Matayo 26 - AKITUTUKET NAKITETET (NEPEPEKA ISABULIN KA AWARAGASIA)

Akitemitemisio nuka Akiyara Yesu

¹ Kedau Yesu akisisianakin iboro lu kere, kolimokini ikiyakia keng',

² “Ijenete osi ebe ideuna apaarasia aare kobuni Epasaka, koinakinete Okoku ka Etwan akibubukin omusalaba.”

³ Kosodete isaseredootin lukapolok ka imojong' ka itung'a atukokin otogo ka esaseredootit kalo kepolokiit isaseredootin luce, lokenyarite Kaiyafas,

⁴ kitemetemete nenipe ekipone loka akikamun Yesu emam itwan ipede ejeni kakiyara.

⁵ Konye kotemarete, “Mam oni asoma nu apak naka epucit, naarai ebeikinete itung'a akinyalun.”

Inyonyoikino Yesu ko Betani

⁶ Na kejaare Yesu Betani, otogo ka Saimon, etwan loka eng'ulo,

⁷ kobuni aberu nama keng' edakit acupat ka alabasta ileleba akinyet na epolo etyae noi, kobukokini akou keng', iboyee enyemi.

⁸ Konye nakaanyunata ikiyakia nu, konyunyuraarosi, kotemarete, “Inyo eboliare akinyete na?

⁹ Tia akinyet na egwelarite kotiae kale epolo ka ainakin lukapalapalak!”

¹⁰ Kejeni Yesu nukebalasi kesi. Kolimokini kesi, “Inyo itapasitotor osi aberu na? Ejokuna bobo elai ibore ni esomaki nesi eong'.

¹¹ Ijaikinosi osi nenipe ka lukapalapalak aparasia kere, konye mam osi kijaikinosi ka eong' aparasia kere.

¹² Nu kisomakini nesi arait abukokin akinyet na akwana kang' tetere elokokin akwana kang' akigwayo.

¹³ Kalimokini eong' osi abeite ebe, nama kere isiarisiariere akiro nu nukajokak ka akwapin kere, elimorio nu esoma nesi kanuka akiitute nesi.”

Acamu Yuda Agwelar Yesu

¹⁴ Kosodi epe kamaka ikiyakia ka itomon ka aare, lokenyarite Yuda Iskariot alosit nama ka isaseredootin lukapolok

¹⁵ king'isi, “Inyena iinakinete osi eong' kainaki eong' osi nesi?” Kotacete nesi abolai akaisauni.

¹⁶ Ageun apak ng'ini kogeuni Yuda akote ekipone loka agwelar Yesu.

Enyemi Yesu Inyamat luka Epasaka ka Ikiyakia keng'

¹⁷ Apaaran nasodit na kepucit kalo kemugaati kalo emam asipa, kobunete ikiyakia nama ka Yesu, ka aking'it nesi, “Wali ikote ijo ketenakisi siong' konyemia ijo Epasaka?”

¹⁸ Kolimokini kesi, “Kolototo ore lokapolon nama ka etwan mutan, kolimokisi nesi, ‘Ebala Lokesisianakinan, adolo akolong' kang'; anyemete eong' ka ikiyakia kang' inyamat luka Epasaka ko otogo kon.’ ”

¹⁹ Kisomakinete ikiyakia kwape kelimokiitere Yesu kesi, kitenete Epasaka.

²⁰ Kedolo ebong', kiboikinosi Yesu ka ikiyakia itomonkaare akinyam.

²¹ Itolosito kesi akinyam, kotemari Yesu, “Kalimokini eong' osi, ipe kama kus egwelari eong'.”

²² Kosodete ajaikin ka akituur noi, kogeuni ng'in itwan aking'isite nesi, “Erait eong', Lokapolon?”

²³ Kinyakuni nesi, “Ng'olo lo elumoki akani keng' toma acuran nenipe ka eong', nes egwelari eong'.

²⁴ Etwani Okoku ka Etwan kwape ebalatatare agirasia nukalaunak, konye eronaar ekipone ali kamaka etwan kalo egwelari Okoku ka Etwan! Kejokuna along'u kere kemam etwan ng'olo kidoute!”

²⁵ Kosodi Yudas, ekagwelaran nesi atemar, “Lokapolon, erait eong'?” Kolimokini Yesu nesi, “Itema ijo.”

Inyamen luke ebong' ka Lokapolon

²⁶ Itolosito kesi akinyam, kosodi Yesu alemun emugati, kisirereng'i, kobilibil, koinakini ikiyakia keng', kotemari, “Aso, konyamata; na nesi akwana kang'.”

²⁷ Kolemuni ekikopot, kakiyalamikin Akuju, ka ainakin kesi. Kotemari, “Komatata, osi kere,”

²⁸ “naarai nu kesi aokot kang' nuka akitutuket, nu ebukorio kanuka lu ipu, kanuka arumakino ka arokusio.

²⁹ Kalimokini eong' osi ebe mam eong' bobo kamasi ebino lo ering'a apaaran kedolo na amasia eong' ka osi ebino lokitetet ka Ajakaanut ka Papa kang'.”

³⁰ Kosodete akirukokin ekosio, kalomar aikar Moru lo enyarite Olif.

Edwaruni Yesu Eng'eri Petero Nesi

³¹ Kosodi Yesu alimokin kesi, “Akware na ibuniete osi kere amotari akinyekin eong', naarai ebalasi akiro nukalaunak, ‘Ebuni Akuju akiara lokecokon, kosodi esipan ka amerekekin akisiarakin.’

³² Konye kedaun akitajarun eong', agei eong' kama kus adolore Galilaya.”

³³ Kolimokini Petero Yesu, “Mam eong' cut kenyekini ijo, atikere kinyekisi itung'a kere ijo!”

³⁴ Kolimokini Yesu Petero, “Kalimokini eong' ijo, ering'a ekokor kerwokina akware na, ing'eri ijo eong' irwana ka auni.”

³⁵ Kolimokini Petero nesi, “Atikere kerait atwanare eong' ka ijo, mam eong' ka ang'eri ijo” Kosodete ikiyakia luce kere atemar kong'ipe kong'in.

Ilipi Yesu ko Getseman

³⁶ Kosodi Yesu alosite nenipe ka ikiyakia keng' alaro na kenyarite Getseman, kolimokini kesi, “Kiboikinosi ne alosi eong' nama akilip.”

³⁷ Koyaari nesi Petero ka isapa ka Sebedayo iare. Kobuni akituur ka apipilu kuju keng'.

³⁸ Kolimokini kesi, “Epolo eong' akituur ko otau kang' noi; kideunosi kane, kilipata nenipe ka eong'.”

³⁹ Kikunyakini king'aren nedio, kakibirokin kwap ebubura, kakilip, “Papa kang', kibeikini, kolema ekikopot lokican lo kama kang'! Mere kwape akotore eong', konye nu ikote ijo.”

⁴⁰ Kobong'ori nama ka ikiyakia ka iuni, kodumuni ejotoete; kosodi aking'it Petero, “Ekipone ali kemamare osi iuni kibeikinete akikwenye nenipe ka eong' ko osaa ka epe?

⁴¹ Kokwenyete ka akilip tetere mam osi kilomete atamisio. Ekote etau konye enonok akwana.”

⁴² Koikari Yesu bobo ka akilip, “Papa kang', kemam ekikopot lokican lo kebeikini alemario mam eong' kamasit, kinyek kisomakinosi kwape ikotore ijo.”

⁴³ Kobong'ori bobo, kodumuni ikiyakia ejotoete; kemam kebeikinete akikweny.

⁴⁴ Kinyekini Yesu kesi bobo koikari akilip na kiuniet, inyogoe akiro ng'upe ng'unu.

⁴⁵ Kobong'ori nama ka ikiyakia kotemari, “Ering'a osi iperete ka akiyeng'ute? Kiteete! Adolo akolong' na einakinere lukarokok Okoku ka Etwan.

⁴⁶ Konyoutu, kaikasi. Kiteete, elo ekagwelaran eong'!”

Akikamuno ka Yesu

⁴⁷ Itolosit nesi ejori, kobuni Yuda, epe kamaka itomon ka aare, ejaasi nenipe ka itung'a lu ipu, edakito ileng'ia lukaujak ka abiroi, alomun kamaka isaseredootin lukapolok ka imojong' ka itung'a.

⁴⁸ Keinakiit ekagwelaran itung'a lu ipu akitodiaret, ebala, “Lo anuikini eong', nes etwan; kikamutu nesi!”

⁴⁹ Kobuni nama ka Yesu atipet, kotemari, “Aipuc kojii nenipe ka ijoo, Ejakait!” Kosodi anuikin Yesu.

⁵⁰ Kinyakakini Yesu nesi, “Opoupa kang', kisunyak asoma nu kiyauto ijo ne!” Kosodete abunore ka akikamun Yesu, ka akirum nesi baaba.

⁵¹ Kosodi epe kamaka lukejaasi ka Yesu autun ekileng' lokaujan, ka akibap ebulesut ka esaseredootit lokapolon, ka atubor akit keng'.

⁵² Kolimokini Yesu nesi, “Kinyakaki ekileng' kon nama kilemuna ijo; ng'ulu kere lu itosomaete ekileng', etwakete ka ekileng'.

⁵³ Ituuti ijo ebe mam eong' kabeikiit akimaima Papa kang' kosodi akijukun atipet ajore ka imalaikan edeparito itomonkaare?

⁵⁴ Konye tia Akigirasia Nukalaunak itodolikinosi koni, nu ebalasi ebe nu tar kisomakinosi?”

⁵⁵ Kosodi Yesu alimokin itung'a lu ipu, “Kejii osi abunore ka ileng'ia ka abiroi akikamun eong' bala arait eong' ekokolan? Ng'ini paaran eboyenene eong' ka akisisianakin itung'a ko Otogo ka Akuju, mam osi akikamun eong'.

⁵⁶ Konye nu kere esomakinosi tetere edolete ng'unu nu kigirito ikadwarak kotoma akigirasia nukalaunak.” Kosodete ikiyakia kere akinyekin nesi, kamotar.

Eyaro Yesu king'aren kebarasa

⁵⁷ Ng'ulu lu kikamunete Yesu, koyarete nesi otogo ka Kayafa, lokapolon ka isaseredootin, nama ketukokina lukesisianakinak ka Ikisila ka imojong'.

⁵⁸ Ketupit Petero nesi elwanikina nedio, adolore akalapatan ka esaseredootit lokapolon, kolomi akalapatan kosodi akiboikin nenipe ka lukedarak, anyun inyena isomakin.

⁵⁹ Kotamakinete isaserdotin lukapolok nenipe ka ebarasa kere akoun akiro nu egamakino Yesu tetere aario nesi;

⁶⁰ konye mam adumun apede, atikere kabunore ka itung'a ipu ejori aliokonu kuju keng'. Kosial kobunete itung'a iare

⁶¹ ka atemar, “Abala etwan lo, ‘Abeikin eong' atijaar Etogo ka Akuju, kadukun bobo ka aparasia kauni.’”

⁶² Kogwoi esaseredootit lokapolon, kosodi aking'it Yesu, “Emam nu inyakuni ijo ikamuut nu kere nu atemar kuju kon?”

⁶³ Konye kotauni Yesu tii. Bobo kosodi esaseredootit alimokin nesi, “Ko okiror ka Akuju kalo ejari kesiapoe eong' ijo kipokona; kolimok siong' kirait ijo nes Emesaya, Okoku ka Akuju.”

⁶⁴ Kinyakakini Yesu nesi, “Itema ijo. Konye kalimokini eong' ijo: Ageun akolong' nape na akitolosite king'aren, ianyuni ijo Okoku ka Etwan iboyee koteten kaloka apedor kere, ijesuna kodowon kaluko kuju!”

⁶⁵ Kosodi esaseredootit lokapolon acilaar inagai keng', ka atemar, “Eken. Inyo bobo ering'a oni ikotosi lukajenak? Iirasi osi aikene keng'

⁶⁶ Inyena atubokinet kus?” Kosodete atemar, “Itemokina akiara nesi.”

⁶⁷ Kosodete akimwanakin nesi akumula, ka akibung'a nesi; ice kakibapanar nesi

⁶⁸ ebalasi, “Kodwarak siong', ijo Kristo lo! Ng'ai kinomo ijo?”

Eng'eri Petero Yesu

⁶⁹ Kiboyee Petero koking'a kakalapatan, kobuni nakejaanakinan ka esaseredootit lokapolon nama keng', ka atemar, “Ijo de, kijaasi nenipe ka Yesu loko Galilaya.”

⁷⁰ Kosodi Petero aking'er koking'aren kes kere ebala, “Mam eong' kajeni apolou kanu ibala ijo.”

⁷¹ Keloma king'a orute, kwaanyuni nakejaanakinan acede nesi, kolimokini itung'a lukegwoete, “Etwan lo ajaasi nenipe ka Yesu loko Nasareti.”

⁷² Bobo kong'eri Petero kiyapoe ebala, “Mam eong' kajeni etwan ng'oli!”

⁷³ Nedio, kobunete itung'a lukegwoete kaneni kalimokin Petero, “Abeite, irait ijo epe kama kes, naarai ejori kon kigwelarit ijo.”

⁷⁴ Kogeuni Petero anyaraun ilami nama keng', ka akiyapo ebala, “Mam eong' kajeni etwan ng'oli!” Atipet korwokini ekokor.

⁷⁵ Kosodi Petero akiitun nu kelimokiit Yesu nesi: “Ering'a ekokor kerwokina, ing'eri ijo eong' irwan kauni.” Kolomari king'a, kageun akibworo.