Matayo 5 - AKITUTUKET NAKITETET (NEPEPEKA ISABULIN KA AWARAGASIA)

Akisisianakino Ka Yesu ejii Moru 5:1—7:29

¹ Nape kaanyuna Yesu itung'a ipuaka kodoki moru, kakiboikin kwap. Kobunete ikiyakia keng' nama keng',

² Kogeuni akisisianakin kesi.

Alakara naka Abeit

³ “Erereng' ng'ulu lukapalapalak kotawon, naarai ajakaanut nako kuju erait na kes.!”

⁴ Erereng' ng'ulu lu ituriete, naarai ebuni Akuju aking'aing'a kesi.

⁵ Erereng' ng'ulu lu eyong'ara, naarai einakini Akuju kesi akwap.

⁶ Erereng' ng'ulu lu ekotosi itawon kes asoma nu ekote Akuju, naarai isimonikino kesi.

⁷ Erereng' ng'ulu lu itimoko, naarai itimi Akuju kesi.

⁸ Erereng' lu elaete itawon, naarai aanyunete kesi Akuju.

⁹ Erereng' ikapucok, naarai enyarauno kesi idwe ka Akuju.

¹⁰ Erereng' ng'ulu lu isicanio kanuka adolit naka abeite, naarai ajakaanut nako kuju erai nakes.

¹¹ Irereng' osi erasete itung'a osi kakisican osi, kagamanakin osi akiro kere nukarokok nu mam osi kisomato kanu itupitetere osi eong'.

¹² Kolakarosi, kiyalamikinosi naarai epolo eropit kus noi kokuju, naarai ekipone lope ng'oli kisicaniata itung'a ikadwarak lu kegeito kama kus.

Abalang' ka Acaus

¹³ Iraito osi abalang' naka akwap; konye kepianaar abalang', ikoni inyakuno ajim keng' ai? Emam ajokun bobo adepar acakar king'a kipudata itung'a.

¹⁴ Iraito osi acaus na ecaikiit akwap. Ere lokapolon ejii kuju moru mam kepedorio akigwa.

¹⁵ Emam itwan inokokini akadoba ka arapakin, konye igwaakini nama ikiara tetere ecaikini acaus ng'in itwan ko otogo.

¹⁶ Kokipone kalope kalo, ekotokina acaus kus acaikite itung'a, tetere aanyunete kesi asoma kus nukajokak, koinakisi akibusesu Papa kus lo ejii kuju.

Akisisianakino kuju ka Ikisila

¹⁷ “Siri kiitutu ebe abu eong' aitamameun Ekisil ka Musa ka akisisianakino ka ikadwarak. Mam eong' kabuut aitamameun, konye aitodolokin.

¹⁸ Kanuka abeite alimokini eong' osi, ering'a kuju ka akwap ketuboro, emam ibore ipede kokisil ipiang'ar ering'a ng'in ibore ni igirite kisomakina.

¹⁹ Ng'in kere ni ebili ekisili epe lokaditan kamaka ikisila, ka akisisianakini itung'a akibil ikisila, enyarauno nikaditan ka ajakaanut kanako kuju. Konye ni ericakiit ikisila ka akisisianakini, enyarauno nikapolon ka ajakaanut kanako kuju.

²⁰ Kalimokini eong' osi, kemam adolite kus kedeparit naka lukesisianakinak ikisila ka Ifarisayon, mam osi kilomete ajakaanut nako kuju.”

Akisisianakino kuju ka Anyunyura

²¹ “Iirarito osi ebe kelimokiite lukasonya wok, ‘Siri kiar; ng'in kere ni ari etubokino.’

²² Konye kalimokini eong' osi ebe itwan kijokis ni enyunyura ko onac keng', etubokino; bobo ng'in ni erasi onac keng', eyaaro obarasa. Ng'in ni etemari, ‘Ijo ibang'ai!’ Elosi akimi na emam esiali.

²³ Kanuka ng'unu, ilemuni ijo idutan kon ka altari, kiituni ijo ebe ejii akirot kiding' kon ka onac kon,

²⁴ kinyek ileman kon kang'ina koking'aren ka altari, kolot atipet kiirarosi ka onac kon, kobong'o konye kolem ileman kon.”

²⁵ Kiirarosi atipet kang'ini yeni kiwosat ijo ilosete osi nama etubonokinere itung'a kanuka arokusio kes. Kemam, ibwaakini ni iwosat ijo akanini ka ekatubokinan, kosodi ekatubokinan akigwakin ijo akanin ka lukedarak, kocakakinete ijo aenis.

²⁶ Abeit, kalimokini eong' ijo, mam ijo kilomuni aitodol nama itacia ijo ikabel kere lu etubokiite ijo.

Adoteu

²⁷ “Iirasi osi ebe ketemarite, ‘Siri idote.’

²⁸ Konye alimokini eong' osi ebe itwan kere ni ing'obelee aberu, adau adoteu ka nesi ko otau keng'.

²⁹ Kere akong'u kon na koteten kidupori ijo isomae arokusio, kogoru kocakaa. Ejokuna amamuun alaro ape ka akwana akilany acakakin akwana kon kere akimi na emam esiali.

³⁰ Kere akan kon na koteten kidupori ijo isomae arokusio, kotubo kocakaa. Ejokuna amamuun alaro ape ka akwana akilanya acakakin akwana kon kere akimi na emam esiali.”

Akisisianakin kuju ka Alakakin

³¹ “Kebuni kotemare ebe, ‘Ng'ini kere ni elakakin aberu keng', itemokina nesi ainakin aberu keng' agirasia nuka alakakin.’

³² Konye alimokini eong' osi ebe ng'in kere ni elakakin aberu keng' mam kerait kanuka adoteu, ainaki aberu ng'in asoma adoteu; kemany etwan akobo, isomae adoteu.”

Akisisianakino kuju ka Eyapo

³³ “Iirasi osi bobo ebe kelimokiite lukasonya wok, ‘Siri iyapoete kaliokonu, konye kisomakisi Lokapolon kwape kiyapooto osi’

³⁴ Konye alimokini eong' osi, mam cut eyapo kokiror ka kuju naarai ng'ina nes ekicolong' ka Akuju,

³⁵ kere ka akwap kanu eraitere nama isiyeng'utere nesi akejen keng', kere Yerusalem naarai ng'olo nes ere lokapolon ka Ejakait kalo epolo noi.

³⁶ Mam eyapo kakou kon, naarai mam ijo kibeikini akibelokin etimat kokwang'aar kere kirionoor.

³⁷ Kotema along'u, ‘Eebo.’ Kere, ‘Mam.’ Ng'unu kere nu iyatakinosi elomuuto kamaka ajokit.”

Akisisianakino kuju ka Einyang'ane

³⁸ “Iirasi osi ebe ketemarite, ‘Akong'u ka akong'u, ekialai ka ekialai.’

³⁹ Konye alimokini eong' osi, mam ainyang' aronus ka aronus. Kibap itwan ijo ekitinyot loko teten, kinyek kibap loko kidieny de.

⁴⁰ Kiwosa itwan ijo ekote esaati kon, koinak akooti de.

⁴¹ Kijukak itwan ijo akigwok iboro keng' amairo ape, kodakak nesi amairon aare.

⁴² Ing'isit itwan ijo ibore, koinak; ekote itwan akikopaun ibore, kikopak.”

Amina Ipading'atin

⁴³ “Iirasi osi ebe ketemarite, ‘Komina ipaduko kon, koreite ipading'atin kon.’

⁴⁴ Konye alimokini eong' osi, kominasi ipading'atin kus ka ailipanakin lu isicanete osi,

⁴⁵ tetere iraunete osi idwe ka Papa kus loko kuju. Naarai itacaikini nesi akolong' keng' otung'a lukarokok kiton lukajokak, ijukunene nesi akiru nama kalu isomaete nukajokak kalu isomaete nukarokok.

⁴⁶ Naarai kiminu ijo ng'ulu lu kiminasi ijo, inyena eropit idumuni ijo? Mere ekipone lope ng'ol isomaenenete lukatubok emusolo?

⁴⁷ Kimalaenene ijo ipoupatin kon bon, anyeka nukitetiak isoma ijo? Mere kong'ipe kong'in isomananata lu mam keraito Iyaudin?

⁴⁸ Kanuka ng'unu ekotokina osi ajokun noi kwape ejokunare noi Papa kus loko kuju.”