Matayo 21 - AKITUTUKET NAKITETET (NEPEPEKA ISABULIN KA AWARAGASIA)

Akilomo ka Yesu Yerusalem naka Akitelekaar

¹ Apiarito Yesu kiton ikiyakia keng' Yerusalem, kobutu Betifaje, omoru lokenyarite Olif. Kang'ina, kijukiari Yesu ikiyakia iare king'aren

² kolimokini kesi, “Kolototo aduket na ejii waije, kanepe kaneni idumunete osi asigiria eyenikiite ka ikoku keng'; kolacutu, koyautu nama kang'.

³ Kelimoki itwan kere osi ibore kere, itemarete osi, ‘Lokapolon ekote kesi,’ kosodi nesi akijukiar kesi atipet.”

⁴ Kisomakinosi nu tetere eraunete abeite nu kinerit ekadwaran:

⁵ “Kolimok ere lokapolon loko Sayuni, ‘Kitee, ebuuti ejakait kon nama kon! Eyong'ara, edokit kuju ka asigiria.’” Bobo edokit kuju ka itaako ka asigiria.

⁶ Kosodete ikiyakia alosite akisomakin kwape kelimokitere Yesu kesi;

⁷ koyaunete asigiria ka itaok keng', kocakakinete inagai kes kuju kes, kodoki.

⁸ Abutu itung'a lu ipu kopetata inagai kes oroto; kosodete ice akitub ateniek ka ikito ka apesikin oroto.

⁹ Kogeunete itung'a lu ipu lu kelosete koking'aren kiton ng'ulu lu kelosete kokau acela ebalasi, “Kiturwoi Okoku ka Daudi! Kisirereng' Akuju nesi ni ebuni kokiror ka Lokapolon! Kiturwoto Akuju!”

¹⁰ Nape kelomia Yesu Yerusalem, kosodi ere lokapolon kere akidinyakin. King'isete itung'a, “Ng'ai nesi?”

¹¹ Kobong'okini itung'a lu ipu, “Lo nesi ekadwaran Yesu alomun ko Nasareti ko Galilaya.”

Elosi Yesu Otogo ka Akuju

¹² Kolomi Yesu Otogo ka Akuju kosodi akireng'iar king'a ng'ulu kere lu kitegwelete ka agwela ko Otogo ka Akuju. Kibeloonor amesan ka itung'a kalu kibelonokinete ikabel, ka icolong'o ka itung'a kalu kitegwelete ikaburukukun.

¹³ Kolimokini nesi kesi, “Igirite, ‘Enyarauno etogo kang' etogo loka akilip’. Konye itarautu osi nama eng'opitere ikokolak.”

¹⁴ Kobunete nama keng' lu emudukaka ka ing'walaisik ko Otogo ka Akuju, kitang'aleuni kesi.

¹⁵ Abutu isaseredootin lukapolok ka lukesisianakinak ka Ikisila konyunyurarosi na kaanyunata aumosia nu kisomae nesi ka idwe ecelasi, “Kiturwoto Okoku ka Daudi!”

¹⁶ King'isete kesi Yesu, “Ipupi ijo nu ebalasi kesi?” Kobong'okini Yesu, “Eebo, mam osi apelem kisomato akigirasia nukalaunak? ‘Isisianakisi osi idwe ka idwe lu enakete de akitur kojokan.’”

¹⁷ Kinyekini Yesu kesi kolomari koikari ko ore lokapolon kolosi Betani, nama keperi kware.

Ilami Yesu Ekaereret

¹⁸ Taparacu, ebong'orit nesi ore lokapolon, kiirari eteng'e.

¹⁹ Kwaanyuni ekaereret kawai keroto, kosodi alosite nama keng', konye mam adumun ibore ipede adepar akwii bon. Kolimokini ekitoi, “Mam cut ijo bobo kiraikini araito!” Kowoni ekitoi atipet.

²⁰ Kwaanyunete ikiyakia nu, koumokinete. King'isete, “Kikoni ekaereret ewoni atipet ai?”

²¹ Kobong'okini Yesu, “Kalimokini eong' osi abeite ebe kijaasi osi ka akiyuun komam abuonokin, ibeikinete osi akisomakin nu esomak eong' ekaereret lo. Mere nu bon, konye ibeikinete osi alimokin emoru lo, ‘Konyou, kodacakin ijo elope akare,’ ikokinosi.

²² Kijaasi osi ka akiyuun, idumunete osi ng'ini ibore ni ing'isete osi kotoma alipasia.”

Ang'itasait kuju ka Apedor ka Yesu

²³ Na kelomia nesi Otogo ka Akuju, kobunete isaseredootin lukapolok nenipe ka imojong' ka itung'a nama keng' isisianakini nesi, ka atemar, “Apedor ani isomaa ijo iboro lu, ng'ai kiinakini ijo apedor na?”

²⁴ Kobong'okini Yesu kesi, “Eng'isi eong' de osi ang'itasait ape. Kinyakakisi osi eong', kalimokini eong' de osi apedor na esomaa eong' iboro lu.

²⁵ Ai kelomuna adolite ka Yoana naka akibatisa: Kerait nama ka Akuju kere nama ka itung'a?” Kogeunete apeganakin ikulopek ebalasi, “Inyena itemarete oni? Kinyakutu oni, ‘Alomun kamaka Akuju,’ elimokini oni, ‘Inyo konye mam osi akiyuun nuka Yoana?’

²⁶ Konye kitemasi oni, ‘Alomun ko otung'a,’ ikuriaka oni nu ebeikinete itung'a akisomakin, naarai ecamuuto kesi kere ebe kerait Yoana ekadwaran.”

²⁷ Kanuka ng'unu kobong'okinete kesi Yesu ebalasi, “Mam siong' kajenete.” Kobong'okini nesi de kesi, “Mam eong' de kalimokini osi apedor na esoma eong' iboro lu.

Awaragan naka Itelepai Iare

²⁸ “Inyena iituto osi? Kejaasi etwan ka isapa ka iare; kolosi nama kalosodit, kotemari, ‘Okoku kang', koloto lolo asoma omanikor ka emusabibu.’

²⁹ Kobong'okini, ‘Mam eong' kalosi’, konye kokau keng', kilipi akarimao kosodi alosite.

³⁰ Kolosi papa namaka etelepat kaloce, kolimokini kong'ipe kong'in. Kobong'okini, ‘Eebo, Papa,’ konye mam alosit.

³¹ Ng'ai kamaka iare kang'ulu kisomate nu kekote papa keng'?” Kobong'okinete, “Losodit.” Kosodi Yesu alimokin kesi, “Kalimokini eong' osi: Ebunete lukerarak emusolo kalu edote akigee kama kus akilom Ajakaanut ka Akuju.

³² Naarai abuni Yoana Lokebatisan nama kus itoodikit osi eroto lo ideere akitup, mam osi akiyuun nukeng'; konye abutu lukerarak emusolo kalu edote kiyuutu nukeng'. Atikere na kianyunata osi nu, mam osi akibelokin aomisio kus ka akiyuun nesi.”

Awaragan naka lukekodisak Emanikor Komanikor

³³ Kotemaa Yesu, “Kopuputu awaragan ace.” “Ajii apak ape etwan elope emanikor lo kebu kiraa emusabibu, kosodi akiduku abwas akimanakin, koboki adwi na iteniere ebino, koduki akites. Kosodi akinyekina lukekodisak, koikari akwap ace na elwana.

³⁴ Kedolo apak naka akidweny araito, kijukia nesi ijoloi keng' nama kalu kikodisato tetere idiaunete atutubet keng' naka idwenyan.

³⁵ Kosodete lukekodisak akikamun ijoloi, kibung'aete epe, kwariete loce, kibiribiriete loce ka amoru.

³⁶ Kijukiari nesi bobo ijoloi ice, ipuaka edeparito lu sodit, kisomakinete lukekodisak emanikor ng'ulu de kwape kisomakinata lu sodit.

³⁷ Kosial cut kijukiari okoku keng' nama kes. Kotemari ‘Abeit, ebunete akiyong' okoku kang'.’

³⁸ Konye nape kaanyunata lukikodisato emanikor okoku, kosodete akinerakin, ‘Lo nesi okoku ka elope emanikor. Kobuutu, kaarata nesi, idumunete oni iboro keng'!’

³⁹ Kikamunete nesi, kocakarete nesi king'a ka emanikor kosodete akiara nesi.”

⁴⁰ King'isi Yesu, “Na ebunia elope emanikor, inyena ikokini nesi lukekodisak ng'ulu?”

⁴¹ Kinyakakinete nesi ebalasi, “Ebuni nesi akiara itung'a ng'ulu lukarokok, ka ainakin lukekodisak ice lu einakinete nesi atutubet keng' naka idwenyan ka akolong' kana itemokina.”

⁴² Kolimokini Yesu kesi, “Mam osi apelem kisomato nu ebalasi akigirasia nukalaunak?” “Amoru na ang'erete lukadukok bala na emam adumunet kibelokin araun na epolo cut kang'unu kere. Lokapolon nes kisomae nu; inyena aumokinet na ejokuna akitere.”

⁴³ “Kanuka ng'unu kalimokini eong' osi, edemario osi Ajakaanut ka Akuju ka ainakin itung'a lu eyaunete araito nu ejooka.

⁴⁴ (Ng'ini ni ibirokin kuju ka amoru kana etubitubio, konye ng'ini ni ibirokin amoru na kuju keng', ebuni akipiricario).”

⁴⁵ Nape kiirarata isaseredootin lukapolok ka Ifarisayon awaragasia ka Yesu, kojenunete ebe kinera Yesu kuju kes.

⁴⁶ Konye naketamakinata akikamun nesi, kosodete akuriakaar itung'a lu ipu, naarai ediauto nesi bala ekadwaran.