Matayo 16 - AKITUTUKET NAKITETET (NEPEPEKA ISABULIN KA AWARAGASIA)

Akote ka Agogong'u Aumosit

¹ Kobunete Ifarisayon ice ka Isadukayon nama ka Yesu ekotosi alokun nesi, king'isete nesi kisomak kesi aumosit akitodikin ebe ecamakiit Akuju nesi.

² Konye kobong'okini Yesu: “Elomi akolong' itemarete osi ‘Ebuni ejautene ka idowon ajokunaar naarai ereng' kuju.’

³ Taparacu sek ibalasi osi, ‘Elosi akiru adoore, naarai ereng' kuju, bobo iriono.’ Ibeikinete osi akidwar ejautene ka idowon kakitere kuju, konye mam osi kibekinete ajenun apolou ka akitodiareta kuju ka aparasia kanu!

⁴ Ikote itung'a luka apak kana eroko ai! Ing'isito osi eong' aumosit? Mam! Aumosit bon kiinakino osi erait aumosit naka Yona.” Kanuka ng'unu kinyekini kesi kosodi aikar.

Asipa ka Ifarisayon kiton Isadukayon

⁵ Kedokasi ikiyakia waije ka akare, kimurwokinete kesi ayaar emugati epede.

⁶ Kolimokini Yesu kesi, “Kocoikinasi; kiteete asipa ka Ifarisayon ka Isadukayon.”

⁷ Kogeunete akinamanama ebalasi, “Ebala nu naarai mam oni kiyauto emugati epede.”

⁸ Kejeni Yesu nu kebalasi, king'isi kesi, “Inyo inamanamata osi kuju kamamus ka emugati epede? Ikoni akiyuun na ejaasi ka osi edit ai!

⁹ Ering'a osi kijenuna? Mam osi kiituuto na abilibilia eong' imugatin akany kanuka itung'a aritai ikany? Ekosai ibukito abutu osi kilelebata?

¹⁰ Abo imugatin ikany ka aare luka itung'a aritai iwong'on. Ekosai ibukito ibutu osi kilelebata?

¹¹ Inyobo mam osi kijeniata ebe amam eong' enerasi ka osi kuju ka emugati? Kocoikinasi ka asipa ka Ifarisayon ka Isadukayon.”

¹² Kosodete ikiyakia ajenun ebe amam nesi ekwenyari kesi acoikina kamaka asipa kanu itosomao ko omugati konye kamaka akisisianakino ka Ifarisayon ka Isadukayon.

Nu Atemari Petero kuju ka Yesu

¹³ Koikari Yesu akwap na kidunyasi kiton etaun loko Kaesarea Pilipi, nama king'isia ikiyakia keng', “Ebaasi itung'a Okoku ka Etwan erait ng'ai?”

¹⁴ Kinyakakinete, “Ice ebalasi Yoana Lokebatisan, ice ebalasi Eliya, ice ebalasi Yeremia kere ekadwaran mutan.”

¹⁵ King'it nesi kesi, “Abo osi; ibalasi osi arait eong' ng'ai?”

¹⁶ Kinyakak Simon Petero, “Irait ijo Kristo, Okoku ka Akuju kalo ejari.”

¹⁷ Kinyakak Yesu nesi ebe, “Irereng' ijo, Simon okoku ka Yona! Naarai abeite na mam kebuni nama kon alomun kamaka itwan, konye Papa kang' lo ejii kuju nesi ekinakini ijo.

¹⁸ Kanuka ng'unu kalimokini eong' ijo Petero: Irait ijo atabaat, atabaat na nesi adukokini eong' ekanisa kang', bobo mam atikere atwanare kilanyi nesi.

¹⁹ Ainakini eong' ijo ilaceta luka ajakaanut kanako kuju. Nu ing'eri ijo ka akwap, eng'erio kokuju. Nu icamuni ijo ka akwap, ecamuno kokuju.”

²⁰ Kikwenyari Yesu ikiyakia keng' mam alimokin itwan ipede ebe erait nesi Kristo.

Inera Yesu kuju ka Ican ka Atwanare Keng'

²¹ Ageun apak ng'ini, kogeuni Yesu alimonokin ikiyakia keng' mam kigwait ibore ipede kama kes, “Ejii eong' alosite Yerusalem adumun ican noi alomun kamaka imojong', ka isaseredootin lukapolok ka lukesisianakinak Ikisila. Aario eong' konye kedaunosi aparasia auni, itajaruno eong'.”

²² Koyari Petero nesi awai kageun apega ka nesi, “Mam Akuju kecamakini, Lokapolon! Mam ng'unu kisomakinosi kama kon!”

²³ Kibong'i Yesu kalimokin Petero, “Koika kama kang', Asatanit! Irait ijo akirebokinet ko oroto kang', naarai aumomosia kon nu mam kelomuto kamaka Akuju konye elomuto kamaka itung'anan.”

²⁴ Kosodi Yesu alimokin ikiyakia keng' ebe, “Kekote itwan kere abunore nama kang', ejii nesi akimurwokin nukeng' bere, kakiriong' emusalab keng' kakigwap eong'.

²⁵ Ng'ini kere ni ekote ayuuni akijar keng', itowolikini; konye ng'ini ni itowoli akijar keng' kanu kang' edumuni.

²⁶ Inyena adumunet kedumu itwan akwap kere konye kitowolik akijar keng'? Kere inyena etaci itwan kanuka adumun bobo akijar keng'?

²⁷ Naarai apuuti Okoku ka Etwan abunore ka akibusesu ka Papa keng' kiton imalaikan keng'. Ebuni akitac ng'ini itwan atupa ka asomisio keng'.

²⁸ Kalimokini eong' osi abeite ebe ejaasi ice ne lu mam kebunete atwanare akitodol nama aanyunata Okoku ka Etwan ebuni bala ejakait.”