Matayo 25 - AKITUTUKET NAKITETET (NEPEPEKA ISABULIN KA AWARAGASIA)

Awaragan Naka Apesur Atomon

¹ “Apak ng'ini ikokini ajakaanut nako kuju ne. Apak ape kejaasi apesur atomon nu kedakete akadobai kes, kalomar akiriamakin ka eteran.

² Akany kama kes, kebang'aaka, konye akany nuce kecoaka.

³ Naarai nakedakiata nubang'aisik akadobai kes, mam kesi akirum akinyet;

⁴ konye nukecoaka kirumete acupai ileleba akinyet ka akadobai.

⁵ Abu eteran kitumor abunore, kogeunete apesur akilura, ka ajotoor.”

⁶ “Konye, kiding' ka akwaare, kejii eworo, ‘Eteran lo! Kolomutu, kisiriamata nesi!’

⁷ Kosodete apesur ng'unu kere anyoun, kageun akitenakin akadobai kes.

⁸ Kosodete nubang'aisik alimokin nukecoaka, ‘Kotiakakisi siong' akinyet kus, naarai aaputi akadobai kosi atwakare.’

⁹ Konye kosodete nukecoaka akinyakun, ‘Ebeikiit akinyet mam kilesikin siong' ka osi; kolototo nama kalu itegwelete, kogwelutu nakus.’

¹⁰ Konye nape aikarata agwela, kobuni eteran, kosodete ng'unu nu kelokokina akilom ka nesi nama kejii epucit loka emanyit; kogolokinete ekek.”

¹¹ “Kokau keng', kobunete apesur nuce de ebalasi, ‘Ejakait, ejakait, kong'ak siong'.’

¹² Konye kinyakuni, ‘kalimokini eong' osi abeite, mam eong' kajeni osi.’”

¹³ Kanuka ng'unu, “Kocoikinasi naarai mam osi kijenete apaaran kere akolong'.”

Awaragan Naka Lukejaanakinak Iuni

¹⁴ Apak ng'ini, ikokini ajakaanut nako kuju ne. Apak ape kejii etwan lo kelokokina alosite olotete; konyarauni lukejaanakinak keng' kosodi ainakin kesi apolou naka akidar abara keng'.

¹⁵ Koinakini ipe atalantan akany, nice aare, nice ape, ng'ini itwan atupa ka apedor keng'. Kosodi aikar.

¹⁶ Ni kedumuut atalantan akany, koikari atipet kasoma ebele, kodumuni atalantan akany bobo.

¹⁷ Ng'olo de lo kejaatatare ka atalantan aare kodumuni bobo aare.

¹⁸ Konye ng'olo lo kedumuut atalanta ape, koikari koboki adwi, kakigwaa ikabel ka ejakait keng'.

¹⁹ “Ketubor apak nakaujan, kobong'uni ejakait ka lukejaanakinak, kogeuni akitemetem ka kesi ejautene ka aing'adas.

²⁰ Kobuni ng'oli lo adumuut atalantan akany, eyauti atalantan akany bobo ebala, ‘Ejakait, iinakiit ijo eong' atalantan akany; enu atalantan ace nu etenu eong' bobo.’

²¹ Kolimokini ejakait keng' nesi, ‘Isoma ijo kojokan, ijokuna ijo, ijo ekejaanakinan lo emunokina! Ijaikinosi ijo ka amuno koboro kalu edisak, egwaakini eong' ijo apolokiite iboro lu ipu; kolom alakara ka ejakait kon.’

²² Ng'olo de lo kedumuut atalantan aare kobuni king'aren ebala, ‘Ejakait, iinakiit ijo eong' atalantan aare; enu atalantan aare bobo.’

²³ Kolimokini ejakait keng' nesi, ‘Isoma ijo kojokan, ijokuna ijo, ijo ekejaanakinan lo emunokina! Ijaikinosi ijo ka amuno koboro kalu edisiaka, egwaakini eong' ijo apolokiite iboro lu ipu; kolom alakara ka ejakait kon.’

²⁴ Kosodi nesi de lo kedumuut atalanta ape abunore ebala, ‘Ejakait, ajeni eong' ebe irait ijo etwan lo eninik, idwenyi ijo kama kemam ijo kiyeit; ituki ijo kama kemam ijo kiterakiit;

²⁵ kanuka ng'unu abu eong' kakurianaar, kalosi eong' aking'adakin atalanta kon alipo. Aso, koyaa nikon.’

²⁶ Konye kosodi ejakait keng' akinyakakin nesi, ‘Ijo ekaronon ka ekalany lo! Kijeni ijo ebe adwenyi eong' kama kemam eong' kayeit, ka akituk kama mam eong' kiterakiit?

²⁷ Tia ijo igwakiit ikabel kang' obenki, tia eong' adumuut nu eraito nukang' iyatakina.

²⁸ Kanuka ng'unu koyaasi atalanta keng' koinakisi ng'olo lo ejaatatare ka atomon.

²⁹ Naarai ng'ini kere ni ejaatatare, iyatakino, kosodi nesi ajaikin kalu ipuaka; konye nesi ni emam kejaatatare, edemario atikere ng'ini ni ejaasi ka nesi.

³⁰ Kocakasi ekejaanakinan lo emam asoma akirionus nako king'a; kang'ina ebunete itung'a akimony ka akiriare ikial kes.’”

Atubokino naka Esial

³¹ Na ebunia Okoku ka Etwan kotoma akibusesu keng', nenipe ka imalaikan kere kitoni nesi, iboikin nesi okicolong' keng' loka akibusesu.

³² Itung'a luka akwapin kere etukokinosi king'aren keng'. Kosodi akitiaka kesi kaare, kwape etiakia lokecokon amerekekin kamaka akinei.

³³ Igwaakini nesi amerekekin akani keng' nako teten, konye akinei akidieny.

³⁴ Elimokini Ejakait ng'ulu luka akan keng' kanakoteten, “Kobuutu lu isirereng'it Papa kang'; kirumata ajakaanut na kitenakiite osi ageun ape kesubere akwap.

³⁵ Naraai eirarit eong' eteng'e, koinakinete osi eong' inyamat, aarit eong' akure, koinakinete osi eong' akipi, arait eong' elong'ait, kidiaunet osi eong' koreria kus,

³⁶ ajii eong' esiekeny, kitanapete osi eong'; adeka eong' kobunete osi akidara eong'; ajii eong' aenis, kipejokinete osi eong'.

³⁷ Kinyakakinete lu edolito nesi, ‘Lokapolon, iwori kaanyutetere siong' ijo aarit eteng'e ka akitan ijo? Kere aarit akure ka ainakin ijo akipi?’

³⁸ Iwori kaanyutetere siong' ijo irait elong'ait, kediaunete siong' ijo koreria kosii? Kere ekinyoro kakitanapa ijo?

³⁹ Iwori cut kaanyutetere siong' ijo ideka, kere iyenite, kakipejokin ijo?

⁴⁰ Kinyakakini Ejakait kesi, ‘Abeit kalimokini eong' osi ebe ekipone kisomakinata osi ipe kamaka lukadisiak ka ikanacan kang' kalu, kisomakiito osi eong'.’

⁴¹ “Kosodi alimokini ng'ulu luka akan kanaka akidieny, ‘Koikasi kama kang', osi lu ilamite, kolomata akimi na emam kedaun na itenakiite Asatanit ka imalaikan keng'.

⁴² Aarit eong' eteng'e, konye mam osi akitan eong', aarit eong' akure mam osi ainakin eong' akipi.

⁴³ Araait eong' elong'ait, mam osi akidiaun eong' koreria kus; ajii eong' ekinyoro, mam osi akitanap eong'; adeka eong', bobo ayenite eong', mam osi akipejokini eong'.’

⁴⁴ Kosodete kesi de akinyakun, ‘Lokapolon, iwori kaanyutetere siong' ijo aarit eteng'e, kere de aarit akure, kere de irait elong'ait; kere ekinyoro, kere ideka, kere eyenite, kang'erete siong' akidar ijo?’

⁴⁵ Inyakakini Ejakait, ‘Kalimokini eong' osi, apak kere naking'eriata osi aking'arakin ipe kamaka lukadisiak kalu, kibuutu osi kong'eroto aking'arakin eong'.’

⁴⁶ Lu, ijukiaro akitisilaro na emam esial, konye lu edolito elomete akijar na emam esial.”