Matayo 2 - AKITUTUKET NAKITETET (NEPEPEKA ISABULIN KA AWARAGASIA)

Ipejok Alomun ko Kide

¹ Na edounere Yesu ko Beteleem ko Yudea, kerait Erode ejakait. Kolomutu itung'a luka acoa ko kide abunore Yerusalem

² king'isete ebe, “Waali ejii ejakait ka Iyaudin lo edoun? Naarai aanyutu siong' akanyerete keng' elomuni ko kide. Abutu siong' akimaa nesi.”

³ Na kiirara ejakait Erode nu, kokadak nesi noi ka itung'a kere luko Yerusalem.

⁴ Konyarauni lukapolok ka isaseredootin kere ka lukesisianakinak ka ikisila. King'isi kesi ebe, “Wali idounere Kristo?”

⁵ Kinyakakinete nesi ebe, “Idouno Kristo ko Beteleem, kalaro kanako Yudea”. Naarai nu nes kigirit ekadwaran:

⁶ “Osi luko Beteleem ka akwap kanako Yuda, mam osi kidisiaka kamaka lu ipugaete ka akwap kanako Yuda; naarai nama kus nesi elomuna lokepugan lo ebuni akipuga itung'a kang' luko Israel.”

⁷ Kosodi Erode acedar lukacoa atukot, ekote ajenun kama kes apak na ketakanuna akanyeret.

⁸ Kosodi akijukiar itung'a ng'ulu Beteleem ebala ebe, “Kolototo, komoata kotenan nama idoutere ikoku. Kidumutu osi, kobutu kolimokisi eong' tetere abuni eong' de akimaa nesi.”

⁹ Kedautu apupuun nu kebala ejakait, koikarete. Kanepe kaneni, kogei akanyeret na kaanyuto kesi ko kide aking'arenikin kes, kogwoi kalaro kana kejii ikoku.

¹⁰ Nape kaanyunata akanyeret, abutu kolakarosi noi.

¹¹ Na kelomiata otogo, koanyunete ikoku ka toto keng' Maria. Kosodete akukokin kaluronokin nesi. Na keng'arata icwei kes, kosodete ainakin nesi idutan: Esawabu, epulaket ka emira.

¹² Kedau Akuju akikwenyar kesi koruja ebe mam abong'or nama ka Erode, kosodete kesi abong'or akwap kes koroto kece.

Asiyar Misiri

¹³ Kedautu kesi alomar, kosodi emalaikat ka Lokapolon abunore nama ka Yosef koruja kalimokin nesi ebe, “Konyou, kirum ikoku ka toto keng', komotarosi Misiri. Kideunosi kang'ina akitodol nama kalimokina eong' osi alomar; naarai ebuut Erode akote ikoku akiyara.”

¹⁴ Kosodi Yosef anyoun kware, kirumi ikoku kiton toto keng', kaikar Misiri.

¹⁵ Kosodete akideun kang'ina akitodol na ketwania Erode. Nu nes kitodolikinete nu kinerit Lokapolon itorit nama ke ekadwaran keng' ebala ebe, “Alomun ko Misiri nes anyarauna eong' Okoku kang'.”

Ario Idwe

¹⁶ Abu Erode konyunyurar noi na kejenuna ebe king'alakisi nesi itung'a lukacoa. Kosodi akijukiar lukajore keng' kwarata idwe kere lukiliok ko Betlehem kiton aduket keng'. Idwe lukekotokina akiara kerait ng'ulu kere lu kemam kedeparito ikaru iare, atupa ka akolong'ia nu keng'icuut nesi kotung'a kaluka acoa.

¹⁷ Kisomakinosi nu kere tetere itodiarosi ng'unu kere nu kinerit Lokapolon elimokini ekadwaran keng' Yeremiah ebe,

¹⁸ “Epupo eporoto ko Raama, eporoto lo emonyi kapipilu. Raeli nesi emonyi kanuka idwe keng'; eng'erit aking'aing'ayo, naarai atwakata.”

Abong'un ko Misiri

¹⁹ Kedau Erode atwanare, kosodi emalaikat ka Lokapolon abunore nama ka Yosef koruja ejii Misiri,

²⁰ kotemari ebe, “Konyou, koyaa ikoku ka toto keng', kobong'osi akwap nako Israel naarai atwakata itung'a lu kekotosi akiyara ikoku.”

²¹ Konyouni Yosef ka ikoku ka toto keng' abong'or Israel.

²² Konye nape kepupuna Yosef ebe Akelaus nes kebuu koyaa apugan nako Yudea na ketwania papa keng', abu Yosef kokurianar abong'ori ng'ina. Koikari akwap nako Galilaya atupa kepone lo kikwenyaritere emalaikat nesi koruja.

²³ Koikari akiboi otaun loko Nasaret. Kanuka ng'unu abutu nu kinerito ikadwarak kisomakinosi: “Enyarauno nesi loko Nasaret.”