Matayo 13 - AKITUTUKET NAKITETET (NEPEPEKA ISABULIN KA AWARAGASIA)

Awaragan naka Ekayaan

¹ Apaaran ng'ipeng'in kolomari Yesu ko otogo, kaikar akiboikin arir ka akare.

² Kosodete itung'a lu ipwaka akimanakini nesi, kolomi ka akiboikin ataker; kogwoete itung'a kere kong'eleja.

³ Kitosomae nesi awaragasia alimonokin kesi iboro ipu. “Apak ape, kejii etwan epe lo kelosi ayaare ikinyom.

⁴ Na keyaa nesi ikinyom komanikor, kodoete ikinyom ice oroto, kobunete ikweny, konyemete.

⁵ Kodoete ice amoru, nama kedisiaka alipo. Kolomunete ikinyom atipet naarai kedisiaka alipo.

⁶ Konye na acauna akolong', konomori iraito; kanu kemam amori keikarito kwap cut kotwakete iraito atipet.

⁷ Kodoete ikinyom ice okokwa, lukepolounete, koridakinete iraito.

⁸ Konye kodoete ikinyom ice alipo nukajokak, kidounete iraito ikinyom; kidounete icee erwana akwatat; ice erwana akaisakanykape; ice erwana akaisauni.”

⁹ Bobo kong'etakin Yesu ebala, “Kopup kipokona, kijaasi ijo ka akii!”

Atenikina ka awaragasia

¹⁰ Kobuniete ikiyakia nama ka Yesu king'isete nesi, “Inyo itosomaa ijo awaragasia inerasi ijo ka itung'a?”

¹¹ Kinyakakini Yesu kesi, “Akijene akiro nu ikamuto Ajakaanut nako kuju einakite osi, konye mere kesi.

¹² Naarai itwan ni ejaatatare ka ibore, iyatakino nesi lu ipu tetere ejaatatare kalu ipu noi; konye itwan ni emamatatare, edemario atikere idiosi de nipe ejaatatare ka nesi.

¹³ Atenikina etosomaa eong' awaragasia enerasi eong' ka kesi erait ebe, iteete konye mam kaanyunete, epupete konye mam kiiranarete kere de mam kejenunete.

¹⁴ Kanu kes nesi etodolikinosi nu kinerit ekadwaran Isaya: “Ibuuto osi akiirar, konye mam kijenunete. Bobo ibuuto osi akitere, konye mam kianyunete,

¹⁵ naarai adama ka itung'a kalu kepasata, bobo akii kes ekekes apupuun, bobo kemudukata akonyen kes. Keree kiteete akonyen kes tya aanyunete, kakipup ka akii kes, ka akijen ka adama kes, ka akibeleun nama kang' ketang'aleu eong' kesi.”

¹⁶ “Konye erereng' akonyen kus, naarai iteete, akii kus epupete.

¹⁷ Abeite alimokini eong' osi ebe, ikadwarak lu ipu ka itung'a lu edolito, akotosi anyun nu iteete osi, konye mam anyun, apupun nu ipupete osi, konye mam kesi apupun.

Itetemi Yesu Awaragan naka Ekayaan

¹⁸ “Kiirasi, kisisiautu apolou ka awaragan naka ekayaan.

¹⁹ Ng'ulu lu epupunete akirot na ikamuti Ajakaanut konye komam kejenunete, eputosi ka ikinyom lukedacakinosi oroto. Ebuni nikaronon ka ademar ni kiraikiite toma kes.

²⁰ Ikinyom lukedacakinosi amoru, itupusio ka ng'ulu lu idiaunete akirot ka alakara nape irarata.

²¹ Konye mam kelomi kotenan toma kes, komam kitolosito ka apaarasia kanu ipu. Kanuka ng'unu kebutu ican kanuka akirot ka Akuju epasete atipet.

²² Ikinyom lukedacakinosi okokwa, eputosi ka ng'ulu lu epupunete akirot ka Akuju; konye akiyalolong' kuju ka akijar kanaka amina abara naka kwap kana, nes aariete akirot ka Akuju, komam kirae araito.

²³ Ikinyom lu keyekino alipo nukajokak, eputosi ka ng'ulu lu epupunete akirot ka Akuju ka ajenun: Iraite araito ice irwan akwatat; ice akaisakanykape; ice akaisauni.”

Awaragan naka Eduan

²⁴ Kolimokini Yesu kesi awaragan ace ebala, “Ajakaanut nako kuju eputo kona. Keyeit etwan ikinyom lukajokak mana keng'.

²⁵ Konye akware ape ejotoe ng'ini itwan, kobuni opading'a keng', ka ayekin eduan mana ng'ipe ng'ini naka engano, kosodi aikar.

²⁶ Na kelomunata iraan, kigwakini ikinyom, kosodi eduan de atakanuun.

²⁷ Kosodete lukejaanakinak ka etwan abunore nama keng' ka atemar, ‘Lokapolon, araito ikinyom lukajokak nes kirait ijo mana kon; Ai kelomuna eduan?’

²⁸ Kobong'okini, ‘Kerait lokasurup kisomae nu.’ King'isete kesi nesi, ‘Ikote ijo kalototo siong' akirut eduan?’

²⁹ Kobong'okini kesi, ‘Mam, naarai na irusiata osi eduwan ibeikiito osi akirut engano ece nepepe ka eduwan.

³⁰ Kinyekisi engano ka eduan kopoloutu nenipe akitodolo apaki naka akidweny; apak ng'ini, alimokini eong' lukadwenyak korutoto bere eduan ka atukokin abung'ei ka akicweikin, kosodete konye atukokin engano ka akipiakin odula kang'.’”

Awaragan naka Ecokit kalo edite noi

³¹ Kolimokini Yesu kesi awaragan ace, “Ajakaanut nako kuju eputo kona. Keyekini itwan ecokit lo edite noi mana keng'.

³² Erait ecokit lo edite noi kocoka kere, konye kelibu, erait iraat ni epolo noi akilany iraan kere. Erauni ekitoi tetere ebunete ikweny akiduk itogoi kes ateniek keng'.”

Awaragan naka Asipa

³³ Kolimokini Yesu kesi bobo awaragan ace, “Ajakaanut nako kuju eputo kona. Elemuni aberu asipa adis ka akinyalakin ka akiria alitai akaisawong'on akitodol nama ebuyata akiria ng'unu.”

Ekipone lo kitosoma Yesu awaragasia

³⁴ Kitosomae Yesu awaragasia akisisianakin itung'a iboro lu kere. Amam nesi alimuni ibore ipede mam kitosomat awaragasia.

³⁵ Kisomae nu tetere itodolikini nu kinerit ekadwaran: “Abuni eong' akitosoma awaragasia enerasi eong' ka kesi; Abuni eong' alimonokin kesi iboro lu mam kejenuna apelem ape kesubunere akwap.”

Itetemi Yesu Awaragan naka Eduan

³⁶ Kedau Yesu akinyekin itung'a lu ipu kolomi otogo, kobuniete ikiyakia keng' nama keng' kotemariete, “Kolimok siong' apolou ka awaragan naka eduan.”

³⁷ Kobong'okini Yesu kesi, “Lo keyee ikinyom lukajokak nes Okoku ka Etwan;

³⁸ emanikor nesi akwap; ikinyom lukajokak nes itung'a ikulopek Ajakaanut; Eduan nes itung'a lu ejaasi nama ka ajokit.

³⁹ Lokasurup lo keyee eduan nes ajokit. Idwenyan nesi esial ka akwap, ikadwenyak kes imalaikan.

⁴⁰ Ekipone lope etukokinere eduan ka akicwee kakim, nesi isomakin ko osial ka akwap:

⁴¹ Ijukuuni Okoku ka Etwan imalaikan keng' atukokin ka acakar ka Akajakaanut keng' ng'ulu kere lu einakinete itung'a asoma emuna ka ng'ulu kere lu isomaete iboro lukarokok,

⁴² ecakakinete kesi akimi na epolo noi, nama emonyata kesi ka akiriare ikial kes.

⁴³ Ebunete itung'a ka Akuju acaun kwape ka akolong' kotoma Ajakaanut ka Papa kes. Kopup konye, kijaasi ijo ka akii!

Awaragan naka Ibore kani Igwaite

⁴⁴ “Ajakaanut nako kuju eputosi ka ibore nikajokan noi ni kigwaite komanikor, ni kedumuni etwan kosodi arapakin. Kalakara keng' kolosi agwelar ng'in ibore ni kejaatatare ka nesi, kagwela emanikor ng'oli.

Awaragan naka amoru naka Jokan

⁴⁵ “Bobo ajakaanut nako kuju eputosi ka etwan lokesoman ebele ekote amoru nukajokak,

⁴⁶ kedau adumun amoru ape nakajokan noi, koikari agwelari ng'ini ibore ni kejaatatare ka nesi, kosodi agwela amoru ng'ini.”

Awaragan ke Eneti

⁴⁷ “Bobo, Ajakaanut nako kuju eputosi ka eneti lo kecakakino akare, ka akikamun ikole luka aputo kere.

⁴⁸ Kilelebun eneti, kiriarete ong'eleja, kogeunete akisee ikole, kigwakinete lukajokak obukit, lukarokok kocakarete.

⁴⁹ Ekipone lope ng'oli ejaikiner esial ka akwap. Ebuniete imalaikan akitiak lukarokok kama kalukajokak,

⁵⁰ ka acakakin kesi akimi na epolo noi; nama emonyata itung'a ka akiriare ikial.”

Abeite Nakitetet kitoni na Mojong'

⁵¹ King'isi Yesu kesi ebe, “Ijenutu osi nu kere?” Kinyakakinete nesi, “Eebo.”

⁵² Kinyakak nesi kesi, “Apolou kanu erait ebe ekesisianakinan ka ekisil kere lo erauni ekiyakia ka Ajakaanut kanako kuju eputosi ka elope etogo lo elemari king'a iboro lu kitetiak kalu mojong' ko otogo keng' kalo igwaitere iboro.”

Eng'erio Yesu Ko Nasareti

⁵³ Kedau Yesu ejori awaragasia nu, kolomari kaneni,

⁵⁴ kobong'ori otaun loko ore keng'. Abu kisisianak ko otogo loka alipasia ka Iyaudin, kosodete ng'ulu lu abutu kopuputu nesi aumokin. King'isete, “Ai kedumuna nesi acoa kwape kana; ka aumosia kanu?

⁵⁵ Mere lo okoku kaloka kewon abawoi? Mam toto keng' kenyarite Maria? Mere ikanacan keng' nes kes ka Yakobo, Yosef, Simon, ka Yudas?

⁵⁶ Mam akanacan keng' kiboyete kane? Ai kedumuna nesi nu kere?”

⁵⁷ Kanuka ng'unu kong'erete amunokin nesi. Kolimokini Yesu kesi, “Ekadwaran eyong'ite ka ng'ini alaro adepar ko otaun loko ore keng' ka ore keng' ka elope.”

⁵⁸ Mam nesi abu kisoma aumosia ipu kang'ina, kanuka amamus ka akiyuun kes.