Matayo 4 - AKITUTUKET NAKITETET (NEPEPEKA ISABULIN KA AWARAGASIA)

Atamisio Ka Yesu

¹ Kosodi Emoyo Lokalaunan ayaar Yesu moding' kotam ajokit nesi.

² Abu Yesu kikanya eteng'e apaarasia akaisawong'on kiton akwaresia akaisawong'on ilipi.

³ Kosodi ajokit abunore nama keng' kalimokin nesi ebe, “Kirait ijo Okoku ka Akuju, kolimok amor nu korautu emugati.”

⁴ Konye kinyakakini Yesu nesi ebe, “Igirite, ‘Mam itwan kejari kanuka inyamat bon, mam kerait kanuka ng'in akirot na elomuni kakituk ka Akuju.’ ”

⁵ Kosodi ajokit ayaar Yesu Yerusalem ore lokapolon lokalaunan, kigwaakini nesi obibiru ka etogo ka Akuju,

⁶ kosodi alimokini Yesu, “Kirait ijo Okoku ka Akuju, kodacun ijo elope kwap” naarai igirite, “Icorakini nesi imalaikan keng' akidara ijo; ikamunete kesi ijo ka akanin kes, tetere mam akejen kon de bon kikang'asikinosi ka amoru.”

⁷ Kinyakakini Yesu nesi, “Bobo igirite, ‘Mam akitam Lokapolon Akuju kon.’ ”

⁸ Bobo koyaari ajokit Yesu akicelesit ka emoru, kakitodikin nesi ajakaanut kere naka akwap ka akibusesu kes;

⁹ kosodi ajokit alimokin nesi, “Kainakini eong' ijo nu kere kikukokin ijo kalurokin eong'.”

¹⁰ Kosodi Yesu akinyakakin nesi, “Ajokit, koika kane! Naarai igirite, ‘Kimaa Lokapolon Akuju kon, ka akijaanakin nesi bon.’ ”

¹¹ Kosodi Asatanit akinyekin Yesu; kobunete imalaikan aking'arakin nesi.

Egeuni Yesu Asoma keng' ko Galilaya

¹² Nape kiirara Yesu ebe keyeni Yoana, koikar nesi Galilaya.

¹³ Keloma ko Nasareti, koikari akiboi Kapernaum arir ka akare, kakwap kanako Sabulon kiton Naftal.

¹⁴ Kisomakinosi nu kere tetere itodiari abeit naka ng'unu kere nu kinerit ekadwaran Isaya:

¹⁵ “Akwap ka Sabulon kiton akwap ka Naftal, idirarit akare, jewai ka Yordan, Galilaya, akwap ka itung'a kalu mam keraito Iyaudin!

¹⁶ Itung'a lu eboyete kakirionus aanyutu acaus na epolo noi. Namaka ng'ulu lukejaasi akwap naka atwanare acaik acaus.”

¹⁷ Ageun akolong' ng'ini, kogeuni Yesu akisiarasiara akirot keng' ebala, “Kibelokinosi karokusio kus, naarai apu Ajakaanut nako kuju.”

Enyarauni Yesu Ikeinyok Iwong'on

¹⁸ Elosi Yesu karir ka akare kanako Galilaya, kwanyuni ikanacan iare lukeinyok, Simon (lo enyarite Petero) ka onac keng' Anderea, iinyete ikolee, itosomaete ereg.

¹⁹ Kolimokini Yesu kesi, “Kotupata eong', bobo etarauni eong' osi lukeinyok itung'a.”

²⁰ Atipet kinyekinete kesi iregia kes, kotuparete nesi.

²¹ Nape ekunyakina Yesu kaneni, kwanyuni ikinachan iare ice, Yakobo ka Yoana lukeraito isapa ka Sebedayo. Kejaasi ataker nenipe ka papa kes Sebedayo, itemonokinete iregia kes. Konyarauni Yesu kesi.

²² Atipet kinyekinete ataker ka papa kes, kotuparete Yesu.

Isisianakini Yesu, Isiarisiari, ka Akimada (Luk 6:17-19)

²³ Abu Yesu kolot ng'in laro ko Galilaya, isisianakini itung'a ko osinagogin kes isiarisiari akiro nukajokak nuka Ajakaanut kakitang'aleun itung'a lu adekasi adekasia nu egelegela.

²⁴ Kisyarakinosi akiro ikamuto nesi ng'in laro ko Siria, kanuka ng'unu koinarete itung'a nesi ng'ulu kere lu adekasi adekasia nu egelegela: Itung'a lu ikamuto ipara, luka adeka naka atwanenen, kalu iteregegiara, kitang'aleuni Yesu kesi kere.

²⁵ Kotuparete nesi itung'a lu ipuaka noi alomun ko Galilaya ka itaunin itomon, Yerusalem, Yudea ka akwap nako kitala ka Yordan.