Matayo 3 - AKITUTUKET NAKITETET (NEPEPEKA ISABULIN KA AWARAGASIA)

Akisiarasiara ka Yoana Lokebatisan

¹ Kapaarasia kang'unu, kobuni Yoana Ekebatisan moding' loko Yudea, kogeuni akisiarasiara,

² “Kibelokinosi karokusio kus, naarai apuuti ajakaanut nako kuju adolun.”

³ Yoana nes etwan lo kinerit ekadwaran Isaya kuju keng' ebala: “Iworoe itwan komoding' ebala, ‘Kitenakisi eroto lo itori Lokapolon, korwaasi irotin lu itori nesi.’ ”

⁴ Kenapit Yoana inagai lu kitenite kajulo ka akaal. Bobo, kenapit kang'abet arokoba na kitenite kemukule loka etyang'. Inyamat keng' keraito emaase ka asik.

⁵ Kolosete itung'a nama keng' alomun ko Yerusalem, Yudea kere ka ng'ulu kere luka akwap kana idunyasi ka ang'olol nako Yordan.

⁶ Kiyamoete arokusio kes, kosodi Yoana akibatisa kesi ka ang'ololo nako Yordan.

⁷ Konye nape kanyuna nesi Ifarisayon ka Isadukayon ebuuto nama keng' kakipuakus akibatisao, kolimokini kesi ebala, “Osi auri naka imunwo! Ng'ai kikwenyari osi akerit akitisilario na ebuuti?

⁸ Kisomata asoma nu itoodikito ebe teni kinyekisi osi arokusio kus.

⁹ Mam akiitute ebe kanu eraitere Abraham papa kus ikuyete osi akitisilaro. Kalimokini eong' osi ebe, ebeikiit Akuju adumakin Abraham idwe alomun ka amoru kanu.

¹⁰ Elokokina ayep akitub ikitoo ka akatagoro; ng'oli ekitoi lo emam kigwaakiit araito nukajokak, ejepakino kwap kacakakin akimi.

¹¹ Ebatisae eong' osi kakipi akitodiar ebe kibelokinosi osi karokusio, konye lo ebuuti kokau kang', erait loka apedor noi adepar eong'. Mam eong' kilesikina adakite amukan keng'. Ebuni nesi akibatisa osi ka Emoyo Lokalaunan ka akimi.

¹² Irumit nesi ekitetero ka akanin keng', kopiesia engano kere. Etukokini engano keng' odula. Konye ebuni nesi akicwee agug kakim kana emam kedaun.”

Akibatisao Ka Yesu

¹³ Apak ng'ipeng'in kodoluni Yesu alomun ko Galilaya. Kobuni nama ka Yoana ko Yordani tetere ibatisae Yoana nesi.

¹⁴ Kotamak Yoana akibelokin awomowomosia keng' ebala, “Itemokina ijo akibatisa eong', ikoni ijo ibuni nama kang' ai?”

¹⁵ Konye kinyakak Yesu nesi ebe, “Kinyek kikote nepeneni kipokona. Naarai ekipone lo nes ibuniata oni asoma ng'unu kere nu ekote Akuju.” Kanuka ng'unu kocamuni Yoana.

¹⁶ Nape kedaunere akibatisa Yesu, kolomuni kakipi. Kosodi kuju ang'aar, kwaanyuni nesi Emoyo ka Akuju ijesun bala aleuro, kodoe nama keng'.

¹⁷ Kosodi eporoto alomun kokuju ebala, “Lo nes Okoku kang' lo ominat, alakara eong' kanu keng'.”