Matayo 15 - AKITUTUKET NAKITETET (NEPEPEKA ISABULIN KA AWARAGASIA)

Akisisianakino kaluka Asonya

¹ Kosodete Ifarisayon ice ka lukesisianakinak Ikisila alomuni ko Yerusalem nama ka Yesu ka aking'it nesi,

² “Inyo mam ikiyakia kon ketupiteter ikisila lu esisianakinete lukasonya wok? Mam kilosete akanin kes kotenan ering'a kenyama.”

³ Kinyakuni Yesu, “Inyo mam osi kitupitetere Ekisil ka Akuju, ka atupite akisisianakino kus ka ikulopek?”

⁴ Naarai atemarit Akuju, “Koyong' papa kon ka toto kon, bobo de, ng'ini kere ni ilami papa keng' ka toto keng', itemokina akiara.”

⁵ Konye isisianakinete osi ebe ejaasi itwan ka ibore ni ebeikini aking'arakin papa keng' ka toto keng' konye kobala, “Eni erait nika Akuju,”

⁶ mam kilesikina akiyong' kes ka papa keng'. Kokipone kalo, inyekisi osi Ekisil ka Akuju kanuka akitup akisisianakino kus ka ikulopek.

⁷ Osi luka esoswai lu! Kideere ekadwaran Isaya na kedwaria kuju kus ebala:

⁸ “Ebala Akuju, itung'a lu, eyong'ito eong' ka akiro kes, konye itawon kes eluaka noi kama kang'.

⁹ Akimaa kes eong' erait usa, naarai isisianakinete kesi ikisila ka itung'a, esit bala Ikisila kang'.”

Iboro lu Itoronete Itwan

¹⁰ Kosodi Yesu anyaraun itung'a lu ipu nama keng' kolimokini kesi, “Kiirasi, kojenutu!

¹¹ Mere ibore ni elomi akituk ka itwan nes itoroni nesi; konye ibore ni elomuni ka akituk keng' nes itoroni nesi.”

¹² Kosodete ikiyakia ka Yesu abunore nama keng' kalimokin nesi, “Ijeni ijo ebe kibuu ijo kitakadik Ifarisayon kanuka nu kitamarit ijo?”

¹³ Kinyakakin, “Ng'oli ekitoi lo kemam Papa kang' loko kuju kiraikiit eukorio.

¹⁴ Mam apodo kuju kes! Eraito kesi lu emudukaka lu eyaito imuduk; keyait emuduki loce, ibirokinosi kesi kere adwii.”

¹⁵ Konye kotemari Petero, “Kitetemik siong' awaragan na.”

¹⁶ Kolimoki Yesu kesi, “Ering'a osi kicouna akilany luce?

¹⁷ Mam osi kijenete? Ng'ini ibore ni elomi akituk ka itwan elomi akooki keng', kosodi alomuni king'a ka akwana keng'.

¹⁸ Konye iboro lu elomunete ka akituk, elomuuto ko otau, ng'ulu kesi iboro lu itoronete itwan.

¹⁹ Naarai ko otau keng' elomunete aumoumosia nukarokok nu einakinete nesi akiyara, adoteu, aelo, akokoo, aliyokonu, asabanakin luce.

²⁰ Nu kesi itoronete itwan; konye mam akinyam ka akanin kanu mam kilosite kemunaunete itwan.”

Akiyuun naka Aberu

²¹ Kolomari Yesu kaneni kosodi alosite odistrikt loko Taya ka Sidoni.

²² Kosodi aberu Akananait na kiboyee kalaro kang'ini abunore nama keng'. Kosodi adelori, “Okoku ka Daudi; kitimi eong' Lokapolon! Elomit akoku kang' ajokit, bobo ejii erono noi.”

²³ Konye mam Yesu alimokin nesi akirot apede. Kobunete ikiyakia keng' nama keng' akilip nesi ebalasi, “Kireng'ia nesi koika! Naarai etupit oni ecela!”

²⁴ Kinyakakini Yesu kesi, “Ijukute eong' nama ka itung'a kaluko Israel bon lu ewolito bala amerekekin.”

²⁵ Kapaki kana, kibirokin aberu akejen keng' kotemari, “King'arikine eong' Lokapolon.”

²⁶ Kobong'okin Yesu nesi ebala, “Mam kideere alemun inyamat luka idwe ka acakakin ing'okwo.”

²⁷ Kobong'okini “Erait ng'ini abeite, Lokapolon; konye ing'okwo de enyemete ararasia nu edacunosi ka amesa ka lukapolok kes.”

²⁸ Kanuka ng'unu kobong'okini Yesu nesi, “Irait ijo aberu na ijaasi ka akiyuun na epolo noi! Nu ikote ijo isomakino ijo.” Kong'aleuni akoku keng' akolong' ng'ipeng'in.

Itang'aleuni Yesu Itung'a Ipu

²⁹ Kolomari Yesu kaneni kaikar itorit arir ka akare nako Galilaya. Kodoki moru, kosodi akiboikin kwap.

³⁰ Kobunete nama keng' itung'a lu ipu eyauto ing'walaisik, lu emudukaka, lu mam kinerasi, ka itung'a ice lu epuaka lu adekasi, lu epiakinete kesi akejen ka Yesu; kitang'aleuni nesi kesi.

³¹ Koumokisi itung'a na kaanyunata kesi lu mam kinerasi inerasi, ing'walaisik elosete, lu emudukaka iteete. Kosodete akitur Akuju loko Israel.

Itani Yesu itung'a lu ipu ice de

³² Konyarauni Yesu ikiyakia keng' nama keng' kalimokin, “Etimit eong' itung'a lu, naarai ajaikinosi ka eong' aparasia auni konye kipokona emam ibore ni enyemete. Mam eong' kakote akitwar kesi mam kitanite kesi, naarai ebeikinete akiilor koroto elosete ore.”

³³ King'isete ikiyakia nesi, “Ai idumunata oni inyamata lu ilesikina komoding' kane lu itaniere itung'a lu ipu?”

³⁴ King'isi Yesu kesi, “Imugatin ikosai ejaasi ka osi?” Kobong'okinete, “Ikany ka aare ka ikole idis lu edisiak.”

³⁵ Kicorakini Yesu itung'a kiboikinosi kwap.

³⁶ Kolemuni nesi imugatin ikany kaare ka ikole, kiyalamikini Akuju, kobilibil imugatin ka ainakin ikiyakia; koinakinete ikiyakia de itung'a.

³⁷ Konyamata kesi kere kakimonikin. Kosodete ikiyakia atukokin inyamata lukideunosi, akileleb ibukito ikany kaare.

³⁸ Ng'ulu lu kenyemito keraito ikiliok aritai awong'on, mam kimarakiite aberu ka idwe.

³⁹ Kedau Yesu akitwar itung'a, kolomi ataker koikari alaro nako Magadan.