Mariko 8 - AKITUTUKET NAKITETET (NEPEPEKA ISABULIN KA AWARAGASIA)

Itani Yesu itung'a ilukumin iwong'on

¹ Apaarasia ng'unu, abu akwap kitung'a kotukokin bobo. Amam ajaasi ka ibore ninyamata. Kiworouni Yesu ikiyakia keng' nama keng' kolimokini kesi,

² “Kesonie eong' itung'a lu, naarai ajaikinosi ka eong' apaarasia auni, konye emam ibore ipede ni enyemito.

³ Kejukia eong' kesi oreria kes keteng'e ebunete akiilor korot, naarai ice kama kes elomuto kama elwana.”

⁴ Kinyakakinete ikiyakia keng' nesi ebe, “Ikoni itwan ebeikini akitana itung'a lu kijokin komoding' kane ai?”

⁵ King'isi Yesu kesi ebe, “Ekosai imugatin ejaasi ka osi?” Kinyakunete, “Ikanykaare.”

⁶ Kicorakini nesi atukot kitung'a akiboikin kwap. Kolemuni nesi imugatin ng'ulu ikanykaare, kiyalamikini nesi Akuju, kobilibili, koinakini ikiyakia keng' kokorakisi itung'a. Kosodete kesi akorakin akwap ka itung'a.

⁷ Bobo ajaasi kesi ka ikole idis. Kedau Yesu akilipakin ikole ng'ulu, kicorakini nesi kokorakine itung'a ikole de ng'ulu.

⁸ Konyemete kesi ka akimonikin. Kosodete ikiyakia akirarun ararasia ileleba obukito ikanykaare.

⁹ Arait itung'a ilukumin iwong'on lu apotu konyamata.

¹⁰ Kisidari Yesu itung'a. Atipet kolomi nesi toma ataker nepepe ka ikiyakia keng' koikarete kesi odistrikti loko Dalmanuta.

Ing'isito Ifarisayon aumosit

¹¹ Kobunete Ifarisayon ka ageun apega ka Yesu ekotosi kama keng' akitodiaret alomun kokuju kanuka akitama nesi.

¹² Konye kiyeng'ari Yesu noi ebala, “Inyo ekotore auri nakilolo na aumosit? Abeite, kalimokini eong' osi emam aumosit einakino auri na.”

¹³ Kinyekini nesi kesi, kobong'ori ataker, kosodi aikar kitala loce loka ang'olol.

Asipa nuka Ifarisayon kiton nuka Erode

¹⁴ Kimuruokiit ikiyakia ayar emugati. Konye kedakito kesi emugatit epe bon kotoma ataker.

¹⁵ Kikwenyari Yesu kesi ebala, “Kiteete, kocoikinasi ka asipa nuka Ifarisayon kiton nuka Erode.”

¹⁶ Kogeunete kesi akineranakin ikulopek ebalasi, “Emam oni emugati epede.”

¹⁷ Ajeni Yesu nu enerasi kesi. King'isi nesi kesi ebe, “Inyo ineratatar osi kuju kamamus ka emugati? Ering'a osi kipupuna kere de ering'a osi kijenuna? Icasito itawon kus?

¹⁸ Ijaasi osi ka akonyen konye mam osi kiteete? Ijaasi osi ka akii konye mam osi kipupete? Bobo, mam osi kiitunenete?

¹⁹ Na abilibilia eong' imugatin ikany kanuka itung'a ilukumin ikany, ibukito ekosai luka ararasia ipotu osi kirarutu?” Kinyakakinete kesi Yesu, “Itomonkaare.”

²⁰ “Abo na abilibilia eong' imugatin ikanykaare konyamata itung'a ilukumin iwong'on, ibukito ekosai luka ararasia ipotu osi kirarutu ileleba?” Kinyakakinete kesi Yesu ebe, “Ikanykaare”.

²¹ King'isi Yesu kesi ebala, “Ering'a osi kijenuna?”

Itang'aleuni Yesu emuduki ko Betsaida

²² Kodoli Yesu Betsaida. Koyaunete itung'a ice emuduki nama keng' ka akimaima Yesu kojoro emuduki ng'olo.

²³ Kirumi Yesu akani kemuduki, ka ayaar nesi king'a ka aduket kang'in. Kedau akimwakin akonyen kemuduki, ka akidokokin akanin keng' kuju keng', king'isi Yesu nesi ebe, “Ipedori ijo anyun ibore ipede?”

²⁴ Kong'oliari etwan kuju kotemari ebe, “Etee eong' itung'a konye eputosi bala ikito elosete.”

²⁵ Kidokokini Yesu akanin keng' akonyen ka etwan bobo. Kobong'uni apedor keng' naka akikweny, koanyuni nesi ng'ini iboro kojokan.

²⁶ Kosodi Yesu akijukari nesi ore kes ka akicorakin nesi ebe, “Siri kilomo aduket.”

Elimori Petero ebe Yesu nes Kristo

²⁷ Kosodi Yesu aikar nepepe ka ikiyakia keng' aduketa nuko Kaisaria Filipi. Koroto, king'isi Yesu ikiyakia keng' ebe, “Ebalasi itung'a arait eong' ng'ai?”

²⁸ Kinyakakinete kesi nesi ebe, “Yoana lokebatisan. Ice ebalasi ebe irait ijo Eliya konye ebalasi ice ebe irait ijo epe kamaka ikadwarak.”

²⁹ King'isi nesi kesi ebe, “Konye abo osi. Ibalasi osi arait eong' ng'ai?” Kinyakakini Petero nesi ebe, “Irait ijo Kristo.”

³⁰ Kicorakini Yesu kesi ebe, “Mam alimokin itwan ipede kuju kang'.”

Inera Yesu kuju ka Ican kiton Atwanare keng'

³¹ Kogeuni Yesu akisisianakin ikiyakia keng' ebe, tar Okoku ke Etung'anan akicanakin cut korotin kalu egelegela. Tar kong'eroto nesi imojong', lukapolok ka isaserdotin, ka ikesisianakinak ikisila. Ario nesi, konye ketuborosi apaarasia auni, ejaruni nesi.

³² Abu nesi kinere nu kotenan. Koyaari Petero nesi awai kogeuni akiretanakin nesi.

³³ Konye kibong'i Yesu kau, kong'olekini ikiyakia keng'. Kosodi akiretakin Petero ebala, “Koika kau kang', Asatanit! Mam ijo kijii wai kang' konye wai ka etung'anan!”

³⁴ Konyarauni Yesu akwap ka itung'a kiton ikiyakia keng' nama keng'. Kolimokini nesi kesi ebe, “Kekote itwan kere akitupu eong', ejii nesi aking'ere nesi ilope ka akidaka emusalaba keng' ka akitupu eong'.

³⁵ Naarai ng'ini kere ni ekote akitukuu akijar keng' itolikini. Konye ng'ini kere ni itolikini akijar keng' kanu kang' kere kanuka akiro nukajokak itukui.

³⁶ Inyena ameda apede edumuni itwan kedumu nesi akwap kijokin ka akitowoli akijar keng'?

³⁷ Inyena ebeikini itwan alemun kanuka akitukuu akijar keng'.

³⁸ Itwan kijokin ni anyuni asilut kanu kang' ka akisisianakino kang' kotoma auri naka adoteu na kiton nakaronon na, ebuni asilikin Okoku ka Etung'anan de kanu keng' na ebunia kotoma akibusesu kanaka Papa keng' kiton imalaikan lukalaunak.”