Matayo 8 - AKITUTUKET NAKITETET (NEPEPEKA ISABULIN KA AWARAGASIA)

Itang'aleuni Yesu Etwan Loka eng'ulo

¹ Kedoku Yesu komoru, kotupete nesi itung'a lu epuwaka.

² Atipet Kosodi etwan lokikamuut eng'ulo abunore nama keng', kokukokini, kilipi, “Lokapolon, kicamuut ijo, ibeikini ijo akitalaun eong'.”

³ Korwaari Yesu akani keng' kosodi ajorori nesi, ebala, “Akote eong'; kitalauni.” Atipet kong'aleuni.

⁴ Kosodi Yesu alimokin nesi, “Mam alimokin itwan ipede kuju kanu esomakinosi; konye kolot, kitoduun kamaka esaseredootit, kolem idutan lu ketemarit Musa alemun korau akitodiaret kamaka itung'a.”

Itang'aleuni Yesu lokejaanakinan ka Ofisa loko Roma

⁵ Na kelomia Yesu Kapernaum, kobuni lo epolokiit luka ajore akwatat nama keng' ka akimaima nesi,

⁶ ebala, “Lokapolon, eperi lokejaanakinan kang' iteregegiara kore, erieba noi.”

⁷ Kinyakak nesi ebe, “Abuni eong' ka akitang'aleun nesi.”

⁸ Konye kosodi lokepolokiit eriong'et akinyakakin Yesu ebala, “Lokapolon, mam eong' kilesikina akidiaun ijo ko otogo kang'; konye kolim akirot, kosodi lokejaanakinan kang' ang'aleun.

⁹ Naarai arai eong' etwan lo ejii kwap ka apedor, ajaasi eong' ka ajore kwap kang'. Alimokini eong' epe, ‘kolot,’ kosodi alosite. Alimokini eong' ice, ‘kobuni,’ kosodi abunore. Alimokini eong' ekejaanakinan kang', ‘Kisomak nu,’ kosodi akisomakin.”

¹⁰ Na kiirara Yesu ng'unu, koumok, kosodi alimokin luketupito nesi, “Kalimokini eong' osi, mam eong' apelem kadumuut itwan ipede ka akwap kanako Israel ni ejaasi ka akiyuun kwape kana.

¹¹ Kalimokini eong' osi abeite ebe ebunete itung'a lu ipu alomuni ko kide ka to, kakinyam nenipe ka Abraam, ka Isaka, ka Yakobo kajakaanut kanako kuju.

¹² Konye ng'ulu lu ibusakinit ajaus ajakaanut nako kuju ecakaro king'a akirionus nama emonyata kesi ka akiriare ikial kes.”

¹³ Kosodi Yesu alimokin ejakait, “Kolot ore! Ng'un nu iyuut ijo kisomakine ijo.” Kong'aleuni ekejaanakinan ka ejakait akolong' ng'ipeng'in.

Etang'aleu Yesu Itung'a Ipuwaka

¹⁴ Na kelomia Yesu otogo ka Petero, koanyuni akamuran keng' eperi edeka, emwanikina akwana.

¹⁵ Kojorori nesi akani keng', kinyekini amwanus nesi, konyouni ka akijaanakin nesi.

¹⁶ Na kedolia ebong', koyautu itung'a nama ka Yesu lu ipu lu alomito ajokin nama kes. Kireng'iari Yesu ajokin ng'unu kakirot, ka akitang'aleuni lukedekasi kere.

¹⁷ Kisomae nesi nu aitodolikin nu kedauti Ekadwaran, Isaya, alimun araun abeite ebe, “Alema nesi elope ariebon wok ka akigwokar adekasinei wok.”

Lu Itemokina araus Lukatupitok ka Yesu

¹⁸ Na kaanyuna Yesu itung'a lu ipu imanakito nesi, kicorakini ikiyakia keng' adokar kitala je ka akare.

¹⁹ Kobuni nama keng' ekesisianakinan ka Ikisila ebala, “Ekesisianakinan, atupi eong' ijo ng'ini alaro na ilosi ijo.”

²⁰ Kinyakakini Yesu nesi, “Ejaasi ikweei ka aduyon, ejaasi ikweny ka ailita; konye Okoku ka Etwan emam alaro eperi ka akiyeng'un.”

²¹ Kosodi ekiyakia ece alimokin Yesu, “Lokapolon, kinyek bere kaloto eong' akinuk papa kang'.”

²² Konye kinyakakini Yesu nesi ebala, “Kotup eong', kinyek lukatwak konukata lukatwak kes.”

Isinapikin Yesu Eng'eso

²³ Na kelomia Yesu ataker kotupete ikiyakia keng' nesi.

²⁴ Atipet kogeuni eng'eso kang'olol, koapiari ataker akilum. Konye kejotoe nesi.

²⁵ Kosodete ikiyakia alosite nama keng' kakitonyoun nesi, ebalasi, “Koyuune siong', Lokapolon; apu siong' atwakare!”

²⁶ Kolimokini kesi, “Inyo ikuriaka osi, Okwai itung'a luka akiyuun kana edit?” Konyouni nesi, kiretakini ekuwan ka ang'olol; kojaikin akinapakina na epolo.

²⁷ Koumokisi ikiyakia ebalasi, “Erait lo etwan loka ekipone kali, eyong'ito nesi ekuwam ka ang'olol de?”

Itang'aleuni Yesu Itung'a Iare lu alomito ajokin

²⁸ Na kedolia Yesu jewai, kakwap kanakenyarite Gadarenesi, kosodete itung'a iare lu kelomito ajokin akiriamakin ka nesi, elomuuto ka atesin, ededeng' na kemamare itwan ipede kebeikit akitor oroto ng'ol.

²⁹ Atipet, kilulukinete, “Anyeka nukon ka siong', Okwai Okoku ka Akuju? Ibu ijo ne akisican siong' ering'a akolong' kedolo?”

³⁰ Kanep kaneni kejii esipan ka ipegei lu adakasi.

³¹ Kosodete ajokin akimaima Yesu ebalasi, “Kireng'ia ijo siong' king'a, kijukia siong' osipan ka ipegei je.”

³² Kolimokini Yesu kesi, “Kolototo.” Kolomunete, Koikarete akilom opegei; atipet, kosodi esipan kere amotari eleliaarit akare, kolumete ka akipi.

³³ Kokerata lukejokok ipegei, kolomete otaun, kalimokin itung'a akapolok kere kiton ng'unu kere nukebuutu kisomakinosi kamaka itung'a lu kelomito ajokin nama kes.

³⁴ Kosodete itung'a kere ko otaun alomari anyun Yesu; nape kaanyunata nesi, kosodete akilip nesi koika kakwap kes.