Matayo 7 - AKITUTUKET NAKITETET (NEPEPEKA ISABULIN KA AWARAGASIA)

Atubonokin Luce

¹ “Mam atubonokin luce tetere mam Akuju kitubokini ijo de.

² Naarai etubokini Akuju ijo kokipone kalope kang'oli lo itubonokina ijo luce, itosomae nesi kama kon ikisila lupe ng'ulu lu itosomae ijo kamaka luce.

³ Inyoo iteo ijo ibore ka kong' ka onac kon konye mam ijo kitee ibore ni ejii akong' kon ka elope?

⁴ Kere de ikoni ijo ilimokini onac kon ai, ‘Kicamit kinyek kalema eong' ibore ng'in ka akong' kon,’ konye ijaasi ijo de ka ibore akong' kon?

⁵ Ijo nika esoswai! Kolema bere ibore ni ejii akong' kon nesi ibeikina ijo anyun tena ka alemar ibore ka kong' ka onac kon.”

⁶ Mam ainakin ing'okwo iboro lukalaunak, ebong'okinete ka alomikin ijo. Mam acakakini ipegei amoru nu epolo adumunet naarai ebunete akipuda.

Kilip, Komoo, Kikong'ok

⁷ “Kilip, kiinakino ijo; komoo, kosodi ijo adumuni; kikong'ok, king'akino ijo.

⁸ Naarai ng'ini itwan ni ilipi, einakino; ng'ini itwan ni ekote, edumuni; ng'ini itwan ni ikong'ikong'i, eng'akino.

⁹ Kere ng'ai kama kus, kilip ikoku keng' emugati kosodi ainakin amoru?

¹⁰ Kere de kilip ekoleit, kosodi ainakin emun?

¹¹ Kijenete bere osi lu lukarokok kona, ainakin idwe kus idutan lukajokak, ekipone ali einakina Papa kus lo ejii toma kuju osi iboro lukajokak!”

¹² “Kanuka ng'unu, nu ikote ijo kisomakisi itung'a ijo, kisomak kesi; naarai lo nes Ekisil ka Musa ka akisisianakino ka ikadwarak.”

Erute lo Ediding'

¹³ “Kolomata ko orute kalo ediding'; naarai elala erute, bobo etapana eroto, lo idirarit amudiaro, bobo ng'ulu lu elomete ko oroto kang'olo ipuaka.

¹⁴ Konye ediding' erute, bobo icasit eroto lo idirarit akijar; bobo edisiaka itung'a lu edumunete eroto ng'oli.”

Ekitoi kitoni Araito keng'

¹⁵ “Kocoikinosi ka ikadwarak lukaliokonu, lu ebunete nama kus enapito inapen ka amerekekin konye kotoma kes eraito ipeen.

¹⁶ Ijenunete osi kesi ka araito kes. Edeng'unono emusabibu kokokwa? Kere araito ka ekaererete ko okodokodo?

¹⁷ Kanuka ng'unu, ekitoi kere lokajokan ileleng'i araito nukajokak, konye ekitoi lokaronon ileleng'i araito nukarokok.

¹⁸ Ekitoi lokajokan mam kileleng'i araito nukarokok. Kere ekitoi lokaronon akileleng' araito nukajokak.

¹⁹ Ekitoi kere lo emam kileleng' araito nukajokak ejepakino kwap kocakakinete toma akimi.

²⁰ Kanuka ng'unu ijenuni ijo kesi karaito kes.

Mam Eong' Kajeni Osi Cut

²¹ “Mere ng'in itwan ni enyarit eong', ‘Lokapolon, Lokapolon,’ elomi Ajakaanut nako kuju, konye ng'in bon ni isomae nu ekote Papa kang' loko toma kuju.

²² Apaaran ng'ini, elimokinete eong' lu ipuaka, ‘Lokapolon, Lokapolon, mam siong' kadwarito ko okiror kon, ka akireng'iar ajokin ko okiror kon, ka asoma nu ipuaka nukagogong' ko okiror kon?’

²³ Neni nesi alimokina eong' kesi, ‘Mam eong' kajeni osi cut. Koikasi kama kang', osi lukarokok!’

Iare Lukadukok Etogo

²⁴ “Ng'ini kere ni iirari akiro kang' nu, ka asoma, eputosi ka etwan loka acoa lo aduki etogo keng' kuju ataaba;

²⁵ kosodi akiru adoore; kobuni akaale; kokutuni ekuwam lokapolon noi lo kijang'ijang'i etogo ng'oli, konye mam akibirori, naarai kedukokiite ataaba.

²⁶ “Itwan kere ni iirari akiro kang' kong'eri akitup, eputosi ka etwan lo ebang'ana lo kedukokini etogo keng' asing'e;

²⁷ kodoe akiru, kobuni akaale; kokutuni ekuwam lokapolon noi lo kijang'ijang'i etogo ng'oli, kibiror; kepolo akibiror ng'in.”

Apedor ka Yesu

²⁸ Kedau Yesu awaragasia nu, koumokinete itung'a lu ipu akisisianakino keng',

²⁹ naarai kebu nesi kisisianak kesi kwape kang'oli kalo kejaatatar ka apedori mere kwape ka lukesisianakinak kes.