alipasia ka Iyaudin kes ka akisiarasiara akiro nukajokak nuka ajakaanut ka akitang'aleuni adekasinoi kere ka ariebasinoi kere.

³⁶ Na kaanyuna nesi itung'a lu ipwaka, kisonie nesi kesi naarai kisuburaarite kesi kwape ka amerekikin kanu emam lokejokon.

³⁷ Kosodi alimokin ikiyakia keng', “Epolo akidweny, konye edisiaka lukadwenyak;

³⁸ kanuka ng'unu kilipata elope loka akidweny, kijuk lukadwenyak akidweny keng'.”