Mariko 9 - AKITUTUKET NAKITETET (NEPEPEKA ISABULIN KA AWARAGASIA)

¹ Kosodi nesi akitolosite alimonokin kesi, “Abeite, kalimokini eong' osi, ejaasi ice egwoete kane lu emam kebunete akiir atwanare ering'a kesi kaanyuna abu ajakaanut ka Akuju ka agogong'.”

Akibelokin kaputo ka Yesu

² Ketuborosi apaarasia akanykape, kosodi Yesu ayaar Petero, Yakobo, nepepe ka Yoana moru nama ajaasi kesi bon. Kosodi aputo ka Yesu akibelokin koking'aren kes,

³ kocaunete inagai keng' ka akwang'akaar noi, ekipone lo amamar itwan ipede kakwap ni abeikini akitacaun.

⁴ Kosodete Eliya nepepe ka Musa atakanikin kesi. Apotu kesi kinerata ka Yesu.

⁵ Kosodi Petero alimokin Yesu ebe, “Lokesisianakinan, ejokuna oni ajaus ne! Kadukutu itogoi iuni, epe lokon, epe loka Musa, epe loka Eliya.”

⁶ Apotu nesi kaluce kokuriakarosi akitodolo na amamare nesi akijene nu limuna.

⁷ Kosodete idowon arapakin kesi, kolomuni eporoto kodou, “Lo nes Okoku kang' lominat, kopupoto nesi!”

⁸ Kireroorete kesi ng'olo wai, konye mam anyun itwan ipede adepar Yesu bon ejaasi ka kesi.

⁹ Elosiorito kesi kwap kemoru, kicorakini Yesu kesi ebe, “Mam alimokin itwan ipede nukepotu kesi koanyutu akitodolo na ejaruna Okoku ka Etwan kanaka lukatwak.”

¹⁰ Koyong'ete kesi akicorasit keng' konye kosodete kesi aking'itanakin ikulopek ebe, “Inyena apolou ka ‘Anyoun kamaka lukatwaka?’”

¹¹ King'isete kesi Yesu, “Inyo ebalatatar ikesisianakinak ikisila ebe Eliya nes itemokina akigee abunore?”

¹² Kinyakakini Yesu kesi ebe, “Egei Eliya abunore kanuka alokokin iboro kere. Konye inyo ebalatatar Agirasia nukajokak ebe icanakin noi Okoku ka Etwan, bobo eng'erio nesi?

¹³ Konye kalimokini eong' osi ebe adau Eliya abunore. Kosodete itung'a akisomakin nesi kwape keminatatar kesi atupa ka ekipone lo igiritere toma Agirasia kuju keng'.”

Itang'aleuni Yesu esapata lo ejaasi ka Eparait

¹⁴ Nakimorikinototore kesi ka ikiyakia, koanyunete kesi akwap ka itung'a elukakiito kesi kiton ikesisianakinak ikisila ice epegasi ka kesi.

¹⁵ Na anyuna akwap ka itung'a Yesu, koumokini kesi noi, kosodete amotar nama ajii nesi ka akimala nesi.

¹⁶ King'isi Yesu kesi ebe, “Inyena ipegasi osi ka kesi?”

¹⁷ Kinyakuni etwan epe kotoma atuket ka itung'a ebala, “Lokesisianakinan, ayauti eong' esapata kang' nama kon naarai ejaasi nesi ka eparait lo ainaki nesi emam kinera.

¹⁸ Ng'in paki kikamu eparait ng'olo nesi, iuranakini nesi kwap, kolomi ekuyetete ka akituk keng', bobo kanyakaa ikial keng', kiteregegiara. Abu eong' keng'it ikiyakia kon kireng'iasi eparait, konye mam kesi apotu kobeikisi”.

¹⁹ Kolimokini Yesu kesi, “Okwai, auri na mam kejaasi ka amuno! Kebooto eong' ka osi akolong' na etia ai? Kekanyata eong' ka osi kapaki kana etia ai? Koyautu esapata nama kang'!”

²⁰ Koyaunete kesi esapata nama ka Yesu. Na anyuna eparait ng'olo Yesu, kosodi eparait akisiloor esapata kosodi akiurakin kwap ka akibelebelo kolomi ekuyetete ka akituku.

²¹ King'isi Yesu papa keng' ebe, “Ajaikin nesi kona kapak kana etia ai?” Kinyakuni papa ebe, “Ape ka ekiditeu keng'.

²² Irwana ipu acakanaki eparait nesi toma akimi kiton toma akipi. Konye kisoni siong' bobo king'araki siong' kibeikini ijo!”

²³ Kolimokini Yesu nesi, “Ebe kibeikini ijo! Ebeikinosi akiro kijokin kamaka itwan kani ejaasi ka akiyuuni.”

²⁴ Kodelori papa keng' ka ikoku atipet, kotemari “Ajaasi eong' ka akiyuun, king'araki ejautene kang' loka amamus akiyuun!”

²⁵ Na anyuna Yesu akwap ka itung'a iyata koking'aren keng', kiretakini nesi eparait, “Ijo eparait loka akiming'aanut kaloka araus ebang'ai, kolomu king'a kamaka esapata, siri kilomo bobo toma keng'.”

²⁶ Kedau eparait ng'olo akilulukin ka akisiilori esapata, kolomari king'a. Korauni esapata bala ates kotemarete lu epu kama kes, “Ketwana!”

²⁷ Konye kirumi Yesu nesi kakan ka akitonyoun, kogwoi nesi.

²⁸ Kedau Yesu akilomo toma otogo, king'isete ikiyakia keng' nesi kawai ebe, “Inyo kikarikina siong' akireng'iar eparait?”

²⁹ Kinyakuni Yesu ebala, “Emam ibore ice ni ireng'iari eparait bala lo emam kerait alipasia bon.”

Inera Yesu bobo kuju ka atwanare keng'

³⁰ Kolomarete Yesu nepepe ka ikiyakia keng' itorito Galilaya. Mam Yesu akote itwan ipede kojenu,

³¹ naarai esisianakini nesi ikiyakia keng' ebala, “Igwakino Okoku ka Etwan akanin ka itung'a. Bobo ario nesi. Konye kedaun akiyara nesi, ejaruni nesi ketuborosi apaarasia auni.”

³² Konye mam kesi ajenuni apolou ka akisisianakino kana. Konye kosodete kesi akuriakari aking'it nesi.

Ng'ai epolo noi?

³³ Kodolunete kesi Kapernaum. Ejaasi kesi toma otogo king'isi Yesu ikiyakia keng', “Inyena kipegasi osi koroto?”

³⁴ Konye kotaunete kesi ti naarai apegasi kesi ikulopek koroto kuju kang'ai epolo noi.

³⁵ Kosodi Yesu akiboikin kwap konyarauni ikiyakia keng' itomonkaare kosodi alimokin kesi, “Kekote itwan kijokin araun nisodit tar nesi araun nikesial kamaka luce kere ka araun nikejaanakinan luce kere.”

³⁶ Kirumi Yesu ikoku, kitogwoi koking'aren kes. Kirumi kakanin keng' kosodi alimokin kesi,

³⁷ “Ng'ini kere ni idiauni ikoku bala eni ko okirori kang' ediau nesi eong'. Ng'ini kere ni idiauni eong', mere eong' idiauni nesi konye idiauni nesi lokejukuni eong'.”

Ng'ini ni emam kitepegi oni ejaasi ka oni

³⁸ Kolimokini Yoana nesi, “Lokesisianakinan, apotu siong' kaanyutu etwan ireng'ianari ipara ko okiror kon, keteng'eriete siong' nesi naarai amam nesi ajaasi ka oni.”

³⁹ Kosodi Yesu alimokin kesi, “Mam akiteng'ere nesi, naarai emam itwan ipede ni isomakini aumosit ko okirori kang' ebeikini ejori nukarokok kuju kang'.

⁴⁰ Naarai ng'ini ni mam kitepegi oni igang'it oni.

⁴¹ Abeite, kalimokini eong' osi ebe, itwan kere ni kiinakini osi ekikopot loka akipi komatata kanu iraitetere osi lukang', edumuni eropit keng'.”

Atamisio nuka asoma Arokusio

⁴² “Ng'ini kere ni idupori ipe kamaka lucik kalu lu ejaasi ka akiyuun kotoma kang' isomakini aronus, kejokuna ayenikin amoru nakapolon omorising' kitwaan kang'in ka acakakin nesi toma akare.

⁴³ Kerait akani kon nes kidupori ijo isomae aronus, kotubo! Ejokuna ijo akilomo akijar emam akani akilanya ajaus ka akanin ka aare konye ka alosite akimi na emam kedaun. [

⁴⁴ Ejaasi neni ikuru lu emam ketwakete bobo akimi keng' de mam ketwaani.]

⁴⁵ Kidupo akeju kon ijo isomae aronus, kotubo! Ejokuna ijo akilomo toma akijar ing'walit ijo akilanya ajaus ka akejen kaare konye kocakakinete ijo toma akimi.

⁴⁶ Ejaasi neni ikuru lu emam ketwakete bobo akimi keng' de mam ketwaani.

⁴⁷ Kerait akong'u kon nes kidupori ijo isomae aronus, kolema! Ejokuna ijo akilomo toma akijar ijaasi ijo ka akong'u ape akilanya ajaus ka akonyen aare konye kocakakinete ijo toma akimi na emam kedaun.

⁴⁸ Mam ikuru luka ng'ina ketwakete bobo akimi de mam ketwani.”

⁴⁹ “Ng'ini itwan italauno kakim kwape italaunere isubanit kabalang'.”

⁵⁰ “Ejokuna abalang', konye kepianaari abalang', ikokini ijo inyakuni ajijim keng' bobo ai?” “Kojaasi ka abalang' kotoma kus, kiboete kakinapakina kokiding' kus.”