Matayo 22 - AKITUTUKET NAKITETET (NEPEPEKA ISABULIN KA AWARAGASIA)

Awaragan naka Epucit lokemanyit

¹ Bobo kiner Yesu ka kesi ka awaragasia ebala,

² “Ajakaanut nako kuju ebeikiite akituput ka ejakait lo kitenakini okoku keng' epucit loke emanyit,

³ kijukiari lukejaanakinak keng' anyaraun ng'ulu lu kenyaraute opucit lokemanyit; konye mam kesi abunore.

⁴ Bobo kijukiari lukejaanakinak ice ebala, ‘Kolimokisi ng'ulu lu enyaraute: Alokoki eong' inyamat kang'; imong'in kang' ka itaka kang' lu etumito adaun akitub, ng'ini ibore elokokina; kobutu opucit loka emanyit.’

⁵ Konye kitebebenete akiro ng'unu, koikarete, epe mana keng', loce obele keng',

⁶ kosodete luce kere akikamun lukejaanakinak, kisomakisi kesi nuka asilutu, ka akiara kesi

⁷ Konyunyuraari ejakait noi; kijukiari luka ajore keng', lu aariete lukaarak ng'ulu ka akicweikin ere kes lokapolon.

⁸ Kolimokini lukejaanakinak keng', ‘Elokokina epucit loka emanyit, konye ng'ulu lu kenyaraute kemam kitemokina.

⁹ Kanuka ng'unu, kolototo orotin, konyarautu opucit loka emanyit itung'a lu ipu lu idumunete osi.’

¹⁰ Kolosete lukejaanakinak ng'ulu orotin, kanyaraun ng'ulu kere lu kedumunete kesi, lukarokok kiton lukajokak; kilelebunosi ipejok otogo ka emanyit.”

¹¹ “Konye nape kelomia ejakait toma ang'olekin ipejok, kwaanyuni kaneni etwan lo kemam kenapit enaga loka emanyit;

¹² kolimokini nesi, ‘Aupasia, kikoni ijo ilomi ne ai emam ijo enaga loka emanyit?’ Komamuni nesi nu elimuni.

¹³ Kosodi ejakait alimokin lukedarak, ‘Koyenikisi nesi akanin ka akejen, kocakasi nesi akirionus nako king'a; nama emonyata itung'a ka akiriare ikial kes.’”

¹⁴ Kosodi Yesu ang'etakin ebala, “Ipu lu enyaraute, konye edisiaka lu eseute.”

Aking'itasait kuju ka Akitac Emusolo

¹⁵ Koikarete Ifarisayon ka akitemetem ekipone loka alokun nesi ka aking'itasia.

¹⁶ Kosodete akijukiari ikiyakia kes ka itung'a lu kigang'ito Erode nama keng', ebalasi, “Lokesisianakinan, kijeni siong' ebe ijo loka abeite, isisianakini ijo eroto ka Akuju ka abeite. Mam ijo kikuriana itwan ipede; naarai apolou ka etwan mam kerait ibore kama kon.

¹⁷ Kolimok siong', awomowomo kon. Ecamuut Ekisil akitac emusolo nama ka Kaisari, kere mam?”

¹⁸ Ajeni Yesu nukarokok nu kitemitemito kesi, kotemari, “Osi lukesoswai, inyo itamakiitetere osi alokun eong'?

¹⁹ Kitodikisi eong' abola na etacere emusolo!” Koinunete nesi abola.

²⁰ King'isi nesi kesi ebe, “Naka ng'ai aputo na ka ekirori kalo?”

²¹ Kotemarete, “Naka Kaisari.” Kosodi nesi alimokin kesi, “Kanuka ng'unu koinakisi loka apugan iboro lu eraito luka apugan, Akuju lu eraito luka Akuju.”

²² Nape kiirarata, koumokisi; kinyekinete nesi, koikarete.

Aking'itasait kuju ka Ajaranu kamaka Lukatwak.

²³ Apaaran ng'ipe ng'ini, kobunete Isadukayon nama keng', lu ebalasi ebe emam ajarun kamaka lukatwak; king'itata kesi nesi,

²⁴ ebalasi, “Lokesisianakinan, atemarit Musa, ‘Ketwana etwan mam kidouti idwe, ekotokina onac keng' akirum apuserut ng'ini tetere idounete idwe lu eraunete idwe konac keng' kalokatwan.’

²⁵ Kejaasi ikanacan ikany ka iare lukiboyete kokiding' wok; komanyi losodit, kotwani emamatatare ka idwe, kinyekini aberu keng' ka onac keng'.

²⁶ Ibore ng'ipe ng'ini abu kisomakin onac lokiareit, kalokiuniet, ka kitodol ikany ka aare kere.

²⁷ Kedaunosi kesi kere, kotwani aberu.

²⁸ Kanuka ng'unu, apaaran na ejarunata lukatwak, erauni nesi aberu ka ng'ai? Kesi kere kemanyito nesi.”

²⁹ Kinyakakini Yesu kesi, “Ikote osi iwolito ai! Erait kanu mam osi kijeniata agirasia nukalaunak kere apedor ka Akuju.

³⁰ Naarai apak nakajarun, mam kesi kemanyete kere kemanyio, konye eraito kwape ka imalaikan kokuju.

³¹ Ikamuuto ajarun ka lukatwak, mam osi kisomato nu kelimokiit Akuju osi,

³² ‘Eong' nesi Akuju ka Aburaam, Akuju ka Isaka, Akuju ka Yakobo?’ Mam nesi kerait Akuju ka lukatwak, konye kalu ejarete.”

³³ Nape kiirarata itung'a lu ipu nu, koumokisi kesi akisisianakin keng'.

Ekisil Lo Eplo

³⁴ Konye nape kiirarata Ifarisayon ebe kitatau nesi Isadukayon tii, kosodete atukokin nenipe.

³⁵ Kosodi epe kama kes lokesisianakinan Ikisila aking'it Yesu ang'itasait, akitam nesi.

³⁶ Kotemari, “Lokesisianakinan, ali ekisil epolo ko Okisila?”

³⁷ Kolimokini nesi, “Komina Lokapolon Akuju kon ketau kon kere, ka emoyo kon kere ka acoa kon kere.

³⁸ Lo nes ekisil lo epolo kalo sodit.

³⁹ Lokiareit eputosi kang'oli, ‘Komina ipaduko kon kwape iminare ijo ilope.’

⁴⁰ Ekisil kere loka Musa ka akisisianakino ka ikadwarak edumuuto agogong' alomun kamaka ikisila ka iare kalu.”

Ang'itasait kuju ka Mesaya

⁴¹ Ering'a Ifarisayon etukokina nenipe, king'isi Yesu kesi ang'itasait,

⁴² ebala, “Inyena iituto osi kuju ka Kristo? Erait nesi okoku ka ng'ai?” Kolimokinete nesi, “Okoku ka Daudi.”

⁴³ King'isi Yesu, “Inyo konye king'arakina Emoyo Lokalaunan Daudi anyaraun nesi ‘Lokapolon?’” Ketemarit Daudi,

⁴⁴ “Lokapolon kelimokit Lokapolon kang': Kiboikin ne akan kang' nako teten akitodol na epiakina eong' ipading'atin kon kwap ka akejen kon.”

⁴⁵ Kenyarit Daudi nesi, “Lokapolon,” ikoni nesi erait okoku keng' ai?

⁴⁶ Komamuuni itwan ipede ni kebeikin akinyakakin nesi akirot. Bobo alomun aparaan kang'ini mam itwan ipede ang'asikin aking'it nesi ang'itasia ace.