Matayo 20 - AKITUTUKET NAKITETET (NEPEPEKA ISABULIN KA AWARAGASIA)

Lukesomak Komanikor ka Emusabibu

¹ “Naarai Ajakaanut nako kuju eputosi ka elope etogo lo kelomari taparacu akigir itung'a asoma omanikor keng' naka emusabibu.

² Kedautu nesi akiirar ka lukesomak akitac kesi edinari kapeparaan, kijukiari nesi kesi omanikor keng' loka emusabibu.

³ Elomari king'a isaan iuni, koanyu ice egwoete ko osokoni emam ibore ipede isomaete;

⁴ kolimokini itung'a ng'ulu, ‘Kolototo osi de omanikor, kataci eong' osi kojokan.’ Kosodete alosite.

⁵ Keika king'a bobo isaan ikany ka ape ka isaan ikany ka aung'on, kikokini kong'ipe kong'in.

⁶ Apiariit isaan itomon ka ape, koikari king'a kodumuni ice egwoete; kosodi aking'it kesi, ‘Inyo igwoete osi kane along'u apaaran kere?’

⁷ Kolimokinete nesi, ‘Naarai emam itwan igirit siong' asoma.’ Kolimokini nesi kesi, ‘Kolototo osi de omanikor kang' loka emusabibu asoma.’ ”

⁸ “Na kedolia ebong', kosodi elope emanikor loka emusabibu alimokin lokepolokiit luce, ‘Konyarau lukesomak, kotac kesi, ageun kama kanikesial akitodol nisodit.’

⁹ Kebutu ng'ulu lu kigirio isaan itomon ka ape, kodumu ng'ini itwan kama kes adinari.

¹⁰ Na kebuniata lu kegeito akigirio, kiituuto edumunete kesi nu ipuaka; konye ng'ini itwan kama kes abu kodumu adinari.

¹¹ Na kedumunata, kirurumakisi elope etogo,

¹² ebalasi, ‘Lukosial lu, esomata akolong' ape bon, itiiriana ijo kesi ka siong' lu ekanyata ican luka paaran kiton amwanus na epolo.’

¹³ Konye kobong'ok nesi epe kama kes, ‘Aupasia, mam eong' kesomakiit ijo nukarokok; kemam ijo kiirara ka eong' adinari?

¹⁴ Koyaa nikon, koika; aseuni eong' ainakin eni ni kesial kwape ainakina eong' ijo.

¹⁵ Mam eong' kecamakiite asoma nu akote eong' ka iboro kang'? Kere anyuuti ijo aronus ka ajokus ka etau kang'?’ ”

¹⁶ “Kanuka ng'unu, lu eraito lukosial eraunete lusodit bobo lusodit eraunete lukosial.”

Inera Yesu na Kiuniet kuju Katwanare Keng'

¹⁷ Elosi Yesu Yerusalem, kogitari ikiyakia itomon ka aare, kolimokini kesi koroto,

¹⁸ “Kitetee, ilosete oni Yerusalem; ikamuno Okoku ka etwan ka ainakin isaseredootin lukapolok ka lukesisianakinak, lu etubokinete nesi atwanare,

¹⁹ ka ainakin nesi itung'a ilong'au lu ebunete akwenare nesi, ka akipot nesi ka akibubukin nesi omusalaba, itajaruuno nesi ka apaaran kanakiuniet.”

Ailipasit ka Toto

²⁰ Kosodi toto kes ka itelepai ka Sebedayo abunore nama keng' ka isapa keng', kokukin king'aren keng' kilipi nesi ibore.

²¹ King'isi Yesu nesi, “Inyena ikote ijo?” Kobong'okini nesi, “kisumunikine eong' ebe iboikinosi isapa kang' iare lu akani kon na teten kana akedieny kirau ijo ejakait.”

²² Konye kobong'ok Yesu, “Mam osi kijenete nu ing'isito osi. Ibeikinete osi akimat ekikopot lo alosi eong' akimat?” Kolimokinete nesi, “Ibeikinete siong'.”

²³ Kolimokini kesi, “Imasiete osi ko okikopot kang', konye akiboikin akani kang' na teten ka akani kang' na akedieny, mere eong' atiakuni, konye erait naka ng'ulu kalu itemokiit Papa kang'.”

²⁴ Na kiirarata ikiyakia itomon luce kuju kanu, konyunyurarosi ka ikanacan ka iare.

²⁵ Konye kosodi Yesu anyaraun kesi ka alimokin, “Ijenete osi ebe ijakaa luka ilong'au ejaasi ka agogong' kuju kes, lu ing'arenikiito ejaasi ka apedor kere.

²⁶ Mam kerauni kona kama kus. Kekote ipe kama kus apolou, ejii nesi araun nikejaanakinan kaluce,

²⁷ bobo kejii ipe kama kus ekote araun ni sodit, korau ejolot kus,

²⁸ kwape ka Okoku ka Etung'anan kalo amam abu kobuu akijaanakino konye akijaanakin ka alemun akijar keng' kanuka ayuuni itung'a lu ipu.”

Itang'aleuni Yesu Lu emudukaka Iare

²⁹ Na kelomarata Yesu ka ikiyakia keng' ko Yeriko, abutu itung'a lu ipu kotupata nesi.

³⁰ Lu emudukaka iare lukiboyete kowai ka eroto, kiirarete ebe etubor Yesu kaneni, kogeunete acela ebalasi, “Okoku ka Daudi, kitimi siong'!”

³¹ Kiretakisi itung'a lu ipu kesi kalimokin kesi kotautu ti. Konye kocelutu koporoto kaloko kuju noi, “Okoku ka Daudi! Kitimi siong', Lokapolon!”

³² Kogwoi Yesu kanyaraun kesi. King'isi kesi, “Inyena ikotosi osi eong' kesomaki osi?”

³³ Kolimokinete nesi, “Lokapolon, kinyek kokwenyutu akonyen kosi.”

³⁴ Kanuka akisoni, kojorori Yesu akonyen kes. Kanepe kaneni kodumunete anyun, kigwapete nesi.