Matayo 27 - AKITUTUKET NAKITETET (NEPEPEKA ISABULIN KA AWARAGASIA)

Eyaaro Yesu nama ka Pilato

¹ Kedolo taparacu, kitemetemete isaseredootin lukapolok kere ka imojong' ka itung'a ekipone loka akiyar Yesu.

² Koyenete nesi, kayaar nesi ainakin Pilato, egavana loko Roma.

Atwanare ka Yuda

³ Napekaanyuna Yuda, ekagwelaran Yesu ebe ketubokin Yesu atwanare, kosodi akiyamoo emuna keng', kakinyakakin isaseredootin lukapolok nenipe ka imojong' ka itung'a abolai akaisauni nuka epuesa.

⁴ Kotemari, “Esoma eong' nukarokok agwelar etwan lo emam kisomakiit nukarokok kwarai!” Kinyakunete, “Kipodosi siong' kuju kang'unu? Ng'unu nukon!”

⁵ Kocakakini Yudas abolai nuka epuesa kwap ko Otogo ka Akuju, koikari. Kosodi alosite amiedakin.

⁶ Kosekunete isaseredootin lukapolok abolai ng'unu nuka epuesa, ka atemar, “Abolai nu adumunosi kabukorio ka awokot, mam Ekisil wok kecamuut akigwaakin ikabel lu odula ka Etogo ka Akuju.”

⁷ Kedautu akiirari kitosomaete kesi abolai agwela emanikor kalokajaan amotio nama enukanakino ilong'au.

⁸ Ng'ini nesi atenikina enyaritere emanikor ng'olo, “Emanikor loka awokot” akitodol lolo.

⁹ Kosodete nukelimuut ekadwaran Yeremia araun abeite: “Koyaarete abolai akaisauni, etacenit lokiirara itung'a luko Israel akitac kanu keng',

¹⁰ ka akitosoma abolai agwelia emanikor kalokejaan kwape kelimokiitere eong' Lokapolon.”

Yesu koking'aren ka Pilato

¹¹ Kogwoi Yesu koking'aren ka egavana; king'isi egavana nesi, “Ijo nesi Ejakait ka Iyaudin?” Kinyakuni Yesu, “Itema ijo.”

¹² Konye nape kiwosata nesi isaseredootin lukapolok nenipe ka imojong', mam nesi akinyakuni.

¹³ Kosodi Pilato aking'it nesi, “Mam ijo kipupi akiro nu kere atemasi kesi kuju kon?”

¹⁴ Konye mam nesi akinyakakini nesi, atikere kuju ka ape; kanuka ng'unu koumok egavana noi.

Atubokin Yesu Atwanare

¹⁵ Ka ng'ini pak kanaka Epasaka, kenaikiit egavana alacakin lokeyenite lokekotosi itung'a lu ipu.

¹⁶ Apak ng'ini kejii emabuusut lokejenuna noi lokenyarite Baraba.

¹⁷ Ketukokinosi itung'a lu ipu, king'isi Pilato kesi, “Ng'ai ikotosi osi kalacaki eong' osi? Yesu Baraba kere Yesu lo enyarite Kristo?”

¹⁸ Kejeni nesi kotenan noi ebe keinunete lukepugak ka Iyaudin nesi Yesu kanuka eding'.

¹⁹ Kuju kang'unu, ering'a iboe kokicolong' kaloka atubonokino, kijukuuni aberu keng' akirot nama keng', “Kinyekinosi ka etwan kang'oli lo edolit, naarai ecanakin eong' noi lolo kanu keng' ko oruja.”

²⁰ Kosodete isaseredootin lukapolok kiton imojong' ka itung'a akilip itung'a lu ipu king'itata Pilato kolacaki Barinabas konye kwarai Yesu.

²¹ Konye king'isi Pilato itung'a lu ipu, “Ng'ai kamaka iare kalu ikotosi osi kalacaki eong' kanu kus?” Kinyakunete, “Baraba!”

²² King'isi Pilato kesi, “Inyena ekokini eong' Yesu, lo enyarite Kristo?” Kotemarete kesi kere, “Kinyek nesi kibubukine.”

²³ Kotemari nesi, “Inyo, inyena aronus esoma nesi?” Konye kocelunete koporoto kaloko kuju, “Kinyek nesi kibubukine.”

²⁴ Kanuka ng'unu, nape kaanyuna Pilato emam ibore edumuni nesi, konye ageuti ejautene akicokun, kolemuni akipi, kilotari akanin keng' koking'aren ka itung'a lu ipu, ebala, “Mam eong' akirot apede kuju ka aokot ka etwan kalo; kwaanyutu osi ikulopek.”

²⁵ Kinyakutu itung'a kere, “Kotupata aokot keng' siong' ka idwe kosi!”

²⁶ Kosodi Pilato alacakin kesi Baraba; kedaun akipot Yesu ka acarit, koinakini nesi Yesu kibubukine.

Ekwenatatare Lukajore Yesu

²⁷ Kosodete lukajore ka Pilato ayaar Yesu otogo ka egavana, kosodi ajore kere atukokin nama keng'.

²⁸ Kolacarete nesi inagai keng', ka akitanap nesi inapen lukareng'ak.

²⁹ Kojeunete abokok naka ateniek ka ikokwa, kakigwaakin akou keng', ka akigwaakin elodot akan keng' na koteten; kokukokinosi koking'aren keng', akwenar nesi. Kotemarete, “Atoroma pu, ejakait ka Iyaudin!”

³⁰ Kimwakinete nesi akumula, kolemunete elodot ka akinom nesi akou.

³¹ Kedautu akwenare Yesu, kolacarete nesi inapen ng'ulu, kakitanapa nesi inagai keng'. Kosodete ayaar nesi king'a kibubukine.

Ibubukino Yesu Omusalaba

³² Na kelomarata kesi king'a, kosodete akiriamakin ka Saimon loko Krene; kikurakinete lukajore nesi akidak emusalaba ka Yesu.

³³ Na kedoliata alaro na enyarite Goligotha (apolou keng' alaro naka Abolokok naka Akou),

³⁴ koinakinete nesi ebino inyalakiite ka ibore nikadwaran komat; konye nape kiiria, mam nesi akimat.

³⁵ Kibubukinete nesi omusalaba, kokorarete inagai keng' kakicak ekura;

³⁶ kosodete akiboikin kwap ka akidar nesi kaneni.

³⁷ Kigwakinete kuju akou keng' agirasia nuka ewosane keng', nu ebalasi, “Lo Nes Yesu, Ejakait ka Iyaudin”

³⁸ Kosodete akibubukin ikokolak iare ka nesi, epe teten, epe kokidieny.

³⁹ Kosodete ng'ulu lu ketubonorosi kaneni akirat nesi, kimung'umung'ete akwes,

⁴⁰ ebalasi, “Ijo lo ibeikiit atijaar Etogo ka Akuju, kadukun ka aparasia kauni, koyuun! Kirait ijo Okoku ka Akuju, kodoku kwap ka emusalaba”

⁴¹ Isaseredootin lukapolok de ka lukesisianakinak ka Ikisila, ka imojong' ka itung'a abutu kokwenatatar nesi ebalasi,

⁴² “Abu koyuu luce, konye mam kebeikiit ayuuni nesi elope! Mere nesi erait Ejakait loko Israel? Kedoku nesi kwap ko omusalaba kipokona eyuunete siong' nesi!

⁴³ Emunokiit nesi Akuju bobo kobala nesi Okoku ka Akuju. Kaanyutu caat kekote Akuju ayuuni nesi kipokona!”

⁴⁴ Ikokolak de lukibubukiite ka nesi kageun akirat nesi kokipone kalope kang'olo.

Atwanare ka Yesu

⁴⁵ Ageun isaan ikany ka akape luka apaaran abu akwap kere kirionar akitodol isaan ikany ka aung'on.

⁴⁶ Aapiarit isaan ikany ka aung'on, kodelori Yesu koporoto kaloko kuju, “Eli, Eli, lema sabak-tani?”, Apolou keng', “Akuju kang', Akuju kang', Inyo inyekina ijo eong'?”

⁴⁷ Kiirasi itung'a ice lukegwoete kaneni, kotemarete, “Enyarit etwan lo Eliya.”

⁴⁸ Kosodi epe kama kes amotari atipet, kalemun apugot, kilumokini obore nikadwaran, koyenikini osial ka elodot, ka ainakin nesi komat.

⁴⁹ Konye kosodete luce atemar, “Kedarakisi, kaanyutu kebuni Eliya ayuuni nesi!”

⁵⁰ Kosodi Yesu adelor bobo koporoto kaloko kuju, kosodi atwanare.

⁵¹ Akolong' ng'ipe ng'ini kosodi epasia lo keyenikiite Otogo ka Akuju atiak erwana kaare, ageun kokuju akitodol kwap; kosodi akwap akijang'akin, kosodete atatab acilicila;

⁵² kosodete atesin de apukor, kitajarunete itung'a ka Akuju lu ipu luketwakito.

⁵³ Kolomarete katesin, kedau Yesu ajarun, koikarete ore lokalaunan, nama kaanyunata itung'a lu ipu kesi.

⁵⁴ Nape kaanyuna lokepolokiit ajore ka lukajore lukidariete Yesu, akijang'akin ka akwap kang'unu kere nu kebutu kisomakinosi, abutu kokuriakarosi noi. Kotemarete, “Teni kerait nesi Okoku ka Akuju!”

⁵⁵ Kejaasi aberu ipu ng'ina, kiteete kama kelwana, nu ketupito Yesu ageun ko Galilaya, ing'arakiito nesi.

⁵⁶ Kiding' kes kejii Maria Magdalena, Maria toto kes ka Yakobo ka Yosef, ka aberu ka Sebedayo.

Anukio ka Yesu

⁵⁷ Ebong', kodoluni etwan lokebarit alomun ko Arimatea; kenyarite Yosef, bobo kerait nesi de ekiyakia ka Yesu.

⁵⁸ Kolosi nama ka Pilato, king'isi koinakine nesi akwana ka Yesu. Kicorakini Pilato koinakine nesi akwana.

⁵⁹ Kosodi Yosef ayaar akwana, korapakini ka enaga kalo kelae,

⁶⁰ kosodi akigwaakin akwana ates keng' bon nakitetet, na kebokit nesi amoru; kosodi akokorikin amoru nakapolon noi okek ka ates.

⁶¹ Kejaasi Maria Magdalena kiton Maria nace neni iboyete iteyorito ates.

Idario Ates

⁶² Apaaran na ketupakini, na kerait naka Akitemonokin, kiriamakinosi isaseredootin lukapolok ka Ifarisayon namaka Pilato

⁶³ ka atemar, “Ejakait, iituto siong' ebe ering'a eliokoi ng'oli ejari, abala, ‘Itajaruno eong' ka aparasia kauni.’

⁶⁴ Kicorak cabo kidarai ates keng' kotenan akitodol apaaran na kiuniet, tetere emam ikiyakia keng' kebeikinete alosite akokoyaar akwana keng', kalimokin itung'a ebe etajarun kamaka lukatwak. Aliokonu na kosial eronaar akilany na sodit.”

⁶⁵ Kosodi Pilato alimokin kesi, “Koyaasi lukedarak; kolototo, kidarata ates kwape ibeikiteter osi.”

⁶⁶ Koikarete akidar ates kakinwet amoru kakinyekin lukedarak idariete.