Matayo 17 - AKITUTUKET NAKITETET (NEPEPEKA ISABULIN KA AWARAGASIA)

Aibelokin kaputo ka Yesu

¹ Ketuborosi aparasia akanykape, kosodi Yesu ayaar Petero, Yakobo ka Yoana onac keng', kaikar ka kesi kuju moru nama kejaasi kesi bon.

² Kosodi nesi akibelokin koking'aren kes, kocau eret keng' bala akolong' kokwang'akarosi inagai keng' bala acaus.

³ Kosodete ikiyakia iuni anyun Musa ka Eliya inerasi ka Yesu.

⁴ Kosodi Petero alimokin Yesu, “Lokapolon, ejokuna ajaasi siong' ne; kicamuut ijo, adukokini eong' ayemai auni ne, ape nakon, ape naka Musa, ape naka Eliya.”

⁵ Ering'a nesi inera, kosodi edou lokakwang'an noi arapakin kesi, kolomuni eporoto kodou ebala, “Lo nesi okoku kang' lo amina eong'; lo itiminarit eong'. Kopupoto nesi!”

⁶ Na Kiirarata ikiyakia eporoto, kokuriakarosi noi ka akibirokin kwap ebubura.

⁷ Kobuni Yesu nama kes ka ajorori kesi ebala, “Konyoutu, mam akurianu!”

⁸ Eng'oliarete kuju mam kesi anyun itwan ipede adepar Yesu.

⁹ Ebuuto kesi kwap ka emoru kosodi Yesu akikwenyar kesi, “Mam alimokin itwan ipede nu aanyutu osi aitodol na itajarunere Okoku ka Etung'anan katwanare.”

¹⁰ Kosodete ikiyakia aking'it Yesu, “Inyo ebalatatare lukesisianakinak ka Ikisila ebe Eliya nes egeyi abunore?”

¹¹ Kinyaku Yesu, “Teni Eliya nes egeyi abunore, bobo elokokini nesi ng'in ibore.

¹² Konye alimokini eong' osi ebe adau Eliya abunore konye mam itung'a ajenuni nesi, konye kisomakinete nesi kwape kekotototor. Kokipone kalope kang'oli nesi ebuniata akisican Okoku ka Etwan.”

¹³ Kosodete ikiyakia ajenuun ebe kelimonokini Yesu kesi kuju ka Yoana Lokebatisan.

Itang'aleuni Yesu Esapat lokejaasi ka Ajokit

¹⁴ Na kebong'orata nama ka itung'a lu ipu, kobuni etwan nama ka Yesu kakukokin koking'aren keng' kotemari,

¹⁵ “Lokapolon, kitimi okoku kang'! Naarai ejaasi nesi ka adeka naka akibironori, icana nesi noi; irwan ipu ibironokin akimi ka akipi.

¹⁶ Ayaut eong' nesi nama ka ikiyakia kon, konye mam kesi abutu kobeikisi akitang'aleun nesi.”

¹⁷ Kobong'okini Yesu, “Okwai auri na emamatatare ka akiyuun kanakesoman nukarokok, apak etia ai ejii eong' akiboi ka osi? Ka apak etia ai ejii eong' akikany ka osi? Koyautu nesi ne nama kang'.”

¹⁸ Kiretak Yesu nesi, kolomari ajokit kama keng', kong'aleuni esapat kanepe kaneni.

¹⁹ Kosodete ikiyakia abunore nama ka Yesu ejaasi kesi bon, kosodete aking'it nesi, “Inyo kikarikina siong' akireng'iar ajokit.”

²⁰ Kolimokini kesi, “Kanuka akiyuun kus kana edit. Naarai alimokini eong' osi abeite ebe, kijaasi osi ka akiyuun na edit bala ekinyomit lo edite, ilimokinete osi emoru lo, ‘Kikunya kane ng'ina,’ kikunyari; emam ibore ipede ikarikini osi.”

²¹ (Konye ekipone lo mam kelomari emam akilip ka akikany eteng'e).

Inera Yesu bobo kuju ka Atwanare Keng'

²² Ketukokinosi ikiyakia kere nenipe Galilaya, kolimokini Yesu kesi, “Aaput ainakin itung'a Okoku ka Etwan

²³ lu aariete nesi; konye ketuborosi aparasia auni itajaruno nesi.” Abutu ikiyakia kituuruoto.

Etacit loka Emusolo ko Otogo ka Akuju

²⁴ Na kebuniata Yesu ka ikiyakia keng' Kapernaumu, kosodete lukerarak emusolo ko otogo ka Akuju abunore nama ka Petero ka aking'it nesi, “Etacenene lokesisianakinan kus emusolo?”

²⁵ Kinyakuni Petero, “Eebo.” Na kelosia Petero otogo, kogei Yesu akinerakin ebala, “Simon, ibala ijo ai? Ng'ai etaci ijakaa luka akwap kana emusolo? Itung'a ikulopek akwap kere ilong'au?”

²⁶ Kinyakuni Petero, “Ilong'au.” Kinyakuni Yesu, “Ejokuna. Itodikiit ebe itung'a ikulopek akwap mam ketacete.

²⁷ Konye mam oni kikotosi akitakadikin itung'a lu. Kanuka ng'unu, kolot akare, kocakaki toma egolu. Kilang'u ekoleit lo igei ijo akikamun. Idumuni ijo ka akituk keng' abola na ilesikina akitaca emusolo kang' kiton lokon. Koyaa kotacak kesi emusolo wok.”