Matayo 24 - AKITUTUKET NAKITETET (NEPEPEKA ISABULIN KA AWARAGASIA)

Inera Yesu Kuju ka Amunauno ka Etogo ka Akuju

¹ Kolomari Yesu ko Otogo ka Akuju, eikari, kobunete ikiyakia keng' nama keng' ka akitodikin nesi aduketaa ka Etogo ka Akuju.

² Kotemari nesi, “Eebo, kong'olekisi osi de lu kere. Kalimokini eong' osi nu: Emam amoru apede kane ideun kalaro keng'; kesi kere ibiroro kwap.”

Ican kitoni Akisicanio

³ Na kiboikiner Yesu moru lo ejaasi ikito luka akinyet, kocedunosi ikiyakia nama keng', king'isete, “Kolimok siong' iwori isomakinototor nu kere. Bobo de inyena akitodiaret kabunere kon ka esial kakwap?”

⁴ Kinyakuni Yesu, “Kocoikina, mam acamun king'alak itwan ipede osi.

⁵ Naarai ebunete lu ipu kokiror kang' ebalasi, ‘Eong' nesi Kristo,’ Itapaete lu ipu.

⁶ Ipupunete osi nuka ejie ka erwee ka ejie; mam ariang'un; naarai ejii nu akisomakin, konye ering'a esial kedolo.

⁷ Ebuni akwap akitijii akwap nace, ajakaanut ape akitijii ajakaanut nace, ebuni eteng'e ajaikin, bobo ejaikin akijang'ajang'a kakwap ka alarosinoi kanu egelegela:

⁸ Nu kere erait bala ageun ka arieba naka akidoun.”

⁹ “Kosodete akikamun osi, ka ainakin lu itisilarete, kakiyar; Akwapin kere king'erete osi kanu kang'.

¹⁰ Lu ipu inyekinete akiyuun kes kapaki kang'in; ejaikin agwelanar; kang'erokin.

¹¹ Kosodete konye ikadwarak luka aliokonu atakanuun ka aking'ala itung'a lu ipu.

¹² Kanu iyatare aronus, ebuni amina ka itung'a kalu ipu ataun chi.

¹³ Konye itwan kere ni ikanyakini akitodol osial, itajario.

¹⁴ Bobo Akiro Nukajokak nuka Ajakaanut isiarakino akwap kere kwape ka alimoret ka akwapin kere; kobuni konye esial kakwap.

Ican lu Itukurianete

¹⁵ “Iyanyunete osi ibore ni itukuriani ni kinerit ekadwaran Danieli. Itoroni alaro nakalaunan.”

¹⁶ Ng'ulu lu ejaasi Yudea ejii akerit omoru;

¹⁷ mam ng'oli lo ejii kuju otogo adokun alemar ibore ni ejii otogo keng';

¹⁸ mam ng'oli lo ejii omanikor abong'or ayaar inapen keng'.

¹⁹ Ikoni eronaar ai kapaarasia kang'unu kamaka aberu kanu epotiete ka kes ka toto nu ejaatatare ka idwe lucik!

²⁰ Kilipata Akuju komam osi akerit apak naka ekidon kere apaaran naka Esabato!

²¹ Naarai ejaikinosi ican lu ipu noi apak ng'ini adepar ican kere lu ejaikina apelem sek de kageunet ka akwap akitodol lolo, mam, bobo emam ibore kwape kang'in ejaikin.

²² Bobo kere kemam kipiang'arite aparasia ng'unu; tia emam itwan ipede ejari. Konye kanuka ng'ulu kalu eseute, ipiang'ario aparasia ng'unu.

²³ “Kelimok itwan kere ijo, ‘Kitee, ejii Kristo ne!’ Kere de ‘Eje kama!’ Mam akiyuun.

²⁴ Naarai etakanunete Imeseyan ka ikadwarak lukaliokon, ebunete asoma aumokineta kiton akitimosia nukapolok noi tetere itapaete atikere lu eseuti Akuju, kebeikinosi.

²⁵ Kiirasi! Adau eong' alimokin osi nu ering'a apak kebunia.”

²⁶ “Kere kelimokisi itung'a osi, ‘Kiteete, ejii moding'!’ Mam alosite ng'ina; kere ketemasi, ‘Kiteete, eng'opit kane!’ Mam akiyuun ng'unu.

²⁷ Naarai Okoku ka Etwan ebuni bala ekipiei lo imiliauni akitub kuju alomun ko kide akitodol too.”

²⁸ “Nama kere ejii akwana na etwanit, etukokinosi atarukon neni.”

Abunere ka Okoku ka Etwan

²⁹ “Nape edaunototore ican luka aparasia kang'unu, ejesuni akolong' cuc, mam elapa kecauni, edacunosi akanyer kokuju, bobo agogong'u nako kuju ijang'akini.

³⁰ Kosodi akitodikinet ka Okoku ka Etwan atakanuun kokuju; ebunete itung'a kere luka akwap akimony iteete Okoku ka Etwan ijesuna kodowon kaluko kuju, ejaasi ka apedor kiton akibusesu nakapolon.

³¹ Erwokini arupepe nakapolon, ijukiari nesi imalaikan keng' owaitin iwong'on luka akwap, etukokinete kesi itung'a keng' luseuna, alomun kosial kakwap ka ape akitodol loce.”

Nu Isisiauno Kokaereret

³² “Kinyekisi kisisianak ekaereret osi. Na elibunata ateniek kononok, kageun akitilibuun akwii, ijenunete osi ebe apu akamu.

³³ Kokipone kalope kang'oli, kianyutu osi iboro lu kere, ijenunete osi apie nesi abunore.

³⁴ Kalimokini eong' osi abeite ebe, mam auri na ketubor ering'a iboro lu kere kisomakina.

³⁵ Akuju ka akwap etuborosi, konye akiro kang' mam ketuborosi.”

Emam ni Ejeni Apaaran kitoni Akolong'

³⁶ Emam ni ejeni iwori ebunia apaaran ng'in ka akolong' ng'in — atikere imalaikan kokuju kere Okoku keng'; Papa bon ejeni.

³⁷ Abunore ka Okoku ka Etwan eputokinosi kanukisomakinosi apak ka Noa.

³⁸ Apakio ng'unu ering'a akiru ka akaale, konyamata itung'a ka akimat, komanyata ikiliok komanyanikinosi aberu, akitodol apaaran na kelomia Noa ataker;

³⁹ konye mam kesi ajenun nu kisomasi akitodol na kebunia akaale kakigwok kesi kere. Ekipone ng'oli nesi ejautene ka akiro apak na ebunia Okoku ka Etwan.

⁴⁰ Ka apak kang'in, ejaikinosi itung'a iare isomaete komana; eyaaro ipe kinyekinete ipe.

⁴¹ Ejaikinosi aberu aare iriete; eyaaro ape, inyekino ape.

⁴² Kanuka ng'unu, kocoikinasi, naarai mam osi kijenete apaaran na ebunia Lokapolon kus.

⁴³ Konye kojenete nu, Kere kejeni elope etogo apak na ebunia ekokolan kware, tia idarit. Tia mam kinyekini etogo keng' kobilai.

⁴⁴ Kanuka ng'unu, ekotokina osi de alokokina; naarai ebuuti Okoku ka Etwan ka akolong' kana mam osi kimunokiito.

Ekejaanakinan lo Emunokina kere lo Mam Kemunokina

⁴⁵ “Ng'ai konye ekejaanakinan ekeyuunan kocoo? Erait ng'oli lo ainaki ejakait keng' apolokiite lukejaanakinak luce, ainakin kesi inyamat kes ka akolong' kana itemokina.

⁴⁶ Ikoni ekejaanakinan ng'oli elakari ai kedumu nesi ejakait keng' isomae nu na ebunia ore!

⁴⁷ Kalimokini eong' osi abeite igwaakini ejakait ekejaanakinan ng'oli apolokiite abara keng' kere.

⁴⁸ Konye ketemaa ekejaanakinan lokaronon ng'oli ko otau keng', ‘Ecelewaar ejakait kang',’

⁴⁹ kosodi ageun akibung'a lukejaanakinak luce lukisomaete ka nesi, ka akinyam ka akimat kaluka amerak,

⁵⁰ ebuni ejakait ka lokejaanakinan kang'oli ka apaaran kana mam nesi kemunokiit, bobo de ka akolong' kana mam nesi kejeni.

⁵¹ Ebuni ejakait akisican nesi, kakigwaakin nesi nenipe kaluka esoswai; nama emonyata itung'a ka akiriare ikial kes.”